Tơmam choh pơtăm đei jing tơmam dơnơm tĕch ăn teh đak đe kơ dêh char Gia Lai, hăm kơjă đei yua 500 rơtuh USD rim xơnăm păng tŏk bŏk oei hơtŏk pran. Tơdrong mă âu kĕ đei noh gơnơm lơ xơnăm kơ âu, dêh char hlôi tơrĕk pơjing, pơih xă dôm tơring choh pơtăm kiơ̆ dôm pơkăp hlôi đei tơchơ̆t. Kiơ̆ tơroi đơ̆ng Anih Choh jang xa păng Hơtŏk tơring pơxĕl dêh char Gia Lai, dang ei hơgăt teh rei pơtăm lơ̆m jâ̆p dêh char đei 557.700ha. Lơ̆m noh, đei 230.000 ha, hơtŏ hăm 41% hơgăt teh, đei choh pơtăm kiơ̆ pơkăp nhen VietGAP, GlobalGAP, 4C, Organic, Rainforest Alliance… Atŭm hăm noh, dang ei Gia Lai adoi hlôi đei xơkơ̆t 55 kơsô̆ pơkăp tơring pơtăm 'long xa plei, vei xơđơ̆ng pơkăp tĕch tơmam dơnơm ăn teh đak đe.

Ƀok Lưu Trung Nghĩa – Kơdră Anih Choh jang xa păng Hơtŏk tơring pơxĕl Gia Lai ăn tơbăt, minh ƀar tơmam drăm nhen ka phê, chăn hroi kơ dêh char hlôi đei tĕch ăn dôm tơring grŏng tơnap nhen Nhâ̆t, EU. Kiơ̆ tơlĕch jang, jăl xơnăm 2022 - 2025, dêh char gô hơtŏk hơgăt 'long pơtăm kiơ̆ tơdrong pơkăp đei pơhlom 5 rơbâu ha minh xơnăm, hơtŏk pơ 'lơ̆ng tơmam choh pơtăm tơmam drăm 'măn tĕch ăn teh đak đe vă hơtŏk iŏk yua ăn kon pơlei jang mir: “Tơmam choh pơtăm kơ dêh char roi năr roi tơbang đei tơdrong pran găh 'lơ̆ng păng pơm trŏ tơdrong kăl kơ tơring tĕch răt lơ̆m dôm teh đak. Đơ̆ng rŏng kơ pơrang jĭ, dêh char hlôi hơmet đei tơmam drăm tĕch ăn teh đak đe. Tơdrong tĕch tơlĕch tơmam ăn teh đak đe đơ̆ng dôm anih jang mŭk drăm hlôi pơm kiơ̆ ƀlep tơdrong pơkăl. Lơ̆m khei năr âu ki, ưh kơ đei kơloăi tơmam choh pơtăm ăh yơ athei dŏng pơklaih. Mă kăl đei dôm anih jang mŭk drăm nhen Hoàng Anh Gia Lai, Hương Sơn, Doveco, Quiconac… hlôi pơjing đei lơ tơmam drăm tĕch ăn teh đak đe đei jơnei keh kong”

Mưh Gia Lai tŏk bŏk oei tơrĕk pơih xă dôm tơring pơtăm tơmam drăm kiơ̆ pơkăp tơlĕch noh tơ̆ Tây Bắc, Sơn La tŏk bŏk oei akŏm axong jang kiơ̆ tĕch pơdro logistics vă pơklaih ăn ƀai toăn chă tĕch tơmam choh pơtăm kơ tơring. Sơn La dang ei đei 55 anih jang mŭk drăm pơm jang kiơ̆ pơkăp logistics mă lei jang iĕ đĕch, trong pơm jang adoi ƀônh hiôk đĕch. Lơ̆m tơdrong jang chơ pơdŭ tơmam drăm, dêh char tŏk bŏk oei đei 2 trong pơm jang noh chơ hăm gre kiơ̆ trong teh păng chơ hăm duk kiơ̆ trong đak.

