Lơ̆m apŭng đei dang 500ha ‘long pơtăm ưh kơ măh đak tơruih, lơ̆m nŏh mă lơ ‘nŏh jĭ ‘long chĕh phe. Dang ei, lơ dơnâu đak lơ̆m apŭng đak hrơ̆ đĭ kơna kon pơlei athei chă đak kơdih, apinh đak đơ̆ng dơnâu băl vă pruih ăn ‘long pơtăm. 

Tơdrong tŏ phang pơđang ưh ê păng ưh kơmăh đak tơruih oei pơm ăn lơ pơgar ‘long chĕh phe tơ̆ apŭng Đăk Hà hla jô; plei ‘nao kơtĕn păng dơng sơdrai kro. Hiong răm dêh hlŏh hăm pơgar chĕh phe ‘nao pơtăm ming truh kơ hrĕng ha đơ̆ng Công ty jang Chĕh phe Đăk Uy păng kon pơlei tơ̆ xăh Hà Mòn.

Kŭm hăm tơlĕch jên vei rong lơ, plei jur tŏ sĕt, ‘măng tŏ phang pơđang ưh ê păng đunh oei pơm tơlĕch tơdrong hiong răm tôch lơ hăm ‘long chĕh phe. Hăm dôm pơgar ‘long oei iĕ, ưh jăng ‘nŏh rơ̆h ‘long răm tôch dêh. Rơ̆h răm, ưh jăng ‘nŏh dôm kơloăi pơrang jĭ phă mât pơm ăn ‘long lôch hloi.