Kiơ̆ chih jô̆ tam mă tôm, jô̆ truh ‘năr dơ̆ng 23/7, lơ̆m apŭng Lăk đei vă jê̆ 1.200 hek tar ƀa đak păng ƀum hơ ƀo pro hơmrĕ đei đak lơ̆p. Kon pơlei hlôi tơtom chơ pơdŭ phe ƀa, mŭk tơmam truh tơ̆ dôm hơnih kơ kông hrĕng, sơđơ̆ng tang găn đak ‘mi tih.

Ƀok Võ Anh Tú, Phŏ Kơdră Anih vei lăng kon pơlei apŭng Lắk, dêh char Đắk Lắk tơbăt, apŭng hlôi athei dôm anih jang, tơring lăng kiơ̆ tơplih ‘mi đak tih, jang kiơ̆ ‘lơ̆ng trong jang kăl "puăn kơ tă anih", iŏk tơdrong sơđơ̆ng kơ kon pơlei ‘noh tơdrong jang kơtang lơ̆m tang găn ‘mi kial pơrăm.