‘Nao hơlen năng hơyuh tŏ lơ̆m Anih pơtăm pơmâu đông trùng hạ thảo, ‘nhŏng Đoàn Quốc Anh Khôi, Kơdră chĕp kơ̆l HTX Đông trùng hạ thảo Kon Tum ăn tơbăt, vă pơmâu đông trùng hạ thảo jing ‘lơ̆ng, tơdrong vei lăng hơyuh tŏ lơ̆m anih pơtăm kŭm nhen prun đak tôch gĭt kăl. Yoa thoi noh, ‘nhŏng chă răt iŏk kơmăy kơmŏk ‘nao vă jang đei tơmam ‘lơ̆ng.

Kŭm hăm ‘nŏh, HTX oei năng kăl truh tơdrong tơmât yoa kơmăy kơmŏk tơroi tơbăt lơ̆m tơdrong pơjing, roi tơƀôh um rup, tơlĕch trong tĕch mơdro kiơ̆ đơ̆ng hơnhăk tơmam tĕch tơ̆ dôm anih tĕch tơmam hăm điên tư. Gơnơm thoi noh, gơ̆h truh hăm lơ bơngai răt lơ̆m teh đak, đei iŏk yoa lơ hlŏh 2 truh 3 ‘măng pơting hăm adrol ki.

‘Nhŏng Đoàn Quốc Anh Khôi tơroi: “Ƀôh kon pơlei tơplih trong chă răt tơmam ‘nŏh HTX tơlĕch trong livestream păng tĕch đĭ đăng tơmam hăm kơmăy điên tư đei dang ei tơ̆ Việt Nam đơ̆ng noh kŭm hơnhăk ba đei yoa roi lơ ăn HTX păng hơtŏk lơi yoa đơ̆ng 15 - 20% ăn bơngai jang lơ̆m rim khei.”

Tơdrong tơmât yoa “kơmăy sô̆” ưh pă đei chrih kiơ hăm dôm bơngai jang lơ̆m HTX Choh jang xa, Pơm tơlĕch păng tĕch mơdro Sáu Nhung (HTX Sáu Nhung), 1 HTX chŏh jang xa pran ‘lơ̆ng hăm dôm tơmam chĕh phe tơ̆ apŭng Đăk Hà, dêh char Kon Tum. Đơ̆ng năr HTX tơlĕch lơ jên, jang kiơ̆ kơmăy kơmŏk – ki thuơ̆t ‘nao lơ̆m tơdrong jang xa, pơm tơlĕch, tĕch mơdro tơmam hlôi pơm hơtŏk đei tơdrong đei yoa mưh choh jang xa, hơtŏk kơsư̆k pơjei, đei yoa ‘lơ̆ng mưh tĕch mơdro.

Mŏ Ngô Thị Mai, bơngai jang lơ̆m HTX Sáu Nhung tơroi: “Mưh vang jang lơ̆m HTX, đei tơdrong tơmât jên jang găh kơmăy kơmŏk ‘nao lơ ƀiơ̆ kơ adrol sơ̆. Tĕh pơtăm hnam nhôn đei pruih đak hăm đing ƀât tơm, pruih đak thoi âu ‘mơ ‘met đak, phŏng păng kŏng jang tôch lơ. Vei rong kiơ̆ trong jang hăm mơ̆r kŭm pơm ăn pơgar ‘long blŭng jing ‘lơ̆ng, jang xa kơjăp đunh.”

