‘Nhŏng A Rất Vu, oei tơ̆ koeng kơphô̆ A Dinh, thĭ trân Prao, apŭng Đông Giang pơtăm hloh 4ha ‘long keo, gơnơm jang kiơ̆ ƀlep kih thuơ̆t kơna bri ‘long keo ŭnh hnam ‘nhŏng blŭh vơ̆ jing ‘lơ̆ng. Pơyan koh tĕch ‘long sơnăm ou, ‘nhŏng A Rất Vu iŏk đei 100 triu hlak jên. A Rất Vu tơbăt, gơnơm chă pơtăm ‘long, ŭnh hnam mă yak hloh dơnuh hin, hơrih sa sơđơ̆ng. Kiơ̆ kơ ‘nhŏng Vu: pơtăm ‘long keo ưh kơ kăl đei kon jên lơ tơmơ̆t jang ‘măng mă blŭng, lăp pơnam chă vei lăng năng tông ‘noh hoei bơih. ‘Nhŏng A Rất Vu tơbăt, dang ei ŭnh hnam iŏk pơtăm ‘long bri ‘long tih: “Sơ̆ ŭnh hnam nhôn lăp jơmŭl ƀa, sŏng sa kơ kơtĕch sơnăm đĕch, iŏk đơ̆ng pơtăm ‘long keo tơdrong hơrih sa sơđơ̆ng ƀiơ̆. Đơ̆ng mă Teh đak tơlĕch ăn pơtăm ‘long bri, kon pơlei chơt hơ iă jang kiơ̆ hloi. Nhôn vă pơtăm ‘long bri vă hơnhăk đei iŏk yua kơjăp hloh. Kơdră tơring jei lăng ba kơjăp tơgŭm ăn kon pơlei hơdrĕch dơđăh ‘long bri”.

Jei nhen ‘nhŏng A Rất Vu, mŏ A Lăng Thị Trang, Hơdrung Kơ Tu oei tơ̆ tơring Ka Dăng, apŭng Đông Giang pơtăm hloh 6ha ‘long keo. Mŏ A Lăng Thị Trang tơbăt, gơnơm pơtăm ‘long, ŭnh hnam hlôi đei ƀôh. Mă lei, ‘meh vă jang sa đei iŏk yoa jơnoi, mŏ hlôi pơtăm ‘long bri ‘long tih hloh 2ha:“Tơplih pơtăm ‘long bri vă atŏk tơ iung mŭk drăm ŭnh hnam đei ƀôh hloh. Mălei khei năr đei iŏk yua đunh hloh pơtêng hăm pơtăm ‘long keo, iŏk yua lơ hloh kơ pơtăm ‘long keo. Pơtăm ‘long keo đei iŏk yua kơjăp hloh kơ jang jơmul pơtăm ƀa hơƀo, tơ̆ hơnăp ou kơnh gô vă pơtăm ‘long bri hăm hơgăt teh pơtăm să hloh vă ŭnh hnam đei atŏk tơ iung. Tơdrong hơrih sa kơbơ̆n dang ei pôm păi ƀiơ̆ kơ sơ̆."

Khei năr ou ki, Hơnih vei lăng kon pơlei apŭng Đông Giang, dêh char Quảng Nam lăng kơjăp pơih să pơtăm ‘long bri, lăng truh pơih tơmơ̆t jên jang pơjing đei bri ‘lơ̆ng păng tơplih đơ̆ng pơtăm ‘long bri păh ai jing pơtăm ‘long bri ‘long tih. Jô̆ hơtŏ lơ̆m 1 sơnăm, tơring pơprŏ kon jên đơ̆ng 1 ti 500 triu truh 2 ti hlak jên tơgŭm kon pơlei chă jang pơtăm ‘long bri hơnhăk đei iŏk yua kơjăp. Apŭng Đông Giang hlôi tơgŭm kon pơlei pơtăm hloh 500 ha bri ‘long tih hăm lơ kơ loăi ‘long nhen: ‘long dổi xanh, lim xanh, tơgiĕr, ươi, huỳnh đàn…Apŭng Đông Giang hơdrin truh sơnăm 2025 lang să pơtăm ‘long bri ‘long tih hloh 4.500 ha. Ƀok Đỗ Hữu Tùng, Kơ iĕng Kơdră chĕp pơgơ̆r Hơnih vei lăng kon pơlei apŭng Đông Giang tơbăt:“ ‘Nou trong tơlĕch jang tôch trŏ lăp đơ̆ng apŭng adoi nhen kơ dêh char vă pơtrŭt kon pơlei pơtăm ‘long bri pơjing đei bri ‘long roi năr roi tĭh vơ̆ djơ̆ ‘lơ̆ng. Lơ̆m apŭng hlôi chă hơvơn kon pơlei pơtăm mĭnh sơnăm tŏ sĕt hloh 300ha ‘long bri ‘long tih hăm dôm ‘long gáo vàng, ‘long mùng, ‘long tơgiĕr, truh hloi ‘long keo pơm lơ liơ vă đei bri ‘long păng đơ̆ng noh tang găn teh dơ̆k hoch, tang găn ‘mi kial hơbŭt hơbông pơrăm. Đơ̆ng noh kon pơlei vei lăng bri ‘long hrong hloh, atŏk tơ iung mŭk drăm, xut xa pơngot rơvĕt tơjur dơnuh hin. Đơ̆ng rŏng ou tơdrong đei iŏk yoa đơ̆ng pơtăm bri ‘long tih lơ hloh păng hơnhăk ăn kon pơlei jang sa iŏk đei jơnoi. Gô lang să kơtang jơ̆p jang lơ̆m apŭng hloi.”

Tơ̆ rim apŭng groi kông dêh char Quảng Nam đei kơ hrĕng ŭnh hnam kon pơlei Kơ Tu vang chă pơtăm ‘long keo păng hơnhăk đei iŏk yua kơjăp. Quảng Nam hlôi tơlĕch lơ trong jang pơtrŭt kon pơlei pơtăm ‘long bri ‘long tih, tơplih ăn pơtăm ‘long păh ai, mĭnh păh tơgŭm ăn kon pơlei atŏk tơ iung mŭk drăm, jei vang tơgop lơ̆m vei lăng năng tông cham char. Đei băt, dêh char Quảng Nam đei hloh 769.000 ha bri păng teh pơprŏ atŏk tơ iung bri. Rim sơnăm, ‘long bri pơtăm tơgŭm ăn koh tĕch lơ̆m teh đak păng tơ̆ teh đak đe kơ dêh char dang 1 triu 450.000 met khô̆i ‘long, tơgop pơjing đei tơdrong jang, tơgŭm ăn kon pơlei groi kông yak hloh dơnuh hin kơjăp ‘lơ̆ng.