‘Nhŏng Nguyễn Lê Duy, tơring Ea Tar, apŭng Cư M’gar, dêh char Đak Lăk đei hloh 10 ha sâu riêng hơdrĕch Dona. ‘Nhŏng tơbăt, sơnăm sơ̆ ŭnh hnam phĕ đei 200 tân, hăm kơjă tĕch mơdro tơ̆ mir pơgar 42.000hlak jên lơ̆m 1 kĭ, iŏk đei 8 ti 400 triu hlak jên.

Lơ̆m sơnăm au, rŏ năng đei iŏk yua hlŏh ƀar ‘măng pơtêng hăm sơnăm sơ̆ gơnơm kơjă măt. ‘Nhŏng Nguyễn Lê Duy chơt hơ iă:  “Nhen sơnăm sơ̆ kơjă dang 40.000 hlak jên lơ̆m 1 kĭ, găh dang ei đơ̆ng 60-70.000 hlak jên lơ̆m 1 kĭ, păng đe hlôi apĭnh răt bơih. Hăm kơjă dôm au ‘nŏh kon pơlei choh jang sa nhôn chơt hơ iă, hơdrin tơmơ̆t jên jang, vei lăng năng tông ‘long sâu riêng ‘lơ̆ng hơ iă hloh.”  

Jei chơt hơ iă kơ yuơ sâu riêng măt, mă lei ƀok Ngô Công Lương, oei tơ̆ tơring Ea Yông, apŭng Krông Pach, tă tim mă kĭ pơkăp tĕch răt hăm mir pơgar sâu riêng 180 dơnơm hơdrĕch Dona pơtăm hrau lơ̆m mir pơgar chehphe. Ƀok tơbăt, rim năr dôm bơngai mơdro năm lăng mir pơgar păng ‘meh vă pơkơ̆ng jên vă răt pơđĭ plei sâu riêng:“Hrei au đei bơngai apĭnh răt hăm kơjă 72.000 hlak jên lơ̆m 1 kĭ, păng đei lơ ŭnh hnam iŏk jên pơkơ̆ng bơih. Lơ̆m 1 ha đe sư iŏk hơdrol 400 – 500 triu hlak jên. Ŭnh hnam bơ̆n tim mă hăt hot, kơ yuơ kơjă au tim mă tơpă, kơna tim mă tĕch. Kơ yuơ dang yơ vă jê̆ kăt tĕch dang 1 giĕng ‘noh mă sơkơ̆t hơdăh kơjă, lơ̆m mă noh kơnh bơngai bu năm răt ba jei tĕch hloi.”

Krông Pach ‘noh apŭng pơtăm sâu riêng să hloh lơ̆m dêh char Đak Lăk hăm hloh 7.100 ha, lơ̆m au hloh 3.000 ha tok bŏk đei plei. Hơdrô̆ sâu riêng tơ̆ au găh lơ ‘nŏh hơdrĕch Dona păng Ri6. Lơ̆m 1ha đei plei đơ̆ng 18-20 tân. Ƀok Nguyễn Huy Hoàng, Kơdră chĕp pơgơ̆r Hơnih vei lăng Choh jang sa păng atŏk tơ iung tơring tơrang apŭng Krông Pach tơbăt, sơnăm au tŏ ‘mi kial ưh sơđơ̆ng, lơ̆m blŭng pơyan mĭnh ƀar mir pơgar sâu riêng hơlŭng pơkao păng hơlŭng kơtăn lơ. Mă lei gơnơm vei lăng năng tông ‘lơ̆ng kơna dôm plei gei ‘nŏh hăp plei tih ‘lơ̆ng.“Apŭng Krông Pach hơlen sơnăm au gô đei iŏk yua kơjăp găh sâu riêng. Dang ei kon pơlei tŏk bŏk vei lăng năng tông păng dang 45 năr dơ̆ng ‘nŏh gô phĕ tĕch. Blŭng pơyan phĕ, Hơnih vei lăng kon pơlei apŭng gô iung năm dăr lăng păng bơ̆jang ‘lơ̆ng chă pơrô̆ hơvơn kon pơlei vă vei lăng sơđơ̆ng tơring adoi nhen vei lăng năng tông ‘lơ̆ng mŭk drăm kơ dih kon pơlei.”

Lơ̆m dêh char Đak Lăk hrei au đei 22.500ha sâu riêng, lơ̆m au đei dang 10.000 ha mir pơgar hlôi đei plei. Sơnăm sơ̆ (2022) phĕ đei 170.000 tân, tĕch mơdrto iok đei hloh 9.500 ti hlak jên. Lơ̆m sơnăm au, phei sâu riêng dêh char Đak Lăk gô phĕ iŏk đei dang 185.000 tân. Hrei au dăr lăng hơlen tơ̆ mir pơgar tơ̆ Krông Pach, Krông Năng, Buôn Hồ, Cư M’gar … kơjă răt plei sâu riêng tơ̆ mir pơgar đơ̆ng 65 – 75.000 hlak jên lơ̆m 1 kĭ, gômơ̆ng kiơ̆ hơdrĕch Dona dăh mă Ri6 păng plei ‘lơ̆ng kơnê̆ lơ liơ. Hăm pơđĭ kơjă tĕch tĕch păng đei plei lơ, sâu riêng Đak Lăk pơyan 2023 gô hơnhăk đei iŏk yua kơjăp hloh ăn kon pơlei jang sâu riêng.