Rim bơngai đei đe pơtho găh tơdrong tơchơ̆t gơh pơjing, axong păng vei lăng kơsô̆ pơkăp tơring pơtăm, anih 'nŭng 'măn hăm dôm tơmam drăm choh pơtăm đei; tơroi kơ dôm tơdrong tơchơ̆t lơ̆m Tơchơ̆t pơkăl Hơlen tơnăp hăm sâu riêng, ƀum ngô, prit 'măn tĕch ăn teh đak đe đơ̆ng Việt Nam tĕch ăn teh đak Trung Quốc. Atŭm hăm noh, rim bơngai hŏk đei pơhrăm găh kih thuơ̆t yua phŏng xơđơ̆ng 'lơ̆ng ăn tơm sâu riêng; pơtho găh tơdrong vei lăng kon char kơmar pơrăm lơ̆m tơring pơtăm, yua pơgang vei lăng 'long pơtăm mă xơđơ̆ng. Đăk Lăk đei lơ tơmam choh pơtăm tĕch ăn teh đak đe đei kơjă kăp. Mă kăl, đơ̆ng rŏng kơ đei Anih tơm Choh jang xa păng Hơtŏk tơring pơxĕl tơchơ̆t xơnong vei lăng păng pơjing kơsô̆ pơkăp tơring pơtăm, teh pơtăm sâu riêng đei xơkơ̆t hơdăh kiơ̆ tơchơ̆t tĕch ăn teh đak đe păng đei chih lơ̆m hla bar chih akŏm kơsô̆ pơkăp tơring pơtăm đei ƀôh tŏk lơ.