Năng đơ̆ng kơpal, 18 ƀôt teh tơƀưh băl nhen thoi klŭp pơnhan tô xă hlŏh 30ha tơ̆ groi kông Si Pa Phìn ƀlĭk tôch kơ ‘lơ̆ng. Rim ƀôt đei chŏh pơm hơmet kiơ̆ bro chŭn ‘nhot vă pơtăm bơ̆n ‘nhot, ƀum, plei ‘long kiơ̆ pơyan hăm lơ hnam kơmĭl, hnam kơ lư̆i kơjăp ‘lơ̆ng.

Ƀok Vàng A Kỷ, Bí thư Đảng xăh Si Pa Phìn tơroi: đĭ đăng tơring âu adrol sơ̆ jĭ teh choh jang xa đei chĕng song ăn kon pơlei tŏk oei tơ̆ plei hle. Lơ̆m ‘măng pôk rĭ hnam kon pơlei tŏk oei tơ̆ plei hle tŏk bŏk sơnăm 1992, kon pơlei đei tơgŭm jang pơlong năng tơdrong pơtăm kơtao, pơtăm bri mă lei ưh đei iŏk yoa, kơtao pơtăm ưh đei hnam kơmăy rŏl sĭk, ưh đei bơngai răt; tơdrong jang pơtăm bri ‘nŏh ‘long chăt arih lăp tŏ sĕt đĕch yoa tĕh tŏ phang.

Tơdrong arih xa kơ kon pơlei Thái tơ̆ dôm plei hle nhen: Tân Lập, Tân Hưng, Chiềng Nưa, Tân Phong… yoa thoi nŏh kŭm tơƀâp lơ pơmat tat mưh pôm gơnơm đơ̆ng chŭn na ƀa đak păng chă jang thuê ăn kơ đe kiơ̆ pơyan. Pơngot rơvet tơngiĕt găng, pơm ăn lơ unh hnam mơlôh hŭt pơlei năm tơ̆ tơring kơdrâm chă jang kơ đe, kon hơ ‘lơ̆p ‘nŏh gơih ăn mĕ ƀă kră tơ̆ pơlei vei lăng, hnam krĕp krônh tang ‘măng, pơlei tơnuh kơtuei bơngai bơih roi pơsel hlŏh dơ̆ng.

Thoi noh ră, mă lei groi kông Si Pa Phìn hlôi tơplih ‘nao hăm lơ pơgar ‘nhot jing ‘lơ̆ng kiơ̆ pơyan. Kon pơlei đĭ băt trong pơtăm ‘nhot, pơtăm ‘long xa plei ‘lơ̆ng lơ̆m hnam kơ lư̆i, hnam kơmĭl. ‘Nhot, plei ‘long đơ̆ng Si Pa Phìn ưh lăp tĕch tơ̆ plt Điện Biên Phủ đĕch mă oei pơtruh măh mai ăn tơdrong sŏng xa rim năr kơ vă jê̆ 15.000 ‘nu hŏk tro oei tơ̆ hnam trưng tơ̆ apŭng Nậm Pồ păng hnam trưng ăn đe oh hŏk tro tơ̆ dôm xăh găh apŭng Mường Chà. 

Ƀok Vàng A Kỷ, Bí thư Đảng xăh Si Pa Phìn pơma: “Dar deh kon pơlei roi băt jang kiơ̆ khoa hŏk ki thuơ̆t lơ̆m tơdrong jang xa păng vă chă trong pơtho ăn kon pơlei jang hăm kơmăy kơmŏk tơ̆ dôm tơring đei tôm tơdrong ‘lơ̆ng găh teh păng đak vă pơih xă tơring teh pơtăm. Đơ̆ng noh tơgŭm ăn tơdrong arih xa kơ kon pơlei roi tŏk ‘lơ̆ng găh tơmam drăm, jang tŏk pơm pơdrŏng.”

Ƀok Ngô Xuân Chiến, Kơdră Anih vei lăng pơtho pơhrăm apŭng Nậm Pồ, bơngai pơchĕh đei trong jang pơtăm ‘nhot tơ̆ groi kông Si Pa Phìn tơroi: Ƀât Anih chĕp kơ̆l đảng apŭng Nậm Pồ tơlĕch tơdrong tơchơ̆t 56 găh atŏk tơiung tơring pơtăm ‘nhot, ƀum, plei ‘long rơgŏh ‘lơ̆ng, đơ̆ng 2023-2025, tơdrong mă blŭng đei tơchĕng truh ‘nŏh jĭ rou tơiung tơdrong choh jang xa tơ̆ groi kông Si Pa Phìn păng pơm ‘lơ̆ng ăn tơdrong sŏng xa măh tôm ăn hŏk tro tơ̆ tơring sơlam. Đon tơchĕng ‘nŏh đei kon pơlei, kơdră chĕp kơ̆l xăh kŭm hăm dôm ƀok pơgơ̆r pơlei tơ̆ Si Pa Phìn drơ̆ng nơ̆r tơgŭm hloi.

