Jĭ 1 lơ̆m dôm hơp tak xăh iung jang hơdrol tơplih ‘nao vă pơm lăp hăm anih tĕch mơdro. Hơp tak xăh Choh jang sa pơvih pơvăn Công bằng Ea Tu, pơlei tơm Buôn Ma Thuột, dêh char Đắk Lắk hlôi iŏk đei dôm jơnei. Hloh 320 hec-ta cheh phe jang hơdai hăm kon pơlei jang chŭn mir, hơp tak xăh tŏk bŏk pơgơ̆r pơm tơlĕch kiơ̆ trong đơ̆ng vei lăng truh phĕ, sơ̆k, pơm cheh cheh phe pŭk, cheh phe hach... iŏk đei hla ar pơkăp FLO pơm lăp hăm ‘meh vă tĕch tơ̆ teh đak đe.

Ƀok Trần Đình Trọng, Kơdră vei lăng hơp tak xăh tơbăt, hơdai hăm vang jang dôm tơdrong jang hơdai, pơtrŭt mơdro sa, hơp tak xăh hlôi tơgĕch iŏk tơdrong pran lơ̆m tơroi tơbăt kơsô̆ vă roi tơƀôh pơjing hơnăn: "Nhôn rơih iŏk đe buăl mơlôh, đe buăl âu hlôi đei hlôh vao bơ̆jang lơ̆m dôm kŏng ti tơ̆ pơlei tơm Hồ Chí Minh găh dôm hơnih tĕch mơdro điện tử păng gơh nơ̆r Anh. Kiơ̆ kơ ‘noh, nhôn roi tơƀôh tơmam đơ̆ng nhôn lơ̆m dôm trang mạng tơpôl păng websize. Nhôn đei dôm anih jang lơ̆m teh đak păng apŭng plĕnh teh găh Ea Tu cheh phe. Đơ̆ng noh đe sư truh jang hơdai păng răt tơmam, nhôn mă tŏk đei jên iŏk lơ.”

Hăm tơdrong ‘lơ̆ng đei lơ bơngai jang lơ̆m khŭl mơlôh, hơbĕch hơbal, pơ̆n tơchĕng pơ̆n jang, hơp tak xăh Choh jang sa păng pơvih pơvăn Phú Nông - Buôn Đôn, apŭng Buôn Đôn, dêh char Đắk Lắk hlôi tơtĕnh pơjing đei “la kak kơsô̆” tơgoăt, roi tơƀôh dôm tơmam đơ̆ng hơp tak xăh lơ̆m hơnih kơsô̆. ‘Moi kiơ̆ dôm trang web, kênh youtube, zalo …, hơp tak xăh âu roi ‘năr roi đei lơ bơngai băt truh.

Ƀok Trần Văn Toàn, Kơdră jơnŭm vei lăng hơp tak xăh akhan, ‘nâu jĭ 1 trong jang tĕch mơdro ‘nao, hơgei păng ‘lơ̆ng.“Nhôn hlôi pơjing trang web, dôm trang fanpage, grŭp zalo, facebook…vă ‘moi kiơ̆ đơ̆ng noh vang tơroi păng păr ang găh dôm tơdrong hlôh vao khoa hŏk ki thuơ̆t vă hơtŏk ‘lơ̆ng đon tơchĕng jang sa kŭm nhen hơtŏk ‘lơ̆ng kơjă tơmam. Gơnang đơ̆ng đei dôm bơngai jang lơ̆m tơpôl vang tơroi păr ang dôm tơmam păng dôm tơdrong jang đơ̆ng hơp tak xăh vă bơngai răt yua ƀôh lui ngeh iŏk yua tơmam đơ̆ng nhôn sơđơ̆ng hloh păng ‘lơ̆ng hloh.”

Kiơ̆ kơ ƀok Nguyễn Thiên Văn, Phŏ Kơdră Anih vei lăng kon pơlei dêh char Đắk Lắk, lơ̆m khei ‘năr anih tĕch mơdro pơjei băl nhen hrei ‘nâu, dôm hơp tak xăh hlôi băt jrŭ tơdrong iŏk yua kơmăy kơmŏk hơgei lơ̆m jang sa. Lơ hơp tak xăh choh jang sa iŏk yua kơmăy kơmŏk tơruih kơtoh. sơ̆k tơmam đơ̆ng choh jang sa hăm kơmăy sơ̆k, pơm tơlĕch cheh phe ‘lơ̆ng... Dôm hơp tak xăh kơmăy kơmŏk, jang kơmăy kơmŏk đei trong tơplih ‘nao kơmăy kơmŏk, tơplih trong jang sa - tĕch mơdro - pơvih pơvăn đơ̆ng hơdrô̆ anih jang jing tĕch mơdro akŏm. Hơdai hăm tơdrong jang ‘nao, dôm hơp tak xăh kŭm tŭn pran iŏk yua kơmăy kơmŏk kơsô̆ lơ̆m tơdrong roi tơƀôh, tĕch tơmam lơ̆m lơ anih tĕch mơdro điện tử.

Khei ‘năr âu ki, dôm anih jang lơ̆m dêh char Đắk Lắk jang hơdai hăm Anih pơtrŭt mơdro sa (Anih tơm vei lăng găh kơmăy kơmŏk mơdro sa ) hlôi pơgơ̆r lơ khoă pơhrăm găh tơdrong gơh băt tĕch mơdro lơ̆m hơnih kơsô̆, hơtŏk tơiung hơnăn, pơjing um rup ăn anih mơdro sa, hơp tak xăh lơ̆m dêh char.

Ƀok Nguyễn Thiên Văn tơbăt, dêh char gô hơnơ̆ng, pơtrŭt dôm hơp tak xăh tơplih kơsô̆ tơ̆ hơnăp kơnh: “Hrei ‘nâu tŏk bŏk chih hơmet hơnơ̆ng tơgŭm lơ hloh dơ̆ng vă pơjing dôm hơp tak xăh jang ‘lơ̆ng. Tơ̆ âu gô ‘lơ̆ng găh lơ tơdrong lơ̆m noh đei iŏk yua kơmăy kơmŏk ‘nao, tơplih kơsô̆ lơ̆m tơdrong pơjing hơnăn tơmam, pơjing kơsô̆ tơring pơtăm tơklep hăm yua kơsô̆ mã vạch, iŏk yua kơmăy kơmŏk kơsô̆ tơgŭm kơjă hơnăn tơmam roi ‘năr roi hơtŏk kŭm nhen iŏk đei kơjă kăp gĭt hơnhăk ăn đei yua lơ hloh ăn kon pơlei păng anih mơdro sa.”

dôm tơdrong hơdrin tơplih kơsô̆ đơ̆ng dôm hơp tak xăh tơ̆ dêh char Đắk Lắk tŏk bŏk tơgop pơm tơdrong hiôk lơ̆m tơdrong jang vei lăng, tơgŭm tơ jur jên jang, hơtŏk iŏk yua ăn dôm hơp tak xăh. Mă loi ‘noh, iŏk yua kơmăy kơmŏk kơsô̆ lơ̆m roi tơƀôh tơmam tŏk bŏk pơih ăn lơ tơdrong hiôk ‘nao, anih mơdro sa ‘nao, hơtŏk kơjă păng pơjing hơnăn tơmam kơ Đắk Lắk./.