‘Mi ‘noh đak lơ̆p, tŏ ‘noh puih phang, tơring teh Ea Nuôl, Buôn Đôn, dêh char Đắk Lắk, mơmat pơtăm dôm kơ loăi ‘long kăp gĭt. Chă trong pơm pơdrŏng tơ̆ hơgăt teh pơlei pơla, grŭp buăl mơlôh tơ̆ xăh Ea Nuôl hlôi pơ̆n pơtăm ‘long hơmu, tơplih dôm tơdrong ưh kơ ‘lơ̆ng đơ̆ng tŏ ‘mi kial, teh jing tơdrong pran lơ̆m choh jang sa. ‘Nhŏng Võ Hoài Ân, kang ƀô̆ vei lăng ki thuơ̆t pơgar hơmu tơbăt: “Sơnăm 2021 ‘noh pơtơm pơtăm pơlong lăng 1,2 tơnơm ‘long hơmu ƀôh lăp bluh jing ‘lơ̆ng. Đơ̆ng rŏng ‘noh pơtăm thim 1,2 hơdrĕch ‘nao pơtăm long lăng ƀôh oei lăp. Yua đơ̆ng tŏ ‘mi kial ưh kơ hơtŏ ‘năr păng kơmăng tơ̆ tơring Buôn Đôn, pơyan phang ưh kơ hơtŏ hloh 10 độ gô pơm ăn plei hơmu ƀâu phu hloh, ‘ngam hloh.”

Đơ̆ng tơdrong jang pơlong lăng blŭng a, truh dang ei, hloh 1,8 héc-ta 10.000 tơnơm hơmu đĭ ăn phĕ tĕch. ‘Nhŏng Nguyễn Quốc Lập, mĭnh lơ̆m dôm bơngai tơgop jên, tơgop kŏng tơmơ̆t jên jang pơgar hơmu, tơbăt, yak hloh lơ mơmat tat lơ̆m choh hơmet ming teh, tơmơ̆t jên jang pơm hnam hơdrao, iŏk yua khoa hŏk kơmăy kơmŏk ‘noh đơ̆ng rŏng hloh 3 sơnăm, pơgar hơmu đĭ ăn phĕ tĕch jô̆ păh lăp 10 tấn rim sơnăm. Kơjă tĕch 400.000 hlak jên 1 kĭ, mă lei đe răt lơ, đei khei ‘năr pơgar ưh kơ đei hơmu vă tĕch. Kiơ̆ kơ ‘nhŏng Nguyễn Quốc Lập, yak truh hơtŏk tơiung ăn ‘long hơmu âu oei pơih să. “Tơdăh rim tơdrong hiôk ‘lơ̆ng păng kon pơlei tơ̆ âu chu vang tơgŭm vang hơdrin hăm nhôn ‘noh nhôn kŭm ‘meh ‘nâu jĭ tơring pơtăm ‘long hơmu ăn dêh char bơ̆n”.

Grŭp buăl mơlôh hlôi tơgĕch yua tơdrong ‘lơ̆ng găh tơroi tơbăt đơ̆ng mạng tơpôl, roi tơƀôh tơdrong jang pơtăm hơmu đơ̆ng sư ăn lơ bơngai băt truh. Lơ̆m khei ‘năr phĕ tĕch, kơhrĕng kơnong hơmu tơpăt pơbrơ̆ng, jing ‘lơ̆ng, plei hơ kriu hlôi sơng đei lơ lap tơmoi tơmang lăng. Mŏ Nguyễn Thị Thu Hằng, tơroi: “ Oh năm tôch kơ lơ hơnih bơih, đơ̆ng pơgar dâu Đà Lạt, pơgar hơmu Ninh Thuận, ƀơ̆t vih tơ̆ pơlei kơdih đei pơgar hơmu thoi noh oh ƀôh tôch kơ hơ iă. ‘Meh vă tơring bơ̆n đei dơ̆ng dôm pơgar hơmu thoi âu vă hơtŏk tơiung mŭk drăm kŭm nhen tơring tơmang lăng ăn tơmoi.”

Yă Đinh Thuý Lăng, Phŏ Kơdră Anih vei lăng kon pơlei xăh Ea Nuôl, apŭng Buôn Đôn, dêh char Đắk Lắk tơbăt, đơ̆ng jơnei blŭng a đơ̆ng tơdrong jang pơtăm hơmu hlôi pơih ăn dôm hơyak năm ‘nao ăn kon pơlei jang chŭn mir lơ̆m tơring. “Tơdrong jang âu hơnhăk ăn đei yua lơ. Mă hơdrol ‘noh jĭ tơdrong tơplih lơ̆m hơmet ming ‘long pơtăm, hơdrĕch ‘long ‘nao tôch kơ lăp hăm teh tơ̆ xăh Ea Nuôl. Hơdai hăm ‘noh, đei trong hơtŏk tơiung găh tơmang lăng choh jang sa. Mĭnh trong hơtŏk tơiung tŏk bŏk jing trong vă jang kơ apŭng. Găh tơring ‘noh nhôn kŭm gô tơchĕng hơlen gô roi tơƀôh tơdrong jang âu truh hăm kon pơlei jang chŭn mir lơ̆m xăh vă lơ bơngai đei băt hăm tơdrong jang ‘nâu. Tơƀôh ăn tơring hơtŏk tơiung choh jang sa, tơplih hơmet ming ‘long pơtăm đei yua hloh”.