Vang năm akŏm pơma đam đei ƀok Trần Tuấn Anh, jang lơ̆m Anih tơm Chĭnh trĭ, Kơdră Anih jang Mŭk drăm Trung ương, tang măt ăn dôm anih jang, rim tơring, đe kơdră kơpal kơ 5 dêh char Tây Nguyên, rim bơngai juăt jang găh mŭk drăm, bơngai jang khua hŏk, rim anih jang mŭk drăm.

Tơ̆ 'măng pơma đam, rim bơngai tang măt hlôi tơpăt tơbang dôm tơdrong oei tơjruh lơ̆m vei lăng păng hơtŏk bri kơ Tây Nguyên dang ei. Noh jing bri tơjur tenh kơyuơ đơ̆ng tơdrong phă bri, tơgar teh bri, koh ot ‘long bri glăi kơluơ̆t. Tơdrong tơjră hăm bơngai jang vei lăng bri pơtoi ƀôh hli hlơt hloh. Tơdrong tơroi tơbăt mă đei iŏk jang hơnơ̆ng mă lei ưh đei tơnăp. Tơdrong kla jên vei lăng bri oei kơđeh, tam mă hơvơn đei kon pơlei vang jang. Bơngai jang găh bri tam mă erih đei hăm tơdrong jang bri noh tam mă tơpă xơđơ̆ng jơhngơ̆m vei lăng păng hơtŏk bri.

Dôm ƀai đŏk đei tơbang ăh pơma đam hlôi akŏm lơ̆m dôm tơdrong xơkơ̆t đơ̆ng tơchơ̆t luơ̆t teh oei yua dang ei; tơblang minh ƀar trong jang rơgei vă hơtŏk đei jơnei tơdrong vei lăng păng hơtŏk bri. Lơ̆m noh tơrĕk dôm trong pơkăp kla jên vei lăng păng hơtŏk bri tơguăt hăm tơdrong pran kơ rim tơring. Ƀok Hồ Văn Mười, Kơdră Anih jang vei lăng kon pơlei dêh char Đăk Nông pơtruh nơ̆r: “Hơtŏk mŭk drăm bri 'nguaih kơ iŏk yua bơ̆n athei jang tơnăp tơdrong vei lăng păng hơtŏk bri atŭm hăm tơguăt jang tơmang pơhiơ̆ cham char, noh nhôn pơtruh nơ̆r hăm dôm anih jang trung ương dăh hrôih đei trong jang hơdăh. Hăm Đăk Nông noh ƀônh hiôk lơ̆m jang tơmang pơhiơ̆ pơdơh pơdơi kơyuh 'năr, dơnâu, đak krong đak glung ƀônh hiôk hăm tơdrong mă âu”.

Pơtruh nơ̆r găh tơdrong jang vei xơđơ̆ng pơyua ăn tơpôl hăm kon pơlei tơ̆ tơring đei bri, mă hăt noh vei xơđơ̆ng tơdrong jang xa ăn kon pơlei kon kông tơ̆ tơring kiơ̆ Tơchơ̆t 23 đơ̆ng Anih tơm Chĭnh trĭ păng Tơchơ̆t 13 đơ̆ng Ƀan ƀĭ thư. Ƀok Hoàng Xuân Lương, Kơdră Anih jang hơlen xơnong pơtơm kơ kon pơlei kon kông păng groi kông akhan: “Hăm dôm tơring teh đei bri hơmŏ, bri tơm mă lơ̆m noh oei đei kon pơlei kon kông erih jang xa mă bơ̆n hơlen ƀôh đei tơdrong oei xa noh ưh đei răm kiơ truh tơdrong vei lăng bri noh inh pơtruh nơ̆r tơplih dôm tơring kon pơlei oei xa noh jing tơdrong pơkăp jang hăm kon pơlei mơ̆t jang hăm anih mir đak lar păng đe xư jing dôm bơngai tơpă pơm jang hăm tơdrong jang tơm noh vei lăng păng hơtŏk bri”