Kiơ̆ ƀok Nguyễn Tri Sáu – Kơdră chĕp kơ̆l Khul vei lăng HTX Sáu Nhung, dang ei HTX đei hlŏh 100 ‘nu bơngai jang, akŏm đĭ đăng teh choh jang xa đei hlŏh 300ha chĕh phe. Tơdrong jang kiơ̆ trong tơplih hăm kơmăy sô̆ ưh lăp sek tơlang ‘lơ̆ng tơdrong vei lăng, tĕch mơdro, pơjing đon lui ăn bơngai răt tơmam đĕch, mă oei hơnhăk ăn lơ tơdrong đei yoa nai hai nhen gơ̆h tĕch ăn lơ bơngai răt, rim sơnăm iŏk yoa đơ̆ng tĕch tơmam hơnơ̆ng tŏk hlŏh 10%, mă loi ‘nŏh jĭ chĕh phe hach. 1 tơdrong đei yoa nai dơ̆ng mưh jang kiơ̆ tơdrong tơplih hăm kơmăy sô̆ ‘nŏh jĭ tơgŭm chĕp răk hla ar hô sơ hrĕnh ƀiơ̆, chă hơlen năng ƀônh ƀiơ̆, tơjur ƀiơ̆ pơm hla ar vei lăng.

Ƀok Nguyễn Tri Sáu pơma: “Nhôn hơnơ̆ng chih hơdăh pơm tơmam đơ̆ng HTX kiơ̆ trong đei tơlĕch blŭng a ‘nŏh pơm tơmam ‘lơ̆ng vă gơ̆h tĕch tơ̆jơ̆p tơring. Nhôn hơnơ̆ng tơrek truh dôm tơdrong roi tơbăt tơmam tơ̆ dôm kênh vă bơngai răt băt tơmam ‘lơ̆ng. Mă 2 ‘nŏh pơm đei lơ tơmam, dang ei nhôn đĭ pơm đei chĕh phe hach, chĕh phe găr ‘mŏm ngôi."

Ƀok Nguyễn Lâm Cảnh, Kơdră Grŭp HTX dêh char Kon Tum ăn tơbăt, tơplih hăm kơmăy sô̆ ‘nŏh jĭ trong jang ưh đei tơplih lơ̆m tơdrong jang tŏk, mŭk drăm atŭm kŭm ưh gơ̆h vĕh ‘năi. Mă lei, dang ei kơsô̆ HTX tơ̆ dêh char tơmât yoa kơmăy kơmŏk, pơgơ̆r jang xa oei tam mă pran ‘lơ̆ng păng jang xa oei iĕ. 

Ƀok Nguyễn Lâm Cảnh tơroi: “Vă bơ̆ jang ‘lơ̆ng tơdrong ‘nâu ‘nŏh Grŭp athei jang hơdoi hăm dôm anih jang kơpal, asong ăn HTX vang truh hăm dôm kơchơ tơlĕch trong tĕch mơdro, đơ̆ng noh pơjing đei tơdrong pơvei ăn dôm HTX hăm anih tĕch mơdro vă tĕch mơdro tơmam. Mă 2 ‘nŏh tơgŭm ăn dôm HTX pơm đei tơmam ‘lơ̆ng, đơ̆ng noh gơ̆h pơjing đei dôm tơmam ‘lơ̆ng kiơ̆ tơdrong hơgăt tơ̆ anih tĕch mơdro vă pơm hơtŏk kơjă tơmam đơ̆ng anih jang mŭk drăm atŭm.”

Vă hơtŏk jơhngâm bơ̆ jang tơplih hăm kơmăy sô̆ đơ̆ng dôm HTX, tơ̆ hơnăp kơnh, Grŭp HTX dêh char vă jang hơdoi hăm dôm anih jang đei ƀơm truh pơgơ̆r pơtâp pơhrăm, hop akŏm pơma nuh vă hơtŏk đon hlôh vao, gơ̆h hơgei ăn kăn ƀô̆ vei lăng HTX găh tơdrong đei yoa đơ̆ng jang kiơ̆ kơmăy sô̆; pơgơ̆r năm lăng tơ̆ dôm HTX hlôi jang kiơ̆ kơmăy kơmŏk sô̆, đơ̆ng noh chă hŏk pơhrăm, tơlĕch jang kiơ̆ lơ̆m dêh char.