Mă lei yua đơ̆ng tam mă pơm tơ ‘ngla đei kơ măy kơmŏk, dang ei anih joăt jang kơ dêh char oei tŏk bŏk mơmat hăm kơmăy kơmŏk ‘nao âu. Truh dang ei vă jê̆ 5 khei răt tôm tơmam kơmăy kơmŏk, tơ̆l nơ̆r apĭnh tơ̆ ‘Măng hop akŏm mă 5, Jơnŭm pơgơ̆r kon pơlei dêh char Kon Tum jăl XII âu ki, ƀok Bùi Thanh Bình.

Kơdră vei lăng Anih jang Khoa hŏk păng Kơmăy kơmŏk dêh char Kon Tum, tơbăt vă vei lăng dôm kơ măy kơ mŏk âu, iŏk đơ̆ng tam mă răt kơmăy kơmŏk Anih jang hlôi kơchăng ăn 4 ‘nu kang ƀô̆ năm hŏk păng dôm kang ƀô̆ âu kŭm băt đei trong jang kơmăy kơmŏk. Mă lei ‘noh đei ƀôh tơdrong ‘nao tam mă băt đĭ. Tơdrong jang răt 2 tŏ kơmăy hơlen lăng ‘lơ̆ng sâm Ngọc Linh yua đơ̆ng Anih jang Khoa hŏk păng Kơmăy kơmŏk dêh char Kon Tum pơm tơ ‘ngla tơmơ̆t jên jang hăm kơmăy kơmŏk hơlen lăng DNA păng hơlen lăng tơmam hoạt chất sinh học Saponin đei akŏp jên tơmơ̆t jang vă jê̆ 12 ti hlak jên, lơ̆m noh hơdrô̆ jên răt kơmăy kơmŏk hloh 8 ti 300 triệu hlak jên.