Đơ̆ng rŏng rim ‘măng ‘mi khei 7, lơ kang ƀô̆ bơngai jang Pơgar bri teh đak Yok Đôn iŏk yua gre chơ kơ hrĕng dơđăh ‘long Krăk Hơmrĕ đơ̆ng pơgar ơng năm tơ̆ Bro bri 526 vă pơtăm. Ƀok Nguyễn Trung Hiếu, Kơ iĕng Kơdră Hơnih jang Khoa hŏk păng Jang hơdoi apŭng plĕnh teh kơ Pơgar teh đak Yok Đôn tơbăt, 100 % đei ơng đơ̆ng găr chă dônh đơ̆ng rim dơnơm ‘long tih lơ̆m bri.

Trong jang chă tơchĕng hơlen, ơng đei iung jang đơ̆ng vă jê̆ 2 sơnăm hơdrol, truh dang ei, hlôi ơng păng pơtăm đei hloh 1.000 dơnơm ‘long bri. Ƀok Nguyễn Trung Hiếu tơroi tơbăt lơ̆m khei năr ơng păng pơtăm ‘long Krăk hơmrĕ tơ̆ Pơgar bri teh đak Yok Đôn khei năr au ki.“Mă blŭng bơ̆n năm dăr lăng rim groi teh bri đei dơnơm ‘long Krăk, đơ̆ng noh chă hơlen, chă jô̆ lăng hăp đei dôm yơ, đơ̆ng noh vat tơring đei ‘long krăk. Đơ̆ng rŏng ‘noh hơlen hơdăh ‘long Krăk au lơ̆m bri kơdrơ̆ng kơ Pơgar bri teh đak Yok Đôn. Nhôn tôch hơ iă hlôi tơgop lơ̆m vei lăng năng tông đei hơdrĕch ‘long hui kơ đei ‘long Krăk ăn Pơgar bri teh đak Yok Đôn.” 

‘Long Krăk hơmrĕ ‘noh dơnơm tih, kơjung truh 25 met, tih tơbŭl truh 1 met. Tơ̆ Đăk Lăk, ‘long chăt lơ lơ̆m Pơgar bri Teh đak York Đôn, Bro bri vei lăng năng tông bri brăh Ea Sô… ‘Long Krăk hơmrĕ hơrăk, ‘lơ̆ng, jĭ ‘long gĭt kăl hloh lơ̆m tơdrong pơm tơlĕch kơƀang tang dŏ. Lơ sơnăm au ki, kơ yuơ tơdrong chă koh lơ dêh hnang pơm ăn ‘long au roi năr roi pă gan đei.

Ƀok Nguyễn Hữu Tạo - Kơ iĕng Kơdră chĕp pơgơ̆r Hơnih vei lăng bri kơ Pơgar bri Teh đak Yok Đôn tơbăt, dang ei Pơgar bri Teh đak Yok Đôn oei dang 200 dơnơm ‘long Krăk hơmrĕtih, tơdăh ưh kơ tom chă ơng, pơtăm lei tơdrong hơmơt pă đei ‘long krăk lơ̆m bri au ưh kơ jor ôh. Kiơ̆ đơ̆ng ƀok Tạo, tơdrong chă tơchĕng hơlen, ơng pơtăm dơ̆ng kơ loăi ‘long kơ loăi IIA au tơgop lơ̆m vei lăng năng tông ‘long git kăl, tơgop atŏk tơ iung bri kơjăp ‘lơ̆ng, adoi nhen vei kơjăp đei lơ ‘long bri brăh. Ƀok Nguyễn Hữu Tạo pơma:“Hơnih au hlôi tơlĕch trong jang chă tơchĕng hơlen khoa hŏk vă vei lăng năng tông atŏk tơ iung ‘long Krăk. Dang ei hlôi ơng dơđăh păng tŏk bŏk dăr lăng rim groi teh vă chă pơtăm păng gô vă chă ƀơk dơđăh ăn kon pơlei lơ̆m tơring vang pơtăm. Tơdrong atŏk tơ iung ‘long Krăk gô tơgop lơ̆m atŏk tơ iung mŭk drăm ăn kon pơlei.”

Pơgar bri teh đak Yok Đôn (Đak Lăk) đei hơgăt teh bri să mă 2 lơ̆m teh đak, hăm hloh 115.000 ha. Bri ‘long tơ̆ au đei rim kơ loăi ‘long bri jing ‘lơ̆ng prăt sơnăm păng bri kơdrơ̆ng hơlŭng hla kiơ̆ pơyan. Kiơ̆ trong pơprŏ vă jang, lơ̆m pơyan ‘mi sơnăm 2023 au, Pơgar bri Teh đak Yok Đôn gô atŏk kơtang chă ơng păng tơgŭm djru hloh 3.000 dơnơm dơđăh ‘long Krăk hơmrĕ ăn kon pơlei kon kông lơ̆m tơring chă pơtăm păng atŏk tơ iung bri ‘long tơ̆ rim hơgăt teh tăp dăr pơgar bri teh đak au.