Mĭnh giĕng ‘nâu, klo kăn ƀok Võ Văn Cao, oei tơ̆ tổ 10, plei Bồng Lai, xăh Hiệp Thạnh, apŭng Đức Trọng, dêh char Lâm Đồng pă lŭ sŏng sa, tep pă sŭk, chă kơdâu jơ̆p hơnih vă chă trong dŏng hơmet rơmo. ‘Ngoăih kơ 4 tŏ rơmo iŏk đak toh tŏk bŏk kieo oei pran jăng, pơđĭ 96 tŏ rơmo iŏk đak toh uơ oei dơ̆ng kơ ĭnh hnam tă kơ đei ƀôh jĭ ngăl, jĭ klak chroh lĕch pham, lơ̆m noh 2 tŏ đĭ lôch. Ƀok Võ Văn Cao tơbăt, kơsô̆ rơmo đei jĭ tă kơ ‘nao ƀet  vaccine tang găn jĭ hơkar pơplei hơdrol ‘noh ngăl:

“Ĭnh ƀet vaccine đĭ 96 tŏ, lăp pă 4 tŏ rơmo vă jê̆ tuh kơna ưh kơ ƀet. Dang ei  10 tŏ đei ƀôh jĭ klak chroh, 2 tŏ lôch bơih. Mĭnh ƀar tŏ ‘noh sa ưh kơ lŭ, 1,2 tŏ nai ‘noh pơvơ pơvônh... ĭnh tŏk bŏk bơngơ̆t dêh nhen tơ oei tơ̆ kơpal ŭnh. Dang ei rim năr ĭnh tơhuch pơgang ăn kơ rơmo, tih iĕ ăn sa pơgang đĭ. Pơgang ĭnh chă năm răt kơdih tơ̆ ‘ngoăih ngăl, oei pơgang asong ‘noh ‘nao đei đơ̆ng ‘năr brei truh dang ei đĕch, mă lei lăp tă kơ ăn kơ loăi C-gluco ngăl đĕch”.

Ŭnh hnam yă Huỳnh Thị Kim Phượng, oei tơ̆ plei Lạc Nghiệp, xăh Tu Tra, apŭng Đơn Dương kŭm đei 76 tŏ rơmo iŏk đak toh đei jĭ, 2 tŏ đĭ lôch. Tơdrong ‘nâu lăp đei ƀôh đơ̆ng rŏng 2,3 năr ƀơ̆t rơmo ƀet vaccine bơ̆ng jĭ hơkar pơplei. Lăp ƀơ̆t chă ƀôh ưh kơ ‘lơ̆ng tơ̆ rơmo, ŭnh hnam yă hlôi krao ƀak si thú y năm khăm, ƀet si rôm, pơgang hơmet mă lei oei ưh kơ dă ƀiơ̆.

“Ƀơ̆t ƀet vaccine đang bơih ‘noh rơmo ưh kơ ‘meh sa, pơđĭ rơmo hơyơ kŭm jĭ yuh. Đei rơmo jĭ klak chroh đak găm ‘nhơ ‘nheng nhen đak dơ̆k loh, 2 tŏ đĭ lôch bơih. Pơlei nhôn đei dôm jĭt ŭnh hnam đei lơloh, mă lei đei 8 ŭnh hnam đei rơmo ưh kơ ƀet vaccine. 8 ŭnh hnam âu oei hmă ưh kơ đei kiơ hloi, oei dôm ŭnh hnam đei rơmo ƀet ‘noh tă kơ đei ƀôh thoi âu ngăl”.

Vaccine bơ̆ng jĭ hơkar pơplei đei ƀet tơ̆ rơmo iŏk đak toh lơ̆m 2 apŭng Đơn Dương păng Đức Trọng yua đơ̆ng Kŏng ti jang pơgang thú y Trung ương NAVETCO (anih bơ̆jang tơ̆ dêh char Bình Dương) gơh răt iŏk păng tĕch. Tơdrong ƀet bơ̆ng đei tơlĕch jang đơ̆ng ‘năr 22 truh 31/7/2024, hăm akŏp kơsô̆ hloh 10.000 kơ liêu. Lăp đei ƀôh rơmo iŏk đak toh đei jĭ păng lôch, dêh char Lâm Đồng hlôi pơdơh lê̆ ‘mơ̆i tơdrong ƀet vaccine.

Kiơ̆ kơ ƀok Nguyễn Văn Long, Kơdră Anih jang Thú y, iŏk đei tơroi rơmo iŏk đak toh tơ̆ Lâm Đồng jĭ păng lôch, kơsơ̆ ‘năr 7/8, kơdră chĕp kơ̆l Anih vei lăng găh Choh jang sa păng Hơtŏk tơiung tơring tơrang hlôi athei anih jang pơjing khŭl bơ̆jang truh hơlen lăng, tơlĕch jang dôm trong jang tang găn jĭ.

"Nhôn hlôi hơvơn dôm anih pơlong hơlen lăng ‘lơ̆ng hloh kơ anih jang thú y Việt Nam, dôm bơngai joăt jang hơgei hloh pơgơ̆r iŏk tơmam pham, ĭch vă băt hơdăh mă đei, lăng hơyơ ‘noh tơdrong tơm pơm ăn hơnhăk truh rơmo jĭ, đei lôch tơ̆ dêh char Lâm Đồng. Anih tơm kŭm hlôi đei athei, pơtho tôch kơ hơdăh dôm trong jang pơgơ̆r tơjră jĭ, trong vei lăng vă tơ jur kơsô̆ rơmo jĭ, tơjur kơsô̆ rơmo lôch.”

Kŭm hăm tơdrong tơgŭm đơ̆ng Anih tơm vei lăng găh Choh jang sa păng Hơtŏk tơiung tơring tơrang, dêh char Lâm Đồng kŭm hlôi akŏm đĭ jơhngơ̆m dŏng hơmet rơmo đei jĭ vă tơgŭm kon pơlei tơ jur hiong răm. Mă đơ̆ng thoi noh ră kơsô̆ rơmo đei jĭ păng lôch oei tŏk. Truh đĭ ‘năr 10/8, dêh char Lâm Đồng chih iŏk đei 4.495 tŏ rơmo iŏk đak toh đei jĭ păng 193 tŏ đĭ lôch, tŏk vă jê̆ 600 tŏ rơmo jĭ păng 21 tŏ rơmo đei lôch pơting hăm 1 năr hơdrol. Hơdai hăm tơdrong jang tang găn jĭ, dôm anih jang kơpal tŏk bŏk hơnơ̆ng hơlen lăng hơdăh tơdrong tơm pơm ăn jĭ tơ̆ rơmo iŏk đak toh tơ̆ Lâm Đồng.