Kơ yuơ đei ƀơm kơnê̆ đơ̆ng tơplih pơyan đơ̆ng pơyan phang năm tơ̆ pơyan ‘mi, tơ̆ apŭng Tu Mrông, tơring pơtăm Sâm gŏk Linh kơ dêh char Kon Tum hlôi ƀôh lơ ‘măng ‘mi prĕr.

Vă veh ver hiong răm đơ̆ng ‘mi prĕr pơrăm nhen sơnăm sơ̆, Kơdră tơring păng hơnih jang vei lăng chŏh jang sa apŭng hlôi pơkă athei bơngai pơtăm Sâm Ngọc Linh kơchăng tang găn hăm ‘mi kial chrĭh chrĕng vă vei lăng năng tông ‘long pơtăm.  Truh dang ei, dêh char Kon Tum hlôi lang să truh 1.700 ha Sâm Ngọc Linh, lơ̆m au kon pơlei pơtăm đei 70ha păng găh să uơ oei ‘nŏh găh hơnih mơdro sa chă pơtăm.Hăm tơdrong kăp gĭt găh pơgang păng tĕch măt, hrei au mĭnh dơnơm hơdrĕch Sâm Ngọc Linh 1 sơnăm chă tĕch đei 300.000 hlak jên.

Lơ̆m 3 khei au ki rim ŭnh hnam dơnuh, vă jê̆ dơnuh lơ̆m apŭng hlôi tŏk iŏk 9 ti hlak jên vă pơtăm Sâm Ngŏk Linh. Lơ̆m sơnăm sơ̆ ‘mi prĕr păng pơrang sơdrông pơrăm kơtang hlôi pơm ăn mơjĭt rơbau dơnơm Sâm Ngŏk Linh kơ kon pơlei dêh char Kon Tum lôch pơm hiong răm kơtang găh mŭk drăm. Vă tơgŭm kon pơlei hơmet pơ ‘lơ̆ng tơdrong răm, kĕ yak hloh tơnap tap, atum hăm jang kiơ̆ pơđunh gre đơ̆ng hơnih mong jên, mĭnh ƀar hơnih mơdro sa jei hlôi tơgŭm djru đĕch ăn kon pơlei hơdrĕch dơđăh vă kon pơlei chă pơtăm dơ̆ng Sâm Ngŏk Linh.