‘Nâu jĭ tơ drong ‘lơ̆ng vă dôm anih pơm tơ lĕch, tĕch mơ dro tiu tơ̆ tĕh đak đe pơ ma nuh găh tơ drong juăt jang, roi tơ băt ăn băl dôm tơ drong kăl păng tơ drong mơ mat tat, tơ hlăk tăk, tơ lĕch trong hơ met pơ ‘lơ̆ng vă tưk tơ iung anih jang tiu lơ̆m apŭng plenh tĕh. Kiơ̆ yă Hoàng Thị Liên, Kơ dră vei lăng Khul jang tiu Việt Nam, tơ drong athei tĕch tơ mam ‘lơ̆ng tơ̆ dôm anih tĕch mơ dro roi đunh roi tŏk. Yoa thoi nŏh, vă gơ̆h tĕch đei kơ jăp măk, pơm đei tiu ‘lơ̆ng ‘nŏh jĭ tơ drong tôch gĭt kăl.

Tơ̆ hop akŏm, ƀok Vũ Bá Phú, Kơ dră Anih tơ lĕch trong tĕch mơ dro kơ Anih tơm vei lăng jang kơ măy, tĕch mơ dro ăn tơ băt, Việt Nam dang ei oei jing tĕh đak pơm tơ lĕch, tĕch mơ dro tiu lơ hlŏh lơ̆m apŭng plenh tĕh. Sơ năm 2022 tĕh đak bơ̆n tĕch tơ̆ tĕh đak đe đei 220 rơ bâu tân, iŏk đei 55% akŏm đĭ đăng tiu đei tĕch mơ dro lơ̆m apŭng plenh tĕh. Mă lei vă tơ mam đơ̆ng tiu Việt Nam roi dơ̆ng kơ jăp lơ̆m anih tĕch mơ dro apŭng plenh tĕh, anih jang tiu oei đei lơ tơ drong athei bơ̆ jang dơ̆ng.