Đơ̆ng rŏng Hơnih vei lăng kon pơlei dêh char Lâm Đồng kĭ tơchơ̆t ăn jang pơlong năng tơ iung pơjing hơnih jang tơmang pơhiơ̆ choh jang sa lơ̆m dêh char ƀơ̆t sơnăm 2015, truh sơnăm 2018, Hơnih jang tơmang pơhiơ̆ dêh char Lâm Đồng hlôi iung jang hơdoi hăm rim hơnih bơ̆ jang ƀơm truh iung jang dăr lăng hơlen păng drơ̆ng nơ̆r 33 hơnih tơmang pơhiơ̆ choh jang sa. Đơ̆ng noh tơdrong tơmang pơhiơ̆ choh jang sa tơ̆ dêh char Lâm Đồng roi năr roi atŏk kơtang, hơvơn đei 7 triu ‘nu tơmoi năm tơmang lăng, hơnhăk đei iŏk yua kơ jăp ăn kon pơlei choh jang sa.

Mă lei, kơ yuơ kơtôih hê̆ lơ trong găn ga đơ̆ng rim tơdrong tơchơ̆t kơ khôi luơ̆t, adoi nhen tim mă đei nơ̆r pơtho tơbăt hơdăh đơ̆ng rim Hơnih jang tơm, hơnih jang Trung ương đei ƀơm truh pơm ăn truh tơdrong atŏk tơ iung tơmang pơhiơ̆ choh jang sa tơ̆ dêh char Lâm Đồng tơƀơ̆p tôch mơmat tat. Mă kăl rim tơdrong tơchơ̆t găh trong pơkăp jang tơ iung pơjing lơm hơgăt teh choh jang sa, tơplih iŏk yua teh choh jang sa jing teh jang tơdrong anai, pơprŏ iŏk yua teh, tơdrong tơ iung pơjing đei pơbŭng pĕng v.v… Kiơ̆ đơ̆ng yă Lê Thị Quỳnh Như, Mir pơgar să Cún tơ̆ phương 7, pơlei tơm Đà Lạt, dôm tơdrong ưh kơ trŏ lăp ou pơm ăn truh tơdrong atŏk tơ iung tơmang pơhiơ̆ choh jang sa tơ̆ tơring nhen lĕ huŏng lơ̆m tơhlăk tơhlĭn hloi.“Mir pơgar să đei kon tơrong chă rong, adoi đei ‘nhot plei ‘long kăl kơ Đà Lạt nhen pơmur tây, pro preng, ‘nhot sa ... jei đei lơ tơmoi năm tơmang lăng, vang pơhrăm jang kiơ̆. Mă lei, kăl đei cham ăn gre dơ̆ng hơtăih hơ mir pơgar choh jang sa, hơnih pơdă tơmam drăm, hơnih sơng tơmoi, hơnih hnam chă pơyơ̆ng, hơnih tĕch răt đak nhă v.v…dôm hơnih ou kăl kơ đei vă sơng tơmoi mă lei mưh tơ iung pơjing ming man ‘noh tơhlăk hê̆ lơ̆m pơm glăi lơ̆m sơđơ̆ng ming man”.

Iung pơma pơtôch hop akŏm, ƀok Phạm S, Kơ iĕng Kơdră chĕp pơgơ̆r Hơnih vei lăng kon pơlei dêh char Lâm Đồng sơkơ̆t hơdăh, tơdrong hơmŏ atŏk tơ iung tơmang pơhiơ̆ choh jang sa kơ dêh char ‘noh tôch kơ tih tên mă lei lơ̆m tơlĕch jang kiơ̆ hlôi tơhlăk hê̆ lơ trong găn ga, lơ̆m ou tơnap tap hloh ‘noh tơhlăk lơ̆m rim Khôi luơ̆t Tơmang pơhiơ̆, Khôi luơ̆t Groi teh păng Khôi luơ̆t tơ iung pơjing Ming man. Vă pơtrŭt kơtang tơmang pơhiơ̆ choh jang sa atŏk tơ iung kơtang, lơ̆m khei năr ou kơnh, dêh char tŏk bŏk pơrô̆ athei rim hơnih bơ̆ jang tơ iung pơjing trong jang iŏk yua teh gơ̆h jang lơ tơdrong ăn tơmang pơhiơ̆ choh jang sa atŭm hăm rim tơdrong tơchơ̆t hơdăh vă pơtruh ăn kơdră kơpal hơlen kĭ tơchơ̆t. Tơdrong ou iung jang kiơ̆ Khôi luơ̆t Groi teh sơnăm 2024 păng rim hla bơar tơchơ̆t hơdăh jang kiơ̆ đei ƀơm truh. Ƀok Phạm S, tơbăt:“Dôm tơdrong vă jang tơmang pơhiơ̆ choh jang sa đei teh tơ iung pơjing ming man dăh mă ‘noh mĭnh tơdrong jang hơdrô̆ lei athei tơ iung pơjing kiơ̆ nhen mĭnh tơdrong vă jang tơmơ̆t jên jang păng pơtruh ăn Hơnih pơprŏ tơdrong jang păng Tơmơ̆t jên jang dêh char hơlen kĭ tơchơ̆t kiơ̆ ƀlep pơkăp. Mă ƀar ‘noh teh choh jang sa mă bơ̆n iŏk yua tơlĕch jang lơ tơdrong kơ ŭnh hnam lei pơtruh ăn hloi Hơnih vei lăng Mŭk drăm bri brăh păng Cham char, Hơnih vei lăng kon pơlei apŭng kĭ tơchơ̆t. Hăm teh jang sa gơ̆h iok yua lơ tơdrong kơ yuơ hơnih jang lei jei pơjing rim trong vă jang đơ̆ng noh pơtruh ăn Hơnih vei lăng Mŭk drăm bri brăh păng Cham char dêh char hơlen, pơtruh ăn hơnih kơpal kĭ tơchơ̆t. Ƀar tơdrong ou phara dih băl, mĭnh ‘noh tơdrong vă jang đei tơplih ming tơ iung pơjing ming man, mă mĭnh ‘noh teh gơ̆h iok yua lơ tơdrong kơna ming man hơnih oei gơ̆h chă yuih, chă pơlăp, ưh kơ ming man kơjăp ‘lơ̆ng kơ yuơ hơgăt teh ou ‘noh jĭ teh choh jang sa”.

Ƀok Phạm S pơjao ăn rim hơnih bơ̆ jang dêh char, tơring đei ƀơm truh, hơnơ̆ng dăr lăng rim hơnih jang tơmang pơhiơ̆ choh jang sa hlôi đei drơ̆ng nơ̆r, pơtho tơbăt ăn rim hơnih jang pơm hơmet dơ̆ng, pơm pơkeh dơ̆ng rim tơdrong pơkăp vă chă athei dăr lăng păng drơ̆ng nơ̆r jing hơnih tơmang pơhiơ̆ choh jang sa; chih akŏm dôm nơ̆r tơgop, nơ̆r apĭnh athei đơ̆ng bơngai tăh hla vă tơmơ̆t dơ̆ng, pơm pơkeh rim tơdrong, trong pơkăp păng chih tơroi tơbăt ăn Hơnih vei lăng kon pơlei dêh char lăng hơlen, tơmơ̆t dơ̆ng, hơmet ming rim tơdrong pơkăp mă trŏ ƀlep hăm dôm tơdrong yan ou, vă hơnơ̆ng iung jang ‘lơ̆ng dôm tơdrong đei, tơdrong gơ̆h jang, atŏk tơ iung tơmang pơhiơ̆ choh jang sa kiơ̆ ƀlep trong tơlĕch ăn.