Đơ̆ng rŏng dôm năr adrin truyên đak, ƀet tôm pơgang kiơ̆ nơ̆r pơtho đơ̆ng anih jang thú y, romo unh hnam ƀok Nguyễn Đình Sơn, tơ̆ plei Bồng Lai, xăh Hiệp Thạnh, apŭng Đức Trọng vă pran jăng dơ̆ng. ‘Ngoăih kơ 2 tŏ romo jĭ dêh hlôi lôch, hlŏh 10 tŏ rơmo oei đei dơ̆ng kơ unh hnam ƀok gơ̆h xa ‘ngiet dơ̆ng bơih. Mă lei, tơdrong mă ƀok Nguyễn Đình Sơn pơngơ̆t hlŏh jĭ, rơmo nhen vă jĭ hơlơ̆k dơ̆ng: “Ƀet vaccine ‘năr 25/7, truh ‘năr 2/8 ‘nŏh ƀôh rơmo ưh ‘mĕh xa, klĕp ‘năr 4/8 ‘nŏh đĭ đăng kuă xa hloi. Jơnăr jĭ dêh hlŏh, ich đak ‘nŏh lơ̆m ‘năr 7/8 pơdui truh ‘năr 9/8 ‘nŏh rơmo lôch 2 tŏ. Dang ei lơ rơmo đĭ xa ‘ngiĕt dơ̆ng bơih, mă lei đei 1 pôm rơmo jĭ hơlơ̆k 2 ‘măng lơ̆m dang 3 năr ưh đei xa ‘ngiĕt”.

Hơnơ̆ng thoi noh mơ̆n, ‘ngoăih kơ 4 tŏ rơmo lôch, 22 tŏ rơmo oei đei dơ̆ng kơ unh hnam yă Lê Thị Ánh Hồng, tơ̆ plei Bồng Lai, xăh Hiệp Thạnh, apŭng Đức Trọng (dêh char Lâm Đồng), kŭm hlôi klăih đơ̆ng tơdrong krê lôch răm bơih. 1 kơsô̆ rơmo pơtơm chă xa dơ̆ng. Kiơ̆ yă Hồng, tơdrong tơ̆ hơnăp dang ei ‘nŏh kăl đei trong hrŭ ‘mong, tơgŭm ƀiơ̆ tơdrong hiong răm ăn bơngai rong: “Bu pơm tơlĕch pơgang ‘nŏh athei chĭu pŭ hăm kon pơlei, athei duh ăn rơmo kon pơlei. Dang ei akhan jĭ âu to mă tơpă ưh kơ đei jĭ kiơ ôh? Rơmo hnam nhôn adrol kơ ‘nŏh oei ưh kơmăh ‘ngiĕt vă hiĕm, mă lei đơ̆ng rŏng kơ ƀet pơgang tơtă jĭ pơđĭ. Dang ei oei đei 2-3 tŏ ưh kơ ‘mĕh xa, pơgê ‘nâu athei truyên đak dơ̆ng. Oei dôm tŏ dơ̆ng đĭ hơmet klăih bơih tơtă vă jĭ hơlơ̆k dơ̆ng, mưh đei jĭ dơ̆ng ‘nŏh lôch hloi”.

Jô̆ truh ‘năr 12/8, d/c Lâm Đồng đei 5.350 tŏ rơmo jĭ klak păng 237 tŏ rơmo lôch, akŏm tơ̆ 2 apŭng Đơn Dương păng Đức Trọng. ‘Nâu jĭ kơsô̆ rơmo đei ƀet vaccine NAVET-LPVAC tang găn jĭ pơplei tơ̆ hơkar, đơ̆ng ‘năr 22 - 31/7/2024.

Kiơ̆ ƀok Hoàng Sỹ Bích, Kơdră Anih vei lăng choh jang xa păng atŏk tơiung tơring tơrang dêh char Lâm Đồng, vaccine NAVET-LPVAC tang găn jĭ pơplei tơ̆ hơkar yoa Công ty pơm pơgang thú y Trung ương (NAVETCO) pơm tơlĕch. Tơdrong pơm păng tĕch tơlĕch vaccine âu lăp hăm dôm tơdrong hơgăt ngăl păng pơm kiơ̆ trŏ hăm tơdrong hơgăt đơ̆ng khôi luơ̆t.

Ƀok Hoàng Sỹ Bích ăn tơbăt, mă đơ̆ng blŭng a akhan, tơdrong ƀet vaccine đei ƀơm truh tơdrong pơm tơlĕch jĭ klak ăn rơmo, mă lei athei băt hơdăh yoa kiơ mă đei jĭ păng lôch ‘mơ̆i, tơdrong ‘nâu athei gô anih jang kơpal hơlen năng ‘mơ̆i:

“Kiơ̆ kơsô̆ hơlen năng truh dang ei, đĭ đăng kơsô̆ rơmo iŏk đak toh đei lơ̆m kơsô̆ hlôi ƀet vaccine tang găn jĭ pơlei tơ̆ hơkar, dôm tŏ rơmo ưh đei ƀet ‘nŏh ưh đei jĭ. Mă lei bơ̆n ưh gơ̆h tơchĕng kơdih thoi noh, mă athei đei tơdrong hơlen năng păng athei đei anih jang kơpal chih roi tơbăt hăm hla ar ‘mơ̆i. Nhôn kŭm đei nơ̆r athei bơih vă gơ̆h trŏ ƀlep ‘nŏh athei set hơlen dơ̆ng. Tơdăh yoa đơ̆ng vaccine ‘nŏh nhôn vă athei anih jang hrŭ ‘mong ăn kon pơlei”.

‘Ngăih kơ 2 apŭng Đơn Dương păng Đức Trọng, apŭng Lâm Hà păng plt Bảo Lộc kơ dêh char Lâm Đồng kŭm pơtơm đei rơmo iŏk đak toh jĭ klak đơ̆ng rŏng kơ ƀet vaccine tang găn jĭ pơplei tơ̆ hơkar. Lơ̆m noh, tơ̆ apŭng Lâm Hà đĭ đei 2 tŏ rơmo iŏk đak toh lôch bơih. Dang ei tơdrong jang tang găn jĭ klak ăn rơmo iŏk đak toh tơ̆ dêh char Lâm Đồng oei đei dôm anih jang thú y đơ̆ng Trung ương păng tơring tơ̆lĕch jang tôch ai./.