‘Ngoaih 3 tŏ rơmo hlôi lôch, 29 tŏ rơmo iŏk đak toh uơ oei kơ ŭnh hnam ƀok Nguyễn Thanh Phong, thôn Kinh tế mới, tơring Tu Tra, apŭng Đơn Dương, dêh char Lâm Đồng jei tŏk bŏk jĭ klak chroh, hơkĕ hơkong, ưh kơ sa ‘ngiĕt, lơm ou mĭnh ƀar tŏ rŏ năng ưh kơ jor gô lôch dang yơ ưh kơbăt. Hloh 10 năr ŭnh hnam tơhoach kon jên tôch kơ lơ răt pơgang ming hơmet rơmo ou mă lei oei ưh kơ kĕ kơ klăih. Ƀok Phong tơroi, vă răt rong đei rơmo ou ŭnh hnam hlôi iŏk pơgoh kon jên mong răk dôm sơnăm hơdrol, tŏk iŏk dơ̆ng đơ̆ng hơnih mong jên 3 ti hlak jên. Dang ei rơmo mĭnh păh lôch mĭnh păh jĭ kơ yuơ ƀet vaccine, ưh kơ gơ̆h vă iŏk đak toh, kơna pơm hiong răm kơtang truh mŭk drăm ŭnh hnam:“Lơ̆m 32 tŏ rơmo ‘noh 3 tŏ đĭ lôch hlôi ƀŭ hŭt, 3 tŏ anai tŏk bŏk oei jĭ lơ lou. Rơmo dang ei ji hơlơ̆k dơ̆ng, ưh kơ ‘meh chă sa, jĭ klak chroh 5-6 tŏ bơih. Ba ơh tơpă mơ̆n, jên kơ dih jĭ ưh kơ đei, chă tŏk iŏk đơ̆ng hơnih mong jên, kon jên pơđom kơ ŭnh hnam jĭ tŭh pơđĭ lơ̆m ou ngăl. Dang ei đei tơdrong lơ lou, ưh kơbăt ning mônh kơnh hơrih lơ liơ bơih. Hơpơi kơdră chĕp pơgơ̆r tơring chă hơlen tơdrong hiong răm kơ kon pơlei vă đei trong chă tơgŭm djru ƀiơ̆”.

Jei lei lăi, yă Huỳnh Thị Kim Phượng, oei tơ̆ thôn Lạc Nghiệp, tơring Tu Tra, apŭng Đơn Dương jei sơ-‘nhôi mưh ƀôh rơmo iŏk đak tŏh kơ ŭnh hnam bun chơ khoĕl. Lăp đơ̆ng rŏng ƀet vaccine bơ̆ng jĭ pơ-‘ngeh hơkar lơ̆m năr 31/7, pơđĭ 76 tŏ rơmo iŏk đak toh jei đei ƀôh ji klak chroh ngăl. Mă đơ̆ng ŭnh hnam hlôi răt ƀet pơgang truh 20 triu hlak jên lơ̆m 1 năr mă lei oei ưh kơ kĕ kơ klăih, 8 tŏ đĭ lôch. Yă Phượng akhan, rơmo jĭ păng lôch kơ yuơ pơgang vaccine bơ̆ng jĭ pơ-‘ngeh hơkar kơna kăl hrŭ ăn tơdrong hiong răm ou.“Tim mă băt oei vă lôch dôm yơ dơ̆ng, kơ yuơ đơ̆ng dang ei đĭ jĭt dôm năr bơih mă lei rơmo hơnơ̆ng bun lơ lou, rŏ năng jĭ gô lôch đĕch bơih, pă hơmĕng hơrih dơ̆ng bơih ‘nou. Năr ayơ jei hơnơ̆ng ƀôh rơmo bun, chă hơ-‘ngap hơnơ̆ng ŭnh hnam jei chhŭr nuih dêh mă lei vă băt pơm lơ liơ. Dang ei tơdrong hơpơi ‘meh kơ ŭnh hnam ‘noh tơpôl rơmo jĭ lơ lou ‘noh kơ yuơ đơ̆ng vaccine, khul kơdră tơring tơgŭm djru kon pơlei athei hơnih tĕch mơdro pơgang vaccine hrŭ ăn kon pơlei”.

Hơlen kiơ̆ ƀôh jĭ, răih lăng hơlen sĕch hơkar, khăm lăng hơlen pham, Hơnih jang pơgang vei lăng kon tơrong kơ Hơnih tơm vei lăng Choh jang sa păng Atŏk tơ iung tơring tơrang ‘măng blŭng tơchơ̆t hơdăh tơdrong tơm pơm ăn jĭ klak chroh tơ̆ rơmo iŏk đak tŏh tơ̆ dêh char Lâm Đồng ‘noh tơpoh sơmach jĭ Pestivirus tauri lăp đơ̆ng rŏng ƀet vaccine NAVET-LPVAC kơ Công ty Navetco. Mă hơdăh, pơtôch khăm hơlen đei ƀôh đĭ đăng 24 tŏ get chai pơgang vaccine ou jei đei sơmach jĭ Pestivirus, ‘nou jĭ sơmach jĭ pơm tơdrong jĭ klak chroh tơ̆ rơmo. Hơnih jang pơgang vei lăng kon tơrong jei sơkơ̆t hơdăh, ưh kơ ƀôh dôm sơmach jĭ anai lơ̆m dôm tơmam hiĕm chă hiĕm rơmo iŏk đak toh.

Dang ei, tơdrong rơmo jĭ klak chroh păng lôch tơ̆ dêh char Lâm Đồng oei tŏk bok ưh sơđơ̆ng, rim năr hiong răm tôch kơ lơ kon jên ming hơmet. Mă lei, nhen lĕ kon pơlei oei hơnơ̆ng chă ăn kon jên ming hơmet rơmo jĭ đĕch.