Chehphe ‘noh ‘long pơtăm tơm hloh lơ̆m trong hơmet pơ ‘lơ̆ng choh jang sa kơ dêh char Dak Nông. Hrei ou dêh char đei hloh 142.000ha chehphe, phĕ iŏk đei hloh 360.000 tân, dơ̆ng mă 3 lơ̆m teh đak. Dôm sơnăm ou ki, lơ hơnih mơdro sa, hơp tak xah, khul jang hơdoi păng kon pơlei oei tơ̆ Dak Nông hlôi lăng kơjăp tơmơ̆t jên jang, jang kiơ̆ khoa hŏk kih thuơ̆t lơ̆m choh jang sa, kơna plei chehphe roi năr roi ‘lơ̆ng. Dêh char hlôi đei hloh 23.000ha chehphe jang kiơ̆ rim tơdrong pơkăp ‘lơ̆ng teh đak păng apŭng plĕnh teh, hăm lơ trong jang chehphe kơjăp ‘lơ̆ng kiơ̆ trong atŏk kơjă. Mă kăl ‘noh 2 sơnăm tơjê̆ ou, Dak Nông hlôi pơjing đei 54 khul Pơtrŭt choh jang sa pơlei pơla, iung jang pơtho tơbăt, tơgŭm djru kon pơlei, hơp tak xah jang kiơ̆ choh jang sa pơkăp ‘lơ̆ng, rơgoh ‘lơ̆ng tơmam drăm.