Bơngai  nhan kơ khua hŏk kŏng ngê̆ păng adoi đei tơm a hla chă đơ̆ng tơring pơmơ̆t krong đak, hlôh vao hơdăh dôm tơdrong tơnap tap kơ kon pơlei, khul boăl mơlôh kơ hnam trưng Đăi hŏk Kŏng ngĭp pơlei tơm HCM hlôi akŏm pơjing tơdrong jang “TRong jang kiơ̆ choh jang xa jơk 'lơ̆ng”(ECO-HOUSE) vă tơgŭm kon pơlei jang mir gơh iŏk yua khua hŏk kŏng ngê̆ ăh rim anih yơ vă hơlen đei dôm tơdrong tơrĕk truh pơyan pơm jang. 'Nâu adoi jing tơdrong jang đei jơnei tơnăp hloh kơ đe sinh viên lơ̆m tơdrong pơlong “Hŏk tro, sinh viên hăm tơdrong iung pơm jang” 'măng mă 5 kơyuơ Anih tơm Pơtho Pơhrăm pơgơ̆r

Tơdrong pơkăp vă jang ECO-HOUSE đei 3 sinh viên lơ̆m 3 tơdrong hŏk jang phara băl noh Hồ Thanh Huy, kơdră khul, sinh viên xơnăm mă 4 khua Kŏng ngê̆ điê̆n tưh, Lê Hoàng Minh Châu - xơnăm mă 4 khua Kuan trĭ kinh doanh păng Trần Thị Trâm (xơnăm mă 3 khua Tĕch pơdro – Tơmang pơhiơ̆) hăm tơdrong chơng pơtho đơ̆ng Thak sih Thái Duy Tùng (pơtho tơ̆ khua Tai chĭnh ngân hang) pơm jang. Nhen lĕ 3 tơdrong hŏk jang ưh đei tơrĕk hăm dih băl, mă lei 3 sinh viên hlôi tơguăt dih băl vă pơjing minh tơdrong pơkăp vă jang găh choh jang xa, jang găh bri, rong ka hơdang.

Tơmam drăm mă khul pơm tơlĕch đei noh kơmăi iĕ 'măn ăh pơgar hnam tơguăt hăm iŏk yua điu khiên đơ̆ng ataih hăm điê̆n thoăi, lơ̆m noh akŏm hơlen dôm kơsô̆ kăp gĭt nhen hơyuh tô̆, tơdrong hơ-iuch, đak, kơchơ̆t 'lơ̆ng lơ̆m teh, pơkăp N-P-K, đô̆ pH,... Đơ̆ng noh vă băt hơdăh tơdrong ưh 'lơ̆ng păng kơchăng dăh tơroi hơmet tơtom, tơjur ƀiơ̆ tơdrong răm hăm bơngai jang mir, tơjră hăm hơyuh tô̆ 'mi tơplih, hơtŏk tơdrong pơyua păng mong ƀiơ̆ unh hơyuh păng đak...

Sinh viên Hồ Thanh Huy ăn tơbăt, kiơ̆ chă hơlen, rim bơngai jang pơgar, bơngai jang mir dang ei tŏk bŏk đei tơroi dôm tơmam drăm đei pơm tơlĕch đơ̆ng Trung Quốc, ưh đei 'lơ̆ng hăm bơngai jang mir. Kơyuơ khul nhôn hlôi pơm tơlĕch tơmam drăm ƀônh yua, rim bơngai adoi gơh yua ngăl. Đe boăl adoi băt hơdăh athei iŏk yua dôm tơdrong đei hŏk vă yua kŏng ngê̆ lơ̆m choh pơtăm, tơgŭm ăn kon pơlei jang mir hơtŏk kơjă tơmam choh pơtăm păng tang găn tơdrong đei yua găh choh pơtăm mă lei hiong kơjă, ƀơm đe pơdro pơđep kơjă. Thanh Huy tơroi: “Nhôn tih vơ̆ đơ̆ng tơring choh jang xa, đei rơneh păng tih vơ̆ tơ̆ tơring Pơmơ̆t, nhôn ưh đei jang mir mă lei nhôn băt hơdăh trong jang mir noh thoi yơ. Atŭm hăm noh inh oei đei boăl hŏk găh choh pơtăm, đe boăl kơchăng chă tơgŭm nhôn vă pơm tơlĕch tơmam drăm tơgŭm ăn kon pơlei jang mir. Kơyuơ noh nhôn nbăm trong klăh vă chă trong hiôk pơm jang kơtă tơ̆ tơring kơdih po hloi”

Gơnơm kiơ̆ tơdrong chih răk rim năr găh choh pơtăm, ECO-HOUSE gô tơlĕch trong jang “choh pơtăm tơmam 'lơ̆ng ưh đei pơngơ̆t hăm rơgoh” gơnơm kơmăi kơmŏk 'nao IoAT (Internet tơmam drăm) hăm lơ tơdrong rơih iŏk. Hơdăh nhen tơdrong pơkăp vă jang tơguăt hăm tơchơ̆t  "Jơgơ̆l đak, ƀar phŏng, pêng kăl" mă hơtŏ noh xek tơlang đei dôm tơdrong kăp gĭt găh ruih mong ƀiơ̆ đak, hơlen kơchơ̆t 'lơ̆ng lơ̆m teh dăh mă keh kong  ruih mong đak, kơchơ̆t 'lơ̆ng ăn 'long pơtăm, trong jang tôm ăn 'long pơtăm đei kơjă trŏ ƀlep kơ rim bơngai jang pơgar.