Kơƀah pơkăp logistics, adoi pơm ăn tơdrong tĕch tơlĕch 'nhot, ƀum, plei 'long kơ dêh char Sơn La ƀơm lơ tơnap tap. Bơngai pơtăm adoi hrat kiơ̆ pơyan păng đe pơdro pơđep kơjă. Atŭm hăm noh jing ưh kơ măh anih pơm tơlĕch 'nŭng tơmam drăm, vei lăng, chơ pơdŭ, bơngai jang... Ƀok Nguyễn Khắc Hào, Kơdră Anih Choh pơtăm păng Hơtŏk tơring pơxĕl apŭng Mai Sơn, dêh char Sơn La ăn tơbăt: Apŭng đei 11.000 ha 'long xa plei, hăm tơdrong pơyua rim xơnăm đei 70.000 tâ̆n. Tơdrong iŏk yua plei hơnơ̆ng akŏm lơ̆m khei năr tơm, tŏ xĕt năr, noh tơdrong vei lăng jing kăl hloh. Mă lei, dôm anih jang đei kơtuh hơngeo lơ̆m tơring dang ei đei axong tŏ xĕt đĕch, mă lơ noh tơ̆ dôm unh hnam, hơp tak xăh, tơmam đei vei lăng ưh đei lơ:  Apŭng hlôi đei pơtruh nơ̆r hăm dêh char, 'meh vă lơ̆m khei năr truh lơ̆m tơring kơ apŭng gô pơjing đei minh anih jang logistics, pơm trong hiôk ăn unh hnam kon pơlei Mai Sơn păng dôm apŭng tơjê̆ lơ̆m tơdrong pơm tơlĕch, vei lăng păng tĕch tơlĕch tơmam drăm gơh ƀônh ƀŏ hloh.

Sơn La đei 856 anih jang mŭk drăm, hơp tak xăh, unh hnam jang chơ pơdŭ tơmam drăm, mă lei lơ noh jang iĕ păng răh rap đĕch, đei 6 anih jang klăh, anih jang mŭk drăm ƀưu chĭn, pơtruh tơmam drăm. Lơ̆m jâ̆p dêh char pơtơm đei pơhlom 30 anih kơtuh hơngei, kĕ vei hơla 250 m³ minh anih; 2.500 anih jang hơna pơhrăng plei 'long iĕ răh rap, hăm 60.000 tâ̆n plei 'long lơ̆m minh pơyan jang (mă lơ noh plei jrang); 12 container hơngeo, tam mă đei anih pơm tơlĕch dôm tơmam drăm 'măn pơkăp, 'nŭng kơdŭng vă tĕch ăn teh đak đe.

Dôm tơdrong tơjruh păng tơnap tap kơ pơkăp jang logistics lơ̆m choh pơtăm hlôi pơm tơhlăk ăn tơdrong tĕch tơlĕch tơmam choh pơtăm. Kiơ̆ dôm bơngai juăt jang, Sơn La kăl pơm kiơ̆ lơ trong jang vă tơjur huach lơ jên logistics, tơlĕch dôm pơkăp vă hơvơn axong ming man anih jang logistics. Ƀok Trần Thanh Hải, Phŏ Kơdră Anih jang Tĕch răt tơmam drăm hăm teh đak đe, lơ̆m Anih tơm Kŏng thương akhan: Dang ei, ming man trong nơnăm tơroh dôm tơring hăm dih băl tơ̆ dêh char Sơn La oei kơƀah, tam mă đei tơroh hăm trong đak dơxĭ, trong đak krong, chơ hăm gre păr. Kơyuơ noh, tơdrong axong ming man trong tih Hòa Bình - Mộc Châu duh nhen pơih xă jăl trong lơ̆m tơring kơdrâ̆m noh kăl hloh vă tơroh rim tơring hăm dih băl. Atŭm hăm noh, hăm tơmam choh pơtăm kăp gĭt kăl vei lăng, noh Sơn La kăl đei trong pơm jang, pơkăp hơvơn anih axong ming man pơjing dôm anih đei kơtuh hơngei, rơngơp păng Anih pơm tơlĕch tơmam drăm xa đơ̆ng tơmam choh pơtăm đei.

Yă Phạm Thị Doan, Kơdră Anih Kŏng thương dêh char Sơn La ăn tơbăt, vă hơtŏk choh jang xa kơjăp xơđơ̆ng, dêh char Sơn La xơkơ̆t logistics jing minh tơdrong kăp gĭt hloh lơ̆m tơdrong hơtŏk pran tĕch tơlĕch tơmam drăm choh pơtăm:  Anih jang Kŏng thương gô atŭm hăm dôm anih jang tơgŭm ăn dêh char lơ̆m pơkăp dôm tơdrong ming man găh hơtŏk logistics găh trong nơnăm, anih 'măn tơmam drăm, mă hăt noh găh tơdrong akŏm bơngai jang lơ̆m logistics, pơkăp hơvơn axong jang găh tơdrong jang âu.   

Atŭm hăm tơdrong tơlĕch jang hrơ̆p minh 'măng dôm trong tơlĕch jang đơ̆ng dôm jăl pơgơ̆r jang, rim anih jang, rim anih jang mŭk drăm, hơp tak xăh, kon pơlei jang mir Sơn La duh kăl tơplih đon kơchĕng, hơtŏk pơ 'lơ̆ng tơmam drăm, tơplih pơm jang kiơ̆ pơkăp, hơtŏk kơjă tơmam drăm, hơtŏk tơdrong tơgar tĕch tơlĕch ăn tơmam choh pơtăm Sơn La.