Tơring Giao Phú jing minh lơ̆m dôm tơring tơnap tap hloh kơ apŭng Bảo Thắng, dêh char Lào Cai. Nhen dôm unh hnam nai lơ̆m tơring, adrol ki hơgăt teh choh jang kơ unh hnam pơmai Phạm Thị Yên bơngai hơdrung Tày đei tŏ xĕt đĕch. ‘Nguaih kơ hơgăt teh jang ƀa măh xŏng xa noh hơdrĕch ‘long pơtăm nai lơ̆m pơgar adrô̆ đei yua tŏ xĕt đĕch hơmoh chă răt âu to. Đunh kơ âu 4 xơnăm, bre klo hơkăn pơmai Yên đei apŭng asong năm hŏk lăm choh jang sa kiơ̆ trong pơkăp jang ‘nao.

Đei teh đak asong tŏk iŏk jên tơgŭm 200 trĭu hlj hơkŏp hăm jên kơ unh hnam, pơmai Yên khĭn chă pơtăm ‘nhot păng tơpŭng iĕ lơ̆m hnam kơmang păng hnam hơnhuăl truh kơ 1 hectar 7 sao. Truh dang ei, tơdrong pơyua hơ ‘nhăk ăn jing tơdrong hơpơi ‘meh đơ̆ng lơ bơngai. Pơmai Phạm Thị Yên ăn tơbăt: “Đơ̆ng pơtơm pơm jang kiơ̆ trong pơkăp ‘nao âu, ‘noh jang tŏ sĕt, vei sơđơ̆ng rơgoh tơmam drăm, ăh ba tĕch tơlĕch lơ̆m tơring păng hơtŏk iŏk yua ăn unh hnam lơ hloh”

Tơpă ăn ƀôh, dang ei tơ̆ lơ tơring đei kon pơlei kon kông erih pơm jang lơ̆m jâ̆p teh đak, hlôi đei lơ um rŭp choh jang sa kiơ̆ trong ‘nao hăm dôm trong jang phara băl, hơ-‘nhăk pơyua lơ ăn bơngai jang păng ‘lơ̆ng hăm bơngai răt yua. Mưh nhen đunh kơ âu 3 sơnăm, ‘nhŏng Ya Thuyên, tơring Đa Quyn, apŭng Đức Trọng, dêh char Lâm Đồng tam mă băt chă pơtăm ‘nhot pơjing tơmam sa yua, mă lei gơnơm đei năm pơhrrăm găh khua hŏk kih thuơ̆t, ‘nhŏng hlôi khĭn asong hloh 100 trĭu hlj vă pơtăm 3 sao minh pươ̆t pro preng kiơ̆ trong jang ‘nao. Đơ̆ng noh, đei yua găh mŭk drăm ƀôh tŏk hơdăh. Dang ei, ưh kơ jô̆ jên huach jang, rim sơnăm ‘nhŏng iŏk yua hloh 200 trĭu hlj đơ̆ng pro preng: “Jang ưh huach lơ jơhngơ̆m. Pơtih nhen 1 năr mưh bơngai ruih đak noh măh hiong 1 pơgê dăh mă minh kơsơ̆, mă lei ruih hăm kơmăi noh huach pơhlom 30 pơnĭt đĕch”

Tơmam pơtăm rơgoh hlôi, tŏk bŏk păng jing trong hơtŏk tơ-iung kơjăp kơlih tơdrong kăl yua tơmam drăm rơgoh ‘lơ̆ng đơ̆ng bơngai răt yua roi năr roi lơ. Kơyươ thoi noh, lơ̆m dôm sơnăm kơ âu, pơkăp choh jang sa kiơ̆ trong ‘nao hlôi đei lơ tơring, anih jang mŭk drăm lơ̆m jâ̆p teh đak iŏk pơm jang. kon pơlei jang mir pơma atŭm păng mă kăl noh kon pơlei kon kông tơ̆ tơring ataih yaih pơma adrô̆, ăh kơtơ̆ng truh khua hŏk trong jang ‘nao, hơnơ̆ng pơngơ̆t kơ đon, ưh kơ khĭn jang kơlih tam mă hlôh vao tơpă găh trong jang âu. Mă lei, dôm bơngai pơkăp jang tơ̆ lơ tơring hlôi băt rơih iŏk dôm trong jang trŏ ƀlep, ƀônh pơm jang lơ̆m choh pơtăm kơ kon pơlei. Mă kăl, dôm tơdrong âu đei hrơ hrau lơ̆m dôm tơdrong pơhrăm tơdrong jang tơ̆ tơring pơsĕl. Yă Giàng Thị Dung, Kơ-ieng Kơdră Anih vei lăng kon pơlei dêh char Lào Cai ăn tơbăt: “Tơdrong pơtho pơm jang đei jơnei adrol hloh noh đei đơ̆ng kơdih po kon pơlei. Athei lăng tơdrong kăl đơ̆ng kon pơlei ‘meh pơtho tơdrong jang kiơ̆ Atŭm hăm noh, kiơ̆ tơdrong xơkơ̆t hơtŏk tơ iung đơ̆ng dêh char, pơtih nhen Lào Cai akŏm hơtŏk choh jang xa kiơ̆ pơkăp iŏk yua trong jang ‘nao rơgei, atŭm hăm noh iŏk yua tơdrong hiôk kơ Lào Cai nhen hơtŏk pơtăm ‘nhot, plei ‘long sa tơring tơngiĕt, ‘nhot rơgoh, plei ‘long sa hơdrơ̆k pơyan păng hla che”

Dang ei, lơ unh hnam kon pơlei kon kông đei kang ƀô̆ tơ̆ tơring hơnơ̆ng chă tơroi pơtho, hơvơn dar deh chă tơplih trong pơm jang. Mă lei, tơdrong iŏk yua khua hŏk kŏng ngê̆ lơ̆m choh pơtăm tơ̆ tơring kon pơlei kon kông păng groi kông oei lơ tơdrong tam mă tôm, păng tơnap tap, pơkăl rim anih jang tơm kăl chă hơmet păng pơkăp dôm tơdrong jang trŏ ƀlep hloh. Rim tơring kăl tơrĕk pơtho găh tơdrong vei lăng, hlôh vao găh khua hŏk păng kŏng ngê̆ ăn đe kang ƀô̆ tơ̆ tơring; akŏm pơhrăm kih thuơ̆t ăn kon pơlei jang mir, mă kăl hăm bơngai kơtă vang jang kiơ̆ pơkăp noh đe drăkăn; Pơkăp hăm anih jang mŭk drăm tơguăt hăm kon pơlei jang mir lơ̆m tơdrong pơm kiơ̆ dôm tơdrong iŏk jang kiơ̆ trong pơkăp jang ‘nao, tơdrong rơgei tơ̆ tơring pơsĕl, tơring groi kông, tơring kon pơlei kon kông.