Truh đĭ khei 9 ou ki, apŭng Kon Brăih, hlôi pơtăm hloh 1.500ha bri, să hloh 340ha pơtêng hăm dêh char Kon Tum pơjao lơ̆m 4 sơnăm, đơ̆ng sơnăm 2021-2024. ‘Nou jĭ sơnăm mă 4 hơnơ̆ng, apŭng pơtăm să hloh trong tơlĕch jang pơtăm ‘long bri. Ƀok Nguyễn Văn Thuỷ, Kơ iĕng Kơdră Hơnih vei lăng kon pơlei apŭng tơbăt, vă pơtăm bri să hloh nơ̆r pơjao, vei lăng bri jing ‘lơ̆ng, khul kơdră apŭng hlôi tơlĕch jang lơ trong jang hơ iă: “Hơnih vei lăng kon pơlei apŭng tơlĕch kon jên jang đơ̆ng lơ tơdrong jang vă tơgŭm ăn kon pơlei vang pơtăm bri. Hơnơ̆ng pơrô̆ athei rim hơnih jang, tơring dăr lăng, lăng hơlen, pơtho, pơrô̆ hơvơn kon pơlei vei lăng ‘long pơtăm. Rim sơnăm, hơgăt teh ayơ đei ‘long pơtăm lôch ‘noh năm chă pơtăm ming hloi”.        

Atŭm hăm apŭng Kon Brăih, jăl jang 2021-2024, lơ tơring tơ̆ Kon Tum hlôi pơtăm bri să hloh nơ̆r pơjao. Lơ̆m ou đei pơlei tơm Kon Tum, apŭng Tu Mrông păng Kon Plông hlôi pơtăm să hloh đơ̆ng mĭnh ƀar hreng truh 1.000ha. Lơ tơring đơ̆ng tơring koh tơtông ‘long, muih roh choh mir tơ̆ dêh char Kon Tum, ‘noh dang ei kon pơlei hlôi ƀôh hơdăh iŏk đei jơnei đơ̆ng bri păng vang pơtăm ‘long bri.

‘Nhŏng A Long, pơlei Ti Tu, tơring Đak Ha, apŭng Tu Mrông tơbăt, ŭnh hnam ‘nhŏng hăm lơ ŭnh hnam lơ̆m pơlei hlôi iung jang pơtăm bri lơ̆m hơgăt teh mir pơtăm ƀum ƀrang, đei hloh 30ha: “Sơ̆ ba pơtăm ƀum ƀlang, mă ƀum ƀlang jei pă jing, ƀum ngăl pơgang, dang ei ƀum ƀlang hlôi tŏ sĕt kơna dă ƀiơ̆ gleh hrat bơih. Ba jei nhen kon pơlei, sơ̆ ưh kơ tơchĕng truh pơtăm ‘long bri ôh. Kang ƀô̆ tơring, pơlei chă pơtho khan jei hlôh vao. Ŭnh hnam chă pơtăm ƀum ƀlang lăng pă gan plei kơna mă tơplih pơtăm ‘long hơngo. Đei kơdră tơring tơgŭm dơđăh ‘long hơngo ba jei chhôk dêh. Ba hơdrin chă choong pơ ‘ngoăih ‘ngiĕt vă hơngo blŭh vơ̆ koăng păng jang ‘lơ̆ng tang găn ŭnh sa”.

Jang kiơ̆ Tơdrong tơchơ̆t Hop akŏm tih Đảng dêh char Kon Tum ‘măng mă XVI găh pơtăm ‘nao 15.000 ha bri lơ̆m jăl jang, ‘ngoăih pơtăm ‘long akŏm, rim tơring lơ̆m dêh char jei atŏk kơtang pơtăm ‘long răh rap. Truh dang ei, hlôi pơtăm đei hloh 3.600ha dơnơm ‘long, jơnei 121% trong tơchơ̆t; vă vei lăng bri hloh 6.100 ha bri săr; pơjao 9.400 ha bri ăn kon pơlei vei lăng; pơjing đei tơdrong choh jang sa ăn hloh 24.000 ‘nu bơngai jang, lơ hloh trong tơlĕch ăn ... Ƀok Nguyễn Quốc Tuấn, Kơ iĕng Kơdră Hơnih vei lăng bri ‘long dêh char Kon Tum tơbăt, rim tơdrong jang pơtăm bri, vei lăng bri tŏk bŏk pơjing đei tơdrong jang, tơgŭm ăn kon pơlei jang sa sơđơ̆ng păng atok tơ iung mŭk drăm choh jang sa bri ‘long: “Lơ̆m ‘long oei iĕ ‘noh kon pơlei tơgĕch jơmŭl pơtăm ƀa hơƀo hơnhăk đei iŏk yua kơjăp ăn kon pơlei vang jang pơtăm bri. Găh đunh đau tơdrong jang pơtăm ‘long bri, pơm hơyơ̆l teh phui phang tơnang kŏ gô hơnhăk đei iŏk yua kơjăp ăn kon pơlei nhen sơng iŏk đei kon jên đơ̆ng đe kla ăn iŏk yua cham char bri, đei iŏk yua sa hơpăh đơ̆ng kih tĕch ‘long bri pơtăm. ‘Nou jĭ dôm tơdrong jang sa iŏk yua sơđơ̆ng păng đunh đai ăn kon pơlei vang iung jang pơtăm bri”.

