Năr tŏk bŏk khei 6, tơ̆ mir ƀum iĕ (ƀum ngô) să 10ha tơ̆ tơring Buôn Triă, apŭng Lăk, ƀok Phạm Đăng Xuân tŏk bŏk iŏk yua kmăi păr (Drone) pruih pơgang, phŏng ăn mir ƀum iĕ vă jê̆ plei. Ƀok tơroi, mĭnh năr, kmăi au jang đơ̆ng 8 – 10h, pruih tơruih ăn 25 – 30 ha ‘long pơtăm.

Tơdrong iŏk yua ƀônh ƀŏ, lăp kăl tŭh đak ƀĕnh kơ ƀĭnh, tuh hrau phŏng, phŏng sinh hŏk đơ̆ng noh tơpăr hăp chă păr pruih hloi:“Kmăi păr au nhôn iŏk yua vă pruih pơgang, phŏng tôch rơvơn, dă ƀiơ̆ tơhoach lơ jơ ‘năr jang. Lơ̆m 1ha nhôn chă pruih hăm kmăi au lơ̆m 10 pơnĭt ‘noh đang bơih, jăh sơ̆ ‘nŏh 2 ‘nu pruih lơ̆m 1ha mĭnh poăt năr ‘mơ̆i mă đang. Kmăi kmŏk hle hrei au gơ̆h hơgei dêh. Nhôn ngăl răt yua phŏng sinh hŏk vă pruih ăn ƀum iĕ (ƀum ngô) tôch jing ‘lơ̆ng.”

Tơdrong răt đei kmăi păr pruih pơgang lơ̆m choh jang sa kơ kon pơlei oei tơ̆ apŭng Lăk ‘noh ưh kơ ê. Ƀok Cao Xuân Phương-Kơdră chĕp pơgơ̆r Hơp tak xah choh jang sa Thành Tín, tơring Dak Nuê, apŭng Lăk tơbăt, dôm sơnăm au ki, lăp đơ̆ng rŏng năng lăng trong jang pruih pơgang vei lăng ‘long pơtăm hăm kmăi au tơ̆ apŭng Đức Trọng, dêh char Lâm Đồng, ƀok hlôi apĭnh jet răt iŏk 2 tŏ đơ̆ng Cần Thơ vă iŏk yua. ‘Măng mă blŭng, Hơp tak xah chă rơih 2 ‘nu tơdăm hơbĕch hơbal hloh (lơ̆m au đei ƀok Xuân) ăn năm tơ̆ hơnih tĕch vă hŏk pơhrăm tơdrong iŏk yua kmăi păr au. Lơ̆m tơdrong jang kmăi păr vei lăng ‘long pơtăm hlôi tơƀôh hơdăh tơdrong hơ iă hloh:“Hlŏh đơ̆ng iŏk yua 2 sơnăm kơ au, nhôn bôh hlôi pơm tơjur kon jên tơmơ̆t jang 30% hăm pơgang vei lăng ‘long pơtăm, phŏng; găh năr jang ‘nŏh tơjur đơ̆ng 40-50% ăn kon pơlei choh jang sa.Kơ yuơ kmăi păr pruih pơgang au ‘lơ̆ng hơ iă hloh, hăp pruih đak pơgang nhen ‘mi pru kơna dă ƀiơ̆ tơhoach pơgang lơ păng hăp hram iôm hla ‘long pơtăm păng hoei pơm kơnê̆ truh jơhngơ̆m jăn bơ̆n hloi.”

Hơp tak xah Choh jang sa Thành Tín, tơring Dak Nuê, apŭng Lăk đei vă jê̆ 100 ŭnh hnam, jang sa hloh 130ha ƀum iĕ (ƀum ngô), vă jê̆ 700ha chŭn na ƀa đak. Iŏk yua kmăi kmok gơ̆h hơgei lơ̆m au đei kmăi păr pruih pơgang lơ̆m choh jang sa hlôi pơm ăn ‘long pơtăm plei ăl, ‘lơ̆ng. Ƀum iĕ (ƀum ngô) kơ Hơp tak xah hlôi đei ƀơk ăn mã kơsô̆ tơring pơtăm, tĕch mơdro hơyoh hloi năm tơ̆ teh đak Trung Quốc. Đơ̆ng iŏk đei jơnei hơ iă ‘noh, ‘nao au Hơp tak xah răt dơ̆ng 2 tŏ kmăi păr au vă vei lăng năng tông ‘long pơtăm, mĭnh tŏ kmăi păr au kơ jă hloh 250 triu hlak jên.