Năm hŏk lăm pơhrăm, kơ hrĕng bơngai kon kông Xơ đăng tơ̆ dôm xăh, nhen Ngọc Lây, Măng Ri… apŭng Tu Mơ Rông; Mường Hoong, Ngọc Linh apŭng Đăk Glei gô đei pơhrăm găh tơdrong ơng tơđăh, pơtăm, vei lăng truh ăh iŏk yua sâm Ngọc Linh. Kih sư Nguyễn Tài Lương, jang tơ̆ Anih Choh pơtăm păng Vei lăng ‘long pơtăm dêh char Kon Tum ăn tơbăt, atŭm hăm pơkăp pơtăm, vei lăng, kon pơlei adoi đei akŏm tơdrong hlôh vao găh tang găn hơdrông, pơrang xa vă tơm Ngọc Linh tŏk giơ̆ng ‘lơ̆ng hloh. Lơ̆m dôm xơnăm kơ âu, tơdrong pơtăm tơm Sâm Ngọc Linh hlôi tơgŭm lơ unh hnam kon pơlei kon kông Xơ đăng tơ̆ 2 apŭng Tu Mơ Rông, Đăk Glei kơ dêh char Kon Tum klaih đơ̆ng hin dơnuh păng hơtŏk pơm pơdrŏng. Truh dang ei dêh char Kon Tum hlôi hơtŏk đei hloh 1.700ha Sâm Ngọc Linh.