Truh dang ei dêh char Kon Tum hlôi pơtăm đei jê̆ 11.300 hectar 'long pơm pơgang, lơ̆m noh đei tơm sâm Ngọc Linh hloh 2.400 hectar. Đei yua đơ̆ng 'long pơm pơgang hlôi tơgŭm ăn kơ rơbâu unh hnam kon pơlei kon kông tơ̆ dôm apŭng: Tu Mơ Rông, Kon Plông păng Đăk Glei hơtŏk klaih đơ̆ng hin dơnuh, tơgop hơtŏk mŭk drăm – tơpôl tơring hơtaih yaih kơ dêh char.

Dang ei, dêh char Kon Tum tŏk bŏk hơlen, tơlĕch minh ƀar trong jang kăp gĭt tơgŭm kon pơlei gah hơdrĕch, kih thuơ̆t, pơm tơlĕch ... vă pơih să teh pơtăm păng hơtŏk kơjă 'long pơm pơgang. Vă hơtŏk pơtăm lơ 'long pơm pơgang noh athei asong hơdrĕch tơnăp. Lơ̆m kơplah noh, kơjă hơdrĕch sâm Ngọc Linh kăp hloh; 1 găr hơdrĕch đei kơjă pơhlom 100.000 hlj, 1 tơm tơđah 1 sơnăm noh 300.000 hlj. Kơyuơ noh, Kon Tum oei kăl chă hơvơn anih asong jang gah tơdrong jang âu, pơtơm pơjing đei tơring pơtăm 'long pơm pơgang tih să.