Jĭ unh hnam bơngai Khmer tơnuh, 2 ‘nu klo kăn mŏ Huỳnh Thị Cẩm Tú păng ‘nhŏng Thạch Thường tơ̆ plei Vĩnh Thanh, xăh Vĩnh Quới chông băl tŏk tơ̆ Bình Dương pơm công nhân. Ƀât jĭ Covid-19 tơpŏh lanh lơ̆m sơnăm 2021, klo kăn ‘nhŏng vih dơ̆ng tơ̆ hnam, đei mĕ ƀă chĕng song teh pơm hnam jur kơdih, chă jang thuê ăn kơ đe. Dôm sơnăm âu ki, ưh đei gre yak vih vât kơna tơdrong jang xa tơƀâp lơ pơmat tat. Yoa thoi noh, mưh đei tơgŭm 10 triu hlak jên vă tơplih ming tơdrong jang, klo kăn ‘nhŏng răt gre hon đa vă đei gre yak vih vât hai, đei gre chơ tĕch bơ̆n plei ‘long hai.

Mŏ Huỳnh Thị Cẩm Tú, ăn tơbăt, gơnơm đei gre mă tơdrong tĕch mơdro kơ unh hnam roi hiôk hian ƀiơ̆: “Unh hnam jang xa đei iŏk yoa ưh kơ sơđơ̆ng, ưh đei jên jang lơ, ưh đei gre chơ vă năm tĕch mơdro, mă lei đei teh đak tơgŭm ‘nŏh răt đei 1 tong gre vă chơ tĕch tơmam, dang ei jing tơplih tĕch mơdro hloi bơih. 1 khei kŭm chă đei 7-8 triu hlak, tĕch bơ̆n pia, mưh truh pơyan pia ‘nŏh ba chă tĕch tơmam nai dơ̆ng, nhen bơ̆n ƀum, plei đak tŏh, plei ôi. Unh hnam tôch bơnê kơ Đảng, teh đak hlôi tơgŭm ăn oh 1 kơsô̆ jên vă unh hnam chă tĕch mơdro, 2 ‘nu klo kăn măr nhi vă drin jang tŏk klăih đơ̆ng tơnuh, oh hơmĕng gô đei tơdrong arih xa hiôk hian ƀiơ̆.”

Oei yă Sơn Thị Lùng, tơ̆ plei Vĩnh Thành, xăh Vĩnh Quới, hăm kơsô̆ jên 10 triu đei tơgŭm đơ̆ng Tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông, yă răt 1 pôm nhŭng yŏng, pơm hơmet hơdrong nhŭng so păng răt tơmam hiĕm nhŭng lơ̆m dôm khei blŭng. Tơgech iŏk teh pơgar găh rŏng hnam, yă pơtăm dơ̆ng bơ̆n ‘nhot vă hiĕm nhŭng. Đơ̆ng rŏng vă jê̆ 4 khei rong, yă pơtơm vă tĕch nhŭng mă blŭng, hăm 13 tŏ nhŭng kon, rŏ năng gô iŏk đei dang hlŏh 20 triu: “Đei tơgŭm thoi âu inh bơnê lơ dêh. Dang ei nhŭng su đei hlŏh 10 tŏ kon, inh tĕch pơđĭ hloi. Inh rong tôch hơlen, jên đơ̆ng rong nhŭng kŭm tơgŭm ăn unh hnam đei tơdrong arih xa sơđơ̆ng ƀiơ̆.”

Tơdrong tơgŭm lơ̆m tơdrong arih xa, tơplih ming tơdrong jang ăn kon pơlei kon kông dôm sơnăm tơjê̆ âu đei thĭ xăh Ngã Năm, dêh char Sóc Trăng bơ̆ jang ‘lơ̆ng păng đei yoa. Khei ‘năr âu ki, thĭ xăh akŏm jơhngâm hơtŏk hrĕnh tơdrong bơ̆ jang dôm tơdỏng jang đơ̆ng Tơdrong jang tơm kơ teh đak atŏk tơiung mŭk drăm, tơpôl tơ̆ tơring kon kông păng groi kông đơ̆ng 2021 - 2030, lơ̆m noh, đei tơgŭm tơplih ming tơdrong jang ăn kon pơlei kon kông, dar dĕh tơgŭm ăn unh hnam kon kông tơnuh đei dơ̆ng tơdrong ‘lơ̆ng vă jang xa, pơm hơtŏk iŏk yoa, dar dĕh jang tŏk, pơm sơđơ̆ng tơdrong arih.

Truh dang ei, đơ̆ng tơdrong tơgŭm teh oei 1 unh hnam hăm kơsô̆ jên 44 triu; tơgŭm hnam oei ăn 35 unh hnam hăm kơsô̆ jên hlŏh 1,5 ti; tơgŭm tơplih tơdrong jang ăn 87 unh hnam hăm kơsô̆ jên hlŏh 767 triu; tơgŭm đak yoa rơgŏh ăn 9 unh hnam hăm kơsô̆ jên 27 triu. ‘Ngoăih kơ ‘nŏh, tơring oei bơ̆ jang 2 trong jang tơgŭm atŏk tơiung choh jang xa, tơlĕch lơ trong jang lơ̆m tơpôl, đei hloi trong rong Sim Phalăng, rong ‘mon tơ̆ plei Vĩnh Thuận, xăh Vĩnh Quới păng trong rong sim Phalăng tơ̆ plei Long Thành, xăh Tân Long hăm kơsô̆ jên hlŏh 343 triu păng hơnơ̆ng tơlĕch jang, pơih xă tơdrong jang lơ̆m sơnăm 2024.

Ƀok Huỳnh Văn Lơ, Kơdră Anih vei lăng bơngai jang xa, linh jĭ rơka păng tơpôl thĭ xăh Ngã Năm ăn tơbăt: “Hơnơ̆ng roi tơƀôh ăn Anih vei lăng kon pơlei thĭ xăh, tơlĕch jang tôm trong jang, păng bơ̆ jang tôm tơdrong tơgŭm kiơ̆ tơdrong jang tơjur tơnuh hin kơjăp ‘lơ̆ng, tơdrong jang atŏk tơiung mŭk drăm tơpôl tơ̆ tơring kon kông păng groi kông, kơchăng tơplih ming tơdrong jang, pơtho tơdrong jang ăn bơngai jang tơ̆ tơring tơrang vă bơngai jang tơ̆ tơring tơrang bơ̆ jang gơh, vang jang xa hơnhăk ăn iŏk yoa mŭk drăm lơ ăn unh hnam.”

Tơdrong tơgŭm chĕng song teh oei, hnam oei, teh choh jang xa, tơplih ming tơdrong jang păng pơtruh đak yoa rơgŏh tôch gĭt kăl, vă pơjing tơdrong hiôk hian ăn dôm unh hnam Khmer tơnuh gơ̆h sơng iŏk, tơplih ming tơdrong jang, pơm hơtŏk tơdrong arih, đei tơdrong arih xa hiôk jơnap ƀiơ̆. Yoa thoi noh, tơdrong jang đei tơlĕch tơ̆ dêh char Sóc Trăng pơma atŭm păng thĭ xăh Ngã Năm pơma hơdrô̆ oei tơlĕch jang tôch pơnĕh, trŏ bơngai, tôch tơtom vă dôm unh hnam đei tơdrong ‘lơ̆ng, jang tŏk, vang tơgop pơm tơplih um ai, tơdrong arih xa găh mŭk drăm – tơpôl tơ̆ tơring kon kông tơ̆ hơnăp kơnh./.