Unh hnam ƀok Phan Văn Xuân tơ̆ kueng 2, xah Phú Lễ, apŭng Ba Tri adoi nhen lơ kon pơlei jang mir nai tơ̆ tơring âu pă đei lăp hăm tơdrong jang rong rơmo iŏk ‘nhĕm. Kơlih 2 sơnăm kơ âu, kơjă rơmo xa ‘nhĕm, rơmo yŏng adoi tơjur dêh hnang, bơngai rong rơmo ưh đei yua lơ. Ƀok Xuân tơroi: "Rong rơmo noh truh 1 minh sơnăm minh puơ̆t pơtơm kon đei rơmo hơkăn noh tĕch đei 15 trĭu hlj, cheh đei 5 trĭu hlj tam mă jô̆ đak pơ-uh rong, pơrang âu dơ̆ng. Oei minh pôm rơmo tơno noh đei cheh 3 trĭu hlj mă rong đơ̆ng 13-15 khei. ‘Nhĕt noh unh hnam pơtăm kơdih, mưh ưh noh athei kla teh đe vă pơtăm. Khei năr sơ̆, inh rong 4 tŏ rơmo yŏng, rim sơnăm kon đei 8 tŏ rơmo kon, dang ei oei pă 1 pôm, rong pă kĕ bơih, ưh đei xa noh ưh kơ rong bơih".

Oei ƀok Nguyễn Văn Tân, oei tơ̆ xah Phú Lễ ăn tơbăt, hlôi pơdơh kơ jang, pă đei rong rơmo bơih kơlih ưh đei yua gah mŭk drăm: "Rơmo ưh đei kơjă măt, kon pơlei tơ̆ âu rong noh ưh đei xa, kơjă rơmo ưh đei sơđơ̆ng. Dang ei lơ kon pơlei păi lê̆ hơdrong var  kơlih rong rơmo ‘măn xa ‘nhĕm noh lôh truh kơ 5 trĭu hlj. Rim sơnăm rơmo xa ‘nhĕm đei kơjă 40 trĭu hlj minh pôm, dang ei oei pă 30 trĭu hlj minh pôm. Đơ̆k pơlah, tơmam xa noh ưh đei tơjur, tơ̆ 10 unh hnam dang ei oei pă 3-4 unh hnam đĕch rong rơmo".

Rong rơmo iŏk ‘nhĕm, rơmo yŏng noh jing tơdrong jang mŭk drăm tơm kơ kon pơlei xah Phú Lễ hăm kơsô̆ rơmo hloh 5.800 tŏ, lơ hloh noh apŭng Ba Tri. Chŏng mă khei năr tơjê̆ âu, lơ unh hnam pơdơh, pă đei rong bơih, tơplih jang tơdrong jang nai vă chă xa, ưh đei tơguăt hăm tơdrong rong rơmo bơih. Ƀok Hạ Văn Chức, Phŏ Kơdră Anih jang vei lăng kon pơlei xah Phú Lễ tơroi: "Ƀar sơnăm tơjê̆ âu, khul rơmo tơ̆ xah Phú Lễ tơjur hơdah, kơlih kơjă tơmam xa kăp dêh hnang, mă tĕch tơlĕch noh hăm kơjă kơđeh noh kon pơlei pă đei rong lơ nhen hơdrol ki bơih, mă rơih hơdrĕch kon yŏng ‘lơ̆ng đĕch vă chă rong. Dang ei, tơring adoi chă tơroi hơvơn kon pơlei nĕ chă tĕch hăt hot ôh mă athei vei hăm trong pơjing tơmam xa ăn rơmo tơ̆ tơring, păng tơmam xa dơnơm kơ unh hnam vă sơđơ̆ng tơdrong jang ning nai kơnh, sơđơ̆ng khul rơmo oei đei".

Kiơ̆ tơdrong hơlen chih akŏm đơ̆ng Anih jang vei lăng kon pơlei apŭng Ba Tri, kơsô̆ rơmo tơ̆ tơring dang ei đei jê̆ 97.000 tŏ akŏm lơ tơ̆ dôm xah An Đức, Phú Lễ, An Bình Tây, An Hiệp, Tân Xuân... đei jê̆ 2/3 khul rơmo kơ jơ̆p dêh char. Lơ̆m khei năr âu, kơjă rơmo iŏk ‘nhĕm pơhlom 17 trĭu hlj 1 tă; rơmo yŏng đơ̆ng 14 -16.500 hlj 1 pôm. Đơ̆ng sơnăm 2016, Anih jang Vei lăng gah kơ̆l ‘ngok hơgei hlôi asong hla bar pơkăp hơnăn tơmam drăm “Rơmo Ba Tri”. ‘Nguaih kơ tơdrong tơgar gah kơjă hăm rơmo răt đơ̆ng teh đak đe, khul rơmo tơ̆ tơring khei năr âu adoi ƀơm pơrang, mă hăt noh pơrang đuh hơkar, bơngai rong athei huach thêm jên vă hơmet pơrang jĭ, noh ưh đei yua. Jơnŭm pơgơ̆r tơring, rim anih jang kơpal đei tơrĕk tơ̆ tơring hlôi chă tơgŭm kon pơlei hơtŏk rong rơmo kiơ̆ pơkăp ‘lơ̆ng mă lei tĕch tơlĕch noh tam mă đei trong tơgŭm. Ƀok Dương Minh Tùng, Kơdră Anih jang vei lăng kon pơlei apŭng Ba Tri ăn tơbăt: “Kơjă rơmo tĕch tơlĕch kiơ̆ lơ̆m tơring đĕch, ba ưh gơh chă pơkăp tơdrong âu noh chiu chăi đĕch bơih. Apŭng adoi jang tôm tơdrong bơih, pơkăp hơnăn Rơmo Ba Tri adoi đei bơih, ba adoi tơbang dôm tơmam drăm xa đei pơm đơ̆ng ‘nhĕm rơmo Ba Tri. Rim ‘măng hŏk hôp dêh char adoi pơtruh nơ̆r... Ba hơvơn ming man đei kơchơ tơm gah tơmam choh pơtăm, kon tơrong, đei teh mă lei đei 2-3 anih asong jang truh tơchă hơlen lăng, mă lei adoi tam mă đei pơm hla bar asong jang, noh tơnap tơpă".

Ba Tri jing tơring tơter đak dơsĭ, ƀơm răm lơ đơ̆ng tŏ ‘mi kial tơplih, tơdrong hơrih kon pơlei oei ƀơm tơnap tap. Tơdrong hơtŏk mŭk drăm, trong jang hơdrô̆ noh hơtŏk rong rơmo iŏk xa ‘nhĕm kơ kon pơlei tơ̆ âu vă pơjing trong jang xa ăn kon pơlei jing tơdrong kăl hloh mă jơnŭm pơgơ̆r tơring păng anih jang kơpal tơ̆ tơring athei tơlĕch jang đei jơnei tơnăp hloh.