VOV4.Bahnar - Đơ̆ng rŏng 3 sơ năm tơ lĕch jang hơ doi đơ̆ng jang xa, pơm tơ lĕch truh tĕch mơ dro tơ mam đơ̆ng choh jang xa đei kiơ̆ tơ drong tơ chơ̆t 98 đơ̆ng Khul kơ dră tĕh đak găh trong pơ trŭt choh jang xa hơ doi, jang hơ doi mưh pơm tơ lĕch păng tĕch mơ dro tơ mam, Lâm Đồng dar dĕh pơm hơ tŏk đei kơ jă tơ mam lơ̆m 1 pơ gar tĕh choh jang.

Lâm Đồng hơ tŏk đei kơ jă tơ mam lơ̆m 1 hơ găt tĕh pơ tăm

Mă hơ dăh, Lâm Đồng pơ jing păng tơ iung đei 182 trong jang hơ doi, hăm vă jê̆ 16.000 unh hnam rei pơ răm păng 2.445 unh hnam rong kon tơ rong. Dôm trong jang hơ doi âu đei bơ̆ jang tơ̆ 30.200ha ‘long pơ tăm lơ kơ loăi, iŏk đei dang 400 rơ bâu tân plei ‘long; păng kơ pô, rơ mo, nhŭng iĕr đei hlŏh 850.500 tŏk, iŏk đei truh 126.560 tân ‘nhĕm. Kơ jă tơ mam kiơ̆ đơ̆ng jang hơ doi lơ̆m sơ năm 2021 đei 14.378 ti hlak jên, iŏk đei 20% akŏm đĭ đăng kơ jă tơ mam đơ̆ng choh jang xa lơ̆m dêh char. Tơ chĕng adrol truh sơ năm 2023, Lâm Đồng đei 200 trong jang hơ doi găh pơm tơ lĕch păng tĕch mơ dro tơ mam đơ̆ng choh jang xa, hăm 30% tơ mam đơ̆ng choh jang xa tơm gô đei tĕch mơ dro kiơ̆ hla ar kĭ pơ kăp. 

Dơ̆ng: Tơ blơ̆