Tơ̆ hop akŏm, dôm bơngai tang măt roi tơƀôh lơ tơdrong ưh kơlăp lơ̆m tơdrong jang atŏk tơiung ‘long kăp gĭt tơ̆ tĕh đak bơ̆n hrei ‘nâu. Dôm bơngai tang măt oei akhan, vă atŏk tơiung ‘long pơtăm kăp gĭt kiơ̆ trong kơjăp ‘lơ̆ng, athei bơ̆ jang hrơ̆ch lơ trong jang ‘mơ̆i. Đơ̆ng hơmet ming trong vă choh jang xa, pơtăm dôm kơloăi ‘long kăp gĭt kiơ̆ trong pơm tơlĕch tơmam hơdai hăm pơm tơmam, tĕch mơdro truh tơplih ‘nao trong tơmât jên jang, tơplih đơ̆ng tơmât jên pơih xă tĕh pơtăm jing tơmât jên jang kiơ̆ khoa hŏk – kơmăy kơmŏk, mă loi jĭ kơmăy vei lăng hăm kơsô̆ lơ̆m pơgar ‘long.

Vei sơđơ̆ng tơdrong tĕch tơmam kiơ̆ lơ trong tơgŭm lăp ‘lơ̆ng. Hơtŏk hơnăp jang vei lăng đơ̆ng tĕh đak, lơ̆m nŏh năng kăl truh tơdrong hơmet pơ ‘lơ̆ng tơdrong tơgŭm, khôi luơ̆t vă pơjing hơyak tŏk pran lơ̆m tơdrong tơgŭm ăn bơngai pơtăm, pơm tơlĕch păng tĕch mơdro tơ̆ tĕh đak đe. Lơ nơ̆r tơgop lơ̆m hop akŏm ‘măng mă âu ‘nŏh jĭ tơdrong tôch gĭt kăl vă Anih tơproh trong choh jang xa chih hơmet hla ar chih tơroi, gơih ăn Anih tơm vei lăng choh jang xa păng atŏk tơiung tơring tơrang tơroi ăn Khul kơdră tĕh đak.