Kiơ̆ đơ̆ng hơlen năng tơdrong jang vă sir iŏk bô-xít tơ̆ dêh char, Anih vei lăng choh jang xa păng atŏk tơ iung tơring tơrang dêh char Lâm Đồng chih hơdăh đei lơ hơgăt tĕh đei lơ̆m tĕh bri. Mă hơdăh, lơ̆m kơsô̆ hlŏh 21.000 ha tĕh hlôi đei asong hla ar hơlen năng, sir iŏk bô-xít tơ̆ dôm apŭng Bảo Lâm, Di Linh păng plt Bảo Lộc ‘nŏh đei hlŏh 4.900ha bri ‘long pơtăm păng 11ha bri ‘long tang găn sar bar.

Tơdrong jô̆ hơlen bri ăn ƀôh, tơring hlôi đei asong hla ar dăr hơlen sir iŏk bô-xít ƀơm truh tơ̆ 4.458ha bri (lơ̆m nŏh đei 2.397ha bri brăh). Atŭm hăm ‘nŏh, đei hlom tơ̆ hơgăt tĕh kơ 12 anih tĕch mơdro thuê tĕh, thuê bri vă tơlĕch lơ tơdrong jang xa. Yoa thoi nŏh, Anih vei lăng choh jang xa păng atŏk tơ iung tơring tơrang Lâm Đồng athei Anih vei lăng jang kơmăy, tĕch mơdro păng dôm anih jang đei ƀơm truh athei Anih vei lăng kon pơlei dêh char Lâm Đồng set hơlen, chĕng hơmet ming trong jang sir iŏk bô-xít tơ̆ tơring mă lăp.