Sinh viên Lê Hoàng Minh Châu jang lơ̆m khul tơroi, dôm bơngai đei yua đơ̆ng pơkăp vă jang noh kon pơlei jang mir păng rim hơp tak xăh, tơ̆ anăp hơlen hăm minh ƀar hơdrĕch 'long pơtăm nhen sâu riêng, plei tăo, krô̆i pung tơ̆ Tiền Giang, Bến Tre păng pơgar pơkao tơpông tơ̆ Vũng Tàu. Lơ̆m tơdrong pơm jang, đe boăl adoi ƀơm lơ tơnap tap nhen tam mă hlôh vao kloh klĕch găh tơring tĕch răt, tam mă hlôh vao hơdăh găh rim hơdrĕch 'long pơtăm, kơyuơ noh đe boăl adoi kăl chă hơlen trong pơm jang vă tơlĕch trong jang tơnăp hloh: “Dang ei kon pơlei oei pơngơ̆t kơ đon găh tơdrong iŏk yua, đon kơchĕng iŏk yua hlôi đei mă lei tơdrong tơplih đơ̆ng tơdrong jang xo hăm tơdrong jang 'nao noh kon pơlei oei pơngơ̆t. Đơ̆ng noh nhôn tơlĕch trong jang gơnơm đơ̆ng dôm tơdrong jang xo vă hơtŏk đĕch, ưh kơsĭ xut lê̆ pơđĭ dôm tơdrong jang xo ôh”

Kiơ̆ Thak sih Thái Duy Tùng, bơngai pơtho chih akŏm đê tai akhan, tơdrong phara kơ pơkăp vă jang âu pơtêng hăm lơ đê tai noh jing tơdrong mă đe boăl sinh viên hlôi tơrĕk hăm tơdrong jang tơpă vă hơlen jang tơ̆ rim hơgăt teh, hơlen băt rim trong juăt jang đơ̆ng kon pơlei. Mă dôm bơngai jang lơ̆m khul ưh juaih găh tơdrong choh pơtăm mă lei kơlih hơrih tơm tơ̆ tơring Pơmơ̆t, tơguăt hăm tơdrong hŏk hơlen găh choh jang xa păng đei hloi tơdrong tơgŭm đơ̆ng đe sinh viên tŏk bŏk hŏk găh tơdrong choh jang xa tơ̆ Đăi hŏk Tiền Giang, đe boăl hlôi đei iŏk jơnei nhen 'năr âu: “Tơdrong đei ƀôh dang ei noh ăh chă bơngai răt noh oei ƀơm tơnap tap kơlih tam mă đei hơnăn tơm, mă lei đe boăl adoi đei lơ tơdrong juăt hăm dôm var pơgar, hơpơi 'meh khei năr anô̆ anăp kơnh đe boăl gô brư̆ brư̆ tơrĕk đei hăm tơring tĕch răt tơjê̆ hloh”

Hăm pơkăp vă jang âu, khul pơm jang hơpơi 'meh hơtŏk păng chă đei đơ̆ng lơ tơdrong ưh adrô̆ đơ̆ng tơmam drăm pơm tơlĕch mă ataih hloh dơ̆ng, vă pơm tơlĕch păng đei trong jang, đơ̆ng tơmam pơtăm đei yua păng dôm tơmam drăm sinh hŏk. Hơpơi 'meh đơ̆ng khul jang noh hơtŏk kơjă tơmam drăm Việt, tơbang hơdăh dôm kơsô̆ pơkăp găh choh pơtăm vă bơngai răt băt hơdăh tơmam drăm đei pơtăm tơ̆ yơ, tơdrong rơgoh thoi yơ, hăm đe lơ kơchơ̆t hoă hŏk lơ̆m teh dăh mă ưh. Sinh viên Hồ Thanh Huy chơt hơ-iă tơroi: "Nhôn chă pơhle hăm dih băl noh dôm bơngai tĕch 'nhot, nhôn tĕch tơmam choh pơtăm păng đei trong jang 'nao vă tơgŭm ăn tơdrong tĕch hlot tơmam choh pơtăm âu, hơpơi 'meh gô đei jơnei păng tơring tĕch răt gô xơng drơ̆ng lơ hloh”

TS Nguyễn Quốc Cường, Phŏ Kơdră Khua Tĕch pơdro – Tơmang pơhiơ̆ kơ hnam trưng Đăi hŏk Kŏng ngĭp pơlei tơm HCM xơkơ̆t hơdăh, âu jing đê tai 'lơ̆ng tơgŭm ăn bơngai jang mir pơm jang tơnăp hloh lơ̆m tơring po kơdih păng vei 'lơ̆ng cham char, tơjur ƀiơ̆ tơdrong yua phŏng hoă hŏk, pơgang hơdrông: “Găh khua, noh khua gô tơgŭm găh tơdrong juăt jang vă ăn đe boăl pơtoi kiơ̆ tơdrong pơkăp vă jang âu jing anih jang mŭk drăm spin-off pơyua kăp gĭt ăn kon pơlei pơm jang, mă kăl noh dôm bơngai jang găh choh pơtăm kiơ̆ kih thuơ̆t 'nao rơgei”

Dôm tơdrong pơkăp iung pơm jang đơ̆ng hŏk tro, sinh viên 'meh đei “hơrih” păng hơtŏk hloh dơ̆ng, đe boăl adoi kăl đei tơdrong xơng drơ̆ng, đei tơgŭm ưh adrô̆ đơ̆ng hnam trưng mă oei đei đơ̆ng tơpôl hloi. Đơ̆ng noh gơh pơm hơtŏk ăn lơ hloh dơ̆ng dôm đê tai iung pơm jang, tơgop ăn tơdrong hơtŏk tơ-iung kơ teh đak.