Gơnơm đei kon pơlei tơgŭm, đon jang tôch tơnăp đơ̆ng khul kơdră chĕp kơ̆l xăh Si Pa Phìn, teh tơtil, tơƀưh băl xă hlŏh 30ha tơ̆ groi kông âu đei pơjing. Vă đei đak tơruih ăn đĭ đăng pơgar chŭn ‘nhot lơ̆m pơyan phang, kon pơlei, khul kơdră pơgơ̆r tơring sir lơ sơlung mong đak, pơchoh đak đơ̆ng găh tu kiơ̆ thong Nậm Chim jur tơ̆ âu. Tŏk klăih đơ̆ng rim tơdrong pơmat tat, đơ̆ng khei 01/2024, chŭn ‘nhot hlôi pơtruh măh mai ‘nhot ăn tơdrong sŏng xa rim năr kơ hlŏh 15.000 ‘nu hŏk tro tơ̆ apŭng păng tĕch tơ̆ plt Điện Biên Phủ hai.

“Anih pơtho pơhrăm kŭm đei apŭng pơjao jĭ anih tơm pơgơ̆r hơlen năng rim tơdrong jang xa, ki thuơ̆t pơtăm ‘nhot vă pơm thoi yơ đĭ đăng ‘nhot tơ̆ tơring mưh chơ pơtruh ăn hnam gŏ pai xa atŭm ăn hŏk tro tơtă rơgŏh ‘lơ̆ng ngăl.”

Đơ̆ng chŭn ‘nhot Si Pa Phìn, lơ unh hnam hŏk đei dơ̆ng trong pơtăm ‘long, pơtăm ‘nhot ‘lơ̆ng kiơ̆ tơdrong hơgăt ‘nhot rơgŏh. Tơdrong kăl hlŏh jĭ dar dĕh pơm tơplih đon tơchĕng, trong jang xa.

Mŏ Lò Thị Phương, oei tơ̆ plei Tân Lập ăn tơbăt: rim khei mŏ iŏk đei jên khei vă jê̆ 7 triu, pơm ‘lơ̆ng ăn tơdrong arih xa păng rong kon hŏk. Ưh lăp hơdrô̆ mŏ Phương đĕch mă lơ bơngai hlôi hŭt lê̆ đon tơchĕng năm jang ăn kơ đe tơ̆ hơtăih vă vih jang xa kơtă tơ̆ pơlei kơdih. Dang ei jô̆ păh lăp 1 năr đei vă jê̆ 20 ‘nu bơngai jang ‘nŏh jĭ bơngai kon kông bơ̆ jang lơ̆m pơgar chŭn ‘nhot, lơ̆m pơyan kăt tĕch, đei truh 50 ‘nu bơngai vang bơ̆ jang.

“Gơnơm đei đe kăn ƀô̆ xăh pơjing đei chŭn ‘nhot, chă tơdrong jang sơđơ̆ng ăn kon pơlei mă nhôn đei tơdrong arih xa ‘lơ̆ng, kon hơ ‘lơ̆p đei năm hŏk ưh pă pơngơ̆t găh jên hŏk kiơ bơih. Chŭn ‘nhot âu pơtăm ‘nhot tôch rơgŏh kơna tơ̆ hnam kŭm kăt iŏk pai xa ‘nhot đơ̆ng âu.

Groi kông Si Pa Phìn dang ei hlôi tơplih 'nao 'lơ̆ng, ƀlĭk ƀlăk 'nhot jing prăt sơnăm. Đơ̆ng chŭn 'nhot âu, đon hơpơi 'mĕh tŏk klăih đơ̆ng tơnuh hin kơ kon pơlei lơ̆m xăh kŭm tŏk kiơ̆, hăm đon vă jang iŏk chŭn na, teh bri jang xa ưh gan đei pơm chŭn 'nhot, pơih xă teh pơtăm 'nhot, pơtăm ƀum vă tơgop kŭm hăm khul kơdră tơring adrin jang đang 'lơ̆ng tơdrong hơgăt truh hơtuch sơnăm 2024 tơjur tơnuh hin lơ̆m xăh pă 32%, tơplih ăn kơsô̆ hlŏh 40% hlôi đei hơnơ̆ng lơ̆m lơ sơnăm âu ki tơ̆ tởỉng pơmat tat âu.