Kiơ̆ kơ ‘nŏh, pơyan pơtăm sơnăm 2023- 2024, dêh char Kon Tum lang să dơ̆ng vă jê̆ 900ha ktao atŏk hơgăt teh pơtăm kơtao kơ dêh char truh 2.100 ha, să hloh dang 130ha pơtêng hăm trong tơlĕch jang.

Hơgăt teh lang să dơ̆ng lơ̆m pơyan kơnh akŏm găh să tơ̆ rim apŭng: Kon Plông, Sa Thầy, Đăk Tô, Kon Rẫy, Đăk Hà păng pơlei tơm Kon Tum.  Khei pơyan sơnăm au dêh char Kon Tum đei hloh 1.200ha ktao akŏm tơ̆ pơlei tơm Kon Tum vă jê̆ 1.000ha, hơgăt teh uơ oei tơ̆ rim apŭng: Đăk Tô, Sa Thầy, Kon Rẫy, Đăk Hà, Ia H’Drai păng Kon Plông. Hrei au, đĭ đăng kơtao kon pơlei Kon Tum pơtăm đei Kŏng ty pơm tơlĕch Sĭk Kon Tum kĭ pơkăp jang hơdoi, tơgŭm djru kon jên jang păng răt iŏk kơtao đơ̆ng kon pơlei. Kơtao tơ̆ Kon Tum lơ̆m 1ha koh iŏk đei truh 73 tân păng lơ tơring gơnơm teh ‘lơ̆ng, vei lăng ƀlep kih thuơ̆t kơna kơtao iŏk đei đơ̆ng 100- 120 tân lơ̆m 1 ha.