Atŭm hăm atŏk kơtang pơtăm bri, đơ̆ng blŭng jăl jang hloi, Hơnih Đảng dêh char Kon Tum đei Tơdrong tơchơ̆t 06 găh atŏk tơ iung bri ‘long kơjăp truh sơnăm 2025, lăng truh sơnăm 2030. Đơ̆ng sơnăm 2021 truh sơnăm 2023, dêh char Kon Tum hlôi hơvơn hloh 1.500 ti hlak jên vă pơtăm ‘long bri; akŏp kon jên jang kơ hơnih jang bri dêh char truh sơnăm 2023 dang hloh 7.500 ti hlak jên, lơ̆m ou hơdrô̆ kon jên pơtăm bri dang vă jê̆ 950 ti hlak jên. Ƀok Nguyễn Tấn Liêm, Kơdră chĕp pơgơ̆r Hơnih vei lăng Choh jang sa păng Atŏk tơ iung tơring tơrang dêh char Kon Tum tơbăt, hơnih ou tŏk bŏk apĭnh dêh char hơtŏk lơ hloh dơ̆ng chă tơgŭm djru ăn tơdrong bri vă pơtrŭt kon pơlei pơtăm bri. Trong tơlĕch jang ‘noh pơjing đei bri ‘long pơm tơlĕch tơmam drăm, trŏ lăp hăm tơdrong ‘meh vă atŏk tơ iung hơnih jang kmăi kmŏk pơm tơlĕch tơmam drăm đơ̆ng ‘long: “Kon jên tơgŭm ăn kon pơlei pơtăm bri ‘long pơm tơlĕch tơmam drăm lăp 10 triu hlak jên lơ̆m 1ha. Trong tơlĕch jang vă Tơdrong tơchơ̆t iung jang ‘lơ̆ng hơ iă hloh dơ̆ng adoi nhen atŏk tơ iung ăn jăl jang đơ̆ng rŏng, kon jên tơgŭm ăn lơ hloh ƀiơ̆ vă kon pơlei hưch hanh vang pơtăm bri, khei ‘năr tim mă iŏk đei kơ yuơ bri ‘long ăp 6,7 sơnăm ‘mơ̆i mă gơ̆h koh tĕch. Mă ƀar dơ̆ng ‘noh kon jên tơmơ̆t jang oei tŏ sĕt ‘nao lăp 67 triu hlak jên lơ̆m 1ha lơ̆m 4 sơnăm. Tơdăh pơtăm bri dang 150 triu hlak jên lơ̆m 1ha lei khei năr vei lăng năng tông gô đunh ƀiơ̆ păng ‘long gô tih ‘lơ̆ng hloh”.

Đơ̆ng rŏng 4 sơnăm tơlĕch jang kiơ̆ Tơdrong tơchơ̆t Hop akŏm tih kơ Đảng dêh char Kon Tum ‘măng mă XVI, jăl jang 2020-2025 găh pơtăm bri păng 3 sơnăm tơlĕch jang kiơ̆ Tơdrong tơchơ̆t kơsô̆ 06 găh atŏk tơ iung bri kơjăp ‘lơ̆ng truh sơnăm 2025, lăng truh sơnăm 2030, bơ̆ jang vei lăng, năng tông, atŏk tơ iung bri kơ dêh char Kon Tum iŏk đei jơnei hơ iă. Dang ei atŭm hăm vei lăng năng tông ‘lơ̆ng hloh 550.000 bri kơdrơ̆ng atŭm hăm vă jê̆ 64.000ha bri ‘long pơtăm, dêh char Kon Tum tŏk bŏk hơnơ̆ng akŏm kon jên vă tơmơ̆t jang atŏk tơ iung mŭk drăm bri ‘long kơjăp ‘lơ̆ng păng yak truh trong tơlĕch jang groi teh đei bri ‘long hơyơ̆l jơnei 64% lơ̆m hơtuch sơnăm 2025.