Vă hơtŏk mŭk drăm choh jang xa, jang găh bri 'long kơjăp xơđơ̆ng tơring Tây Nguyên, Phŏ Giáo sư, tiê̆n sih Nguyễn Thế Chinh, xơ̆ jang Kơdră Anih jang Tơlĕch tơchơ̆t trong jang mŭk drăm cham char tơrĕk, rim tơring teh lơ̆m tơring kăl tơrĕk hơtŏk mŭk drăm xơđơ̆ng, choh jang xa, jang găh bri 'long hưuh kơ kiơ̆ pơkăp hơtŏk cham char kơ tơring bri Tây Nguyên: “Dang ei bơ̆n đei tơdrong pran noh kơdih pơm tơlĕch găr xơlơ̆k, ka phê, kơsu, thoi noh mă bơ̆n ưh đei tuh rơm rĕk lơ̆m cham char mă kơđoh găr xơlơ̆k gơh pơjing tơmam nai, kơđoh ka phê pơjing tơdrong nai. Tơdrong 'lơ̆ng kơ mŭk drăm xơđơ̆ng tơ̆ âu noh hơtŏk kơjă. Dang bơ̆n ưh đei tơlĕch cham char dôm tơdrong 'mê̆ 'mach mă oei hơtŏk kơjă lơ ăn anih jang mŭk drăm. Mưh bơ̆n iŏk jang kiơ̆ pơkăp mŭk drăm xơđơ̆ng noh jing dôm trong jang tơm vă bơ̆n tơlĕch lơ̆m trong jang hơtŏk tơ-iung jơk kơ tơring Tây Nguyên”.

Atŭm hăm noh, rim bơngai tang măt adoi tơgop nơ̆r găh vei lăng cham char bri, hơtŏk mŭk drăm tơ̆ hơla bri, trong tơlĕch hơtŏk jang kŏng ngĭp pơm tơlĕch păng tĕch tơ̆r ăn teh đak đe, keh đang trong pơkăp ăn tơring tĕch răt dôm pơkăp các-bon bri tơ̆ Việt Nam…

Tơ̆ pơma đam, ƀok Trần Tuấn Anh, jang lơ̆m Anih tơm Chĭnh trĭ, Kơdră anih jang Mŭk drăm Trung ương ră hơdăh, Tây Nguyên jing tơring đei hơgăt bri xă mă 2 lơ̆m jâ̆p teh đak, đei mŭk drăm tih xă găh hơtŏk mŭk drăm bri păng đei lơ tơdrong hiôk vă hơtŏk mŭk drăm, hơtŏk jang găh bri 'long. Bri Tây Nguyên tơrĕk tih tên truh tơdrong erih mŭk drăm – tơpôl kơ kon pơlei kon kông, đei anih dơ̆ng kăp gĭt găh xơđơ̆ng chĭnh trĭ, cham char sinh hŏk păng vei xơđơ̆ng thong đak, pơ-'lơ̆ng hơyuh 'năr. Lơ̆m pơkăp hơtŏk mŭk drăm – tơpôl păng vei xơđơ̆ng tơpôl tơring Tây Nguyên truh xơnăm 2030, xơkơ̆t truh xơnăm 2045, Trung ương hlôi tơlĕch tơchơ̆t jang truh xơnăm 2030 bri tơ̆ Tây Nguyên đei hloh 47%; truh xơnăm 2045, jing tơring hơtŏk tơ-iung kơjăp, đei mŭk drăm jơk, xơđơ̆ng; minh ƀar dêh char lơ̆m tơring oei lơ̆m grŭp hơtŏk pran kơ jâ̆p teh đak. Cham char bri đei vei lăng păng hơtŏk; pơjing minh tơring jang tơmang pơhiơ̆ pran 'lơ̆ng, anih truh tơmang kơ đe tơmoi lơ̆m păng 'nguaih kơ teh đak. Dôm nơ̆r tơgop tơ̆ pơma đam gô tơgop kăp gĭt ăn tơdrong jang pơkăp 5 xơnăm pơm kiơ̆ Tơchơ̆t 13 đơ̆ng Ƀan ƀĭ thư găh “Hơtŏk tơdrong pơgơ̆r đơ̆ng Đảng hăm tơdrong jang vei lăng păng hơtŏk bri". Ƀok Trần Tuấn Anh xơkơ̆t: “Tôm tơdrong âu atŭm hăm băt hơdăh tơdrong 'nao, nhôn gô tơblang vă iŏk yua dôm kơjă đon bơnôh kăp gĭt đơ̆ng Tơchơ̆t 13. Nhôn hơpơi 'meh đơ̆ng dôm tơdrong 'nao âu vei xơđơ̆ng dôm tơdrong hơtŏk vei lăng adoi nhen hơtŏk tơ-iung kơjăp kơ Tây Nguyên gô jing dôm tơdrong kăp gĭt vă vei xơđơ̆ng pơm jang đei jơnei Tơchơ̆t 23 đơ̆ng Anih tơm Chĭnh trĭ ăn tơring Tây Nguyên”.