Ŭnh hnam mŏ Đàm Thị Thảo (koeng Bản Hoàng, tơring Trường Hà, apŭng Hà Quảng, Cao Bằng) ‘noh mĭnh lơ̆m dôm ŭnh hnam đei iŏk yua sa hơpăh đơ̆ng tơdrong jang hnam hơdrou vă pơtăm pia. Hăm hloh 100 triu hlak jên đei kơ dih, atŭm hăm iŏk đei đơ̆ng teh đak tơgŭm djru truh 150 triu hlak jên, ŭnh hnam mŏ hlôi răt tơmam drăm, kmăi kmŏk vă pơjing hnam hơdrou pơtăm pia. Mŏ Đàm Thị Thảo tơbăt: Hơnih jang đei 1.000m2, jang kiơ̆ kmăi kmŏk tơruih đak kơtoh hăm 2.000 dơnơm pia, pơkai. Hlŏh đơ̆ng chă pơtăm pơlong năng lăng ƀôh dơnơm blŭh vơ̆ jing ‘lơ̆ng, pơkao hrơ̆p mĭnh ‘măng păng plei tih, plei gei truh 90%.“Chă pơtăm pia lơ̆m hnam hơdrou khei pơyan ‘noh pơtăm pia kơhrưih hăm pia pông, găh pơyan anai ‘noh pơtăm pia đak, hmă hmă lơ̆m pơyan phang. Lơ̆m mĭnh sơnăm chă jang 3 pơyan, tơklăh pơđĭ kon jên tơmơ̆t jang oei iŏk đei 200 triu hlak jên. Lăp đơ̆ng rŏng đei hŏk pơhrăm găh jang sa lơ̆m hnam hơdrou ‘noh ba mă băt khei năr trŏ lăp chă vei lăng năng tông vă plei ‘lơ̆ng, tơdrong vei lăng jĭ vă lei lăi hăm bơ̆n jang ƀa hơƀo mơ̆n”.

Trong jang sa lơ̆m hnam hơdrou păng tơruih đak hăm kmăi kmŏk tơruih đak kơtoh tơgŭm ăn ‘long pơtăm đei đak măh mai păng kĕ tang găn sơdrông pơrăm. Ư̆h khan lăp lơ loh đĕch ôh, kon pơlei jei dă ƀiơ̆ tơhoach kon jên iŏk yua pơgang vei lăng ‘long pơtăm, adoi pơjing đei tơmam drăm rơgoh ‘lơ̆ng ăn jơhngơ̆m jăn kơ kon bơngai mưh chă sa dơ̆ng. Iŏk đei jơnei au hlôi pơjing dơ̆ng jơhngơ̆m pran ăn kon pơlei pơ̆n tơmơ̆t jên jang kiơ̆. Jei mĭnh lơ̆m dôm ŭnh hnam đei tơgŭm ăn pơm hnam hơdrou pơtăm pia pơkai, ‘nhŏng Nguyễn Văn Quảng (koeng Bản Chá, tơring Ngọc Đào, apŭng Hà Quảng, dêh char Cao Bằng) tơbăt:“Ŭnh hnam nhôn pơtăm pia pông, pia đak. Găh hơdrĕch ‘noh đei teh đak tơgŭm ăn. Rim pơyan đơ̆ng rŏng ‘noh ba chă răt kơ dih. Lơ̆m mă ‘nao chă pơtăm pia lơ̆m hnam hơdrou, kang ƀô̆ kih thuơ̆t kơ tơdrong jang au jur năm tơ̆ ŭnh hnam chă pơtho găh pơtăm păng vei lăng. Tơdrong jang sa lơ̆m hnam hơdrou au, tơdăh bơ̆n pơm kiơ̆ ƀlep kih thuơ̆t lei ưh kơ măh tơnap dang yơ mơ̆n. Pơtăm pia lơ lau lơ̆m minh sơnăm 3 ‘măng. Tơdăh vei lăng ‘lơ̆ng lei đei iŏk yua lơ hloh hăm chă pơtăm rim ‘long pơtăm anai”.

Đơ̆ng đei iŏk jơnei ou, lơ ŭnh hnam tơ̆ rim tơring anai lơ̆m apŭng năm truh chă lăng hŏk pơhrăm, tơmơ̆t jên jang, pơprŏ kon jên atŭm hăm kơdră tơring tơgŭm djru vă iung jang kiơ̆. Ƀok Đàm Quang Đạo, Kơdră chĕp pơgơ̆r Khul kon pơlei choh jang sa tơring Ngọc Đào, apŭng Hà Quảng, dêh char Cao Bằng hơlen: Dôm trong jang choh jang sa jang kiơ̆ kmăi kmok hơgei lơ̆m tơring hlôi druh tom hăm tơdrong ‘meh vă răt iŏk hrei au.“Sơnăm 2022, apŭng Hà Quảng tơgŭm ăn tơring Ngọc Đào 3 hnam hơdrou kiơ̆ trong teh đak tơgŭm ăn 50% kon jên jang. Sơnăm mă blŭng jang ‘noh teh đak tơgŭm ăn hơdrĕch păng pơtho ăn kih thuơ̆t vei lăng năng tông. Khei năr au kơnh, Khul kon pơlei choh jang sa hơnơ̆ng pơrô̆ pơrôp kon pơlei vang iung jang kiơ̆ kơtang hloh dơ̆ng vă pơjing đei tơmam drăm choh jang sa rơgoh ‘lơ̆ng, pơm hơtŏk jang sa iŏk yua kơjăp hloh lơ̆m mĭnh hơgăt teh jang sa, tơgop xut xa pơngot rơvĕt, tơjur dơnuh, hơdrin pơjing đei tơmam drăm OCOP”.

Trong jang pơtăm pơkai lơ̆m hnam hơdrou, jang kiơ̆ kmăi kmŏk tơruih đak kơtoh pơih trong ‘nao lơ̆m choh jang sa tơ̆ tơring. ‘Nau jei jing jơ rơvơn tơgŭm ăn kon pơlei hŏk pơhrăm, jang kiơ̆ kih thuơ̆t, kmăi kmŏk hơgei vă pơjing đei tơmam drăm rơgoh ‘lơ̆ng, pơm sơđơ̆ng ăn jơhngơ̆m jăn ăn bơngai răt yoa.