Tŏk bŏk phĕ 1 ha 5 sao pơkai mă ŭnh hnam mơng teh pơtăm tơ̆ thĭ trân Phú Túc, apŭng Krông Pa, ƀok Nguyễn Văn Kính (đơ̆ng dêh char Phú Yên) sơ ‘nhôi sơ ‘ngon kơ yuơ sơnăm au jang sa ưh kơ lĕch. Ƀok tơbăt, jei lơ̆m hơgăt teh au, pơyan hơdrol, ‘mi rŏ tŏ hơlăng, mĭnh tŏ pơkai trăp truh 8 kĭ mă lei sơnăm au plei pơkai hơ iơch tôch kơ dêh:“ Ĭnh jang pơtăm pơkai hloh ƀar jĭt sơnăm kơau bơih, đei sơnăm đei, đei sơnăm ưh, hơdrô̆ sơnăm au hiong răm lơ tơpă mơ̆n. Kon pơlei chă pơtăm pơkai tơ̆ au găh lơ kon jên tơmơ̆t jang ‘nŏh jĭ jên tŏk iŏk đơ̆ng hơnih mong jên ngăl, kon pơlei jei hơdrin sơnăm kơnh jang dơ̆ng, tơdăh đei đăi lei pơdreo pơđĭ kon jên hre hloi”

Đơ̆ng thĭ xah An Nhơn, dêh char Bình Định năm mơng 3ha teh tơ̆ tơring Ia Mlăh, apŭng Krông Pa, dêh char Gia Lai vă pơtăm pơkai, ‘nhŏng Nguyễn Nhật Tân sơ ‘nhôi tơroi, kon jên tơmơ̆t jang pơtăm pơkai lơ̆m 1 ha đơ̆ng pơtăm truh phĕ ‘nŏh dang 150 triu hlak jên. Pơyan au ‘mi jrăh, plei pơkai tih vơ̆ ưh lei lăi kơna lơ̆m 1 ha lăp phĕ iŏk đei đơ̆ng 30 truh 34 tân đĕch, kơjă đe răt iŏk đơ̆ng 3.000 truh 3.500 hlak jên lơ̆m 1 kĭ. Jô̆ hơlen, pơyan pơkai au ‘nhŏng Tân hiong răm dang 60 trĭu hlak jên.“ Sơnăm au tŏ ‘mi kial tôch chrih chrĕng kơna plei ưh kơ lơ, ưh kơ ‘lơ̆ng nhen dôm sơnăm hơdrol, sơ̆ 1ha phĕ iŏk đei vă jê̆ 40 tân pơkai, sơnăm au ‘mi jrăh, tŏ tŏ sĕt kơna plei ưh kơ lơ, ưh kơ ‘lơ̆ng, bơngai jang hiong răm tôch kơ lơ, 1 ha hiong răm vă truh ƀar jĭt triu hloi”

Hrei au, lơ̆m apŭng Krông Pa đei hloh 1000 ha pơkai, phĕ iŏk đei vă jê̆ 40.000 tân. Ƀok Võ Ngọc Châu – Kơdră chĕp pơgơ̆r Hơnih vei lăng Choh jang sa păng Atŏk tơ iung tơring tơrang apŭng Krông Pa tơbăt, pơđĭ mir pơgar pơkai ‘nŏh đơ̆ng kon pơlei tơring anai mơng teh chă pơtăm, ưh kơ đei lơ̆m trong pơ prŏ jang kơ apŭng ôh. ‘Ngoăih kơ ‘noh, bơngai mơdro năm chă răt ư̆h kơ đei pơkăp dih băl, chă năm răt kơdih kơna khul kơdră tơring păng hơnih bơ̆ jang ư̆h kơ gơ̆h vă tơlĕch trong pơchoh ăn, chă tơgŭm djru ăn kon pơlei.“ Hơdrol kơ ‘noh ‘mi hơnơ̆ng kơna hla pơkei prĕnh kơna pơm ăn truh plei ưh kơ ‘lơ̆ng, ưh kơ lơ. Găh lơ kon pơlei oei tơ̆ Bình Định păng Phú Yên năm tơ̆ au mơng teh lơ̆m apŭng Krông Pa, ưh khan kon pơlei lơ̆m apŭng chă pơtăm ôh, kơna tơnap mă chă pơrô̆ pơtho khan kơ yuơ đe sư năm tơ̆ au mơng teh pơtăm kơna vei lăng tơnap”