Ƀok Hà Văn Mừng (thôn Lũng Vân, xăh Ia Lâu, apŭng Chư Prông) ‘nao koh phă lê̆ tong anê̆ pơgar tơm điu 3ha. Lơ xơnăm tơguăt hăm hơdrĕch ‘long pơtăm trŏ hăm tơring teh phui phang tơnang kŏ âu, ƀok Mừng ưh kơ pơ̆n koh hŭt lê̆, mă lei lơ̆m 3 xơnăm kơ âu, kơjă găr điu tơjur jê̆ tong anê̆, plei oei pă 30% noh unh hnam ưh kĕ vei jang ôh. Tơ̆ anăp noh ƀok kơchĕng gô rei pơtăm ƀa tơ̆ hơgăt teh pơtăm tơm điu ‘nao koh lê̆ vă vei xơđơ̆ng ăn tơdrong hơrih unh hnam: “Dôm xơnăm adrol ki, 3ha noh đei yua 200 trĭu hlj. Mă lei đơ̆ng mă 3 xơnăm kơ âu ưh đei yua găh plei, kơjă noh tŏk jur ưh đei xơđơ̆ng. Dơnâu đak Plei Pai đei đak ‘măn ruih ăn 500 ha noh inh chôk bơ̆t đei, đei yua 8 tâ̆n ƀa lơ̆m 1 ha”.

        Tơdrong koh hŭt lê̆ tơm điu tŏk bŏk oei ƀôh lơ tơ̆ jâ̆p tơring kơ dôm xăh xơlam teh Ia Lâu, Ia Ga, Ia Piơr, apŭng Chư Prông, dêh char Gia Lai. Găh xăh Ia Piơr, đơ̆ng jê̆ đĭ xơnăm 2022 truh dang ei, hlôi đei 300ha hlôi ƀơm koh phă vă tơplih pơtăm hơdrĕch ‘long tŏ xĕt năr, mă tơm noh ƀa, hơƀo, ƀum ƀlang... Ƀok Bùi Văn Tiến – Kơdră Anih vei lăng kon pơlei xăh Ia Piơr ăn tơbăt, dang ei, tơring tam mă đei xơkơ̆t hơdăh păng tơgŭm jang tơnăp ăn kon pơlei lơ̆m tơplih hơdrĕch ‘long pơtăm. Tơdrong pơtăm ‘long tŏ xĕt năr lơ̆ng teh pơtăm tơm điu adrô̆ jing trong jang tơdăng đĕch: “Tơdrong tơchơ̆t đơ̆ng xăh noh hơvơn, tơroi tơbăt ăn kon pơlei, hơgăt teh mă jang đei yua noh iŏk jang vă hoai kơ koh lê̆ hơdrĕch ‘long pơtăm. Dôm hơgăt mă yơ teh tơmăn, pơchoh gơh noh pơtăm ƀum ƀlang, hơƀo... dang hơdrĕch tŏ xĕt năr. Oei hơgăt mă yơ vei xơđơ̆ng măh đak noh pơtăm ‘long xa ple”.

Tơdrong mă koh – pơtăm, pơtăm – koh ƀơ̆t đei tơdrong tơplih găh kơjă hăm tơmam choh pơtăm hlôi đei ƀôh hăm tơmam pơtăm dơnơm tơ̆ Gia Lai nhen kơsu, tiu, kaphê... dang ei đei ƀôh dơ̆ng hăm tơm điu. Tơdrong mă âu minh ‘măng dơ̆ng pơkăl anih jang găh choh pơtăm kăl chĕp vei xơnong xơkơ̆t lơ̆m tơplih hơdrĕch ‘long pơtăm păng pơjing tơdrong jang đei kơjă kăp găh choh pơtăm kơjăp xơđơ̆ng tơ̆ tơring.