Dôm năr âu ki, ŭnh hnam mŏ Hoàng Thị Duyên, oei tơ̆ xăh Phúc Thọ, apŭng Lâm Hà (Lâm Đồng) akŏm vei lăng, pơ ro đak tơ ruih mă lăp đơ̆ng dơnâu mong đak iĕ vă vei sơđơ̆ng pơgar cheh phe chôh pơkao, kơ tĕn plei păng bluh jing ‘lơ̆ng. Mŏ Duyên tơbăt: “Khei ‘năr âu ‘noh gĭt kăl hloh, athei vei lăng săy mơ̆r, tơruih đak ăn kơ ‘long mă vei sơđơ̆ng chôh pơkao păng kơ tĕn plei, ‘long bluh jing ‘lơ̆ng. jang sa đei lơ hloh ‘noh tơgŭm ŭnh hnam iŏk yua tŏk lơ ƀiơ̆, tơdrong arih sa chhôk hơ iă ƀiơ̆.”

Kiơ̆ kơ ƀok Vũ Bá Yêu, Phŏ kơdră Anih vei lăng găh choh jang sa păng hơtŏk tơiung tơring tơrang apŭng Lâm Hà, dang ei ‘noh khei ‘năr gĭt kăl tơchơ̆t truh plei lơ păng ‘lơ̆ng đơ̆ng pơyan jang cheh phe 2023-2024. Tơdrong nai, tŏ ‘mi kial lơ̆m tơring pơ tơm đei ƀôh tŏ hang, tŏ hlơ hlĕng, tơroi hơdrol khei ‘năr tŏ dêh tŏk bŏk vă jê̆ truh, kơ na tơdrong jang tang găn tŏ phang pơđang roi đei anih jang tŭn pran: “Tŏk bŏk athei pơ ro ‘lơ̆ng dôm đak tơruih kiơ̆ trong tơlĕch jang tang găn tŏ phang kơ apŭng. Dang ei hlôi mong akŏm đei đak tơruih tơ̆ dôm dơnâu mong đak păng dôm dơnâu đak iĕ vă vei sơđơ̆ng pơyua ăn đak tơruih 1 trong ‘lơ̆ng hloh.”

Cheh phe ‘noh jĭ 1 lơ̆m dôm ‘long pơtăm tơm kơ dêh char Lâm Đồng, hăm teh să hloh 170.000ha, akŏm găh lơ tơ̆ dôm apŭng Lâm Hà, Di Linh, Đức Trọng păng Bảo Lâm. Vă vei sơđơ̆ng hơ nhăk ăn đei yua jang sa, kon pơlei jang chŭn mir păng khŭl kơdră tơring ‘nâu tŏk bŏk tơlĕch dôm trong jang tang găn tŏ phang.

Tơ̆ Kon Tum dang ei đei 178 tơdrong jang, lơ̆m noh đei 73 dơnâu mong, 98 pơ nơ̆ găn đak păng 7 hơnih ƀôm đak yua đơ̆ng anih jang âu vei lăng oei tŏk bŏk vei sơđơ̆ng đak tơruih ăn kơ hloh 16.600 hek tar ‘long pơtăm dôm kơloăi. Mă lei, yua đơ̆ng 1,2 tơdrong jang pơ ro đak pơ mơ̆ng lơ̆m đak truh kơ na lơ tơdrong gô hơ mơt kơ đei ƀôh tơdrong ưh kơ măh đak tơ ruih lơ̆m hơtuch pơyan jang. Ƀok Nguyễn Hữu Nghĩa, Kơdră anih jang Ki thuơ̆t, Anih vei lăng - iŏk jang dôm tơdrong jang dơnâu mong đak dêh char Kon Tum tơbăt, đơ̆ng dang ei truh hơtuch pơyan tŏ lơ̆m dêh char đei 19 tŏ dơnâu mong đak hăm 250hek tar ‘long pơtăm, ‘noh đei 74hek tar ƀa đak păng 176hek tar ‘long kăp gĭt đunh năr rŏ lăng đei tŏ phang pơđang: “Hăm dôm dơnâu mong đak Anih vei lăng hlôi pơgơ̆r kôch hơmet hơbong iŏk đak păng pơchoh đak ro vei sơđơ̆ng đak lơ̆m đing. ‘Ngoăih kơ ‘noh tơdăh đei ƀôh tŏ phang ‘noh anih jang hlôi hơmet kơ măy ƀôm đak tơgĕch yua đak mong đơ̆ng dơnâu ƀôm lơ̆m hơbong vă pơyua ăn tơruih. Hăm dôm dơnâu bơ̆ găn đak mă ưh kơ măh, Anih jang kŭm hlôi hơmet ăn dôm kơmăy ƀôm vă ƀôm đak đơ̆ng dôm đak glung pơro lơ̆m hơbong vă pơyua ăn tơruih ăn kon pơlei.”

Găh tơdrong jang tang găn ŭnh sa bri pơyan tŏ, Anih vei lăng bri ‘long dêh char Kon Tum tơbăt: dang ei đei 7 hơnih lơ̆m dêh char tơdra hơdrol ŭnh sa bri tôch kơ krê hơmơt. Lơ̆m akŏp kơ sô̆ hloh  610.600hek tar bri dang ei đei kơ dêh char, teh bri đei băt hơdăh ƀônh kơ ŭnh sa bri ‘noh 227.000hek tar. Hơdrô̆ 4 apŭng păh pơmơ̆t, ‘noh: Ngọc Hồi, Đăk Tô, Sa Thầy păng Ia H'Drai đei hloh 96.100hek tar bri hơmơt kơ ŭnh sa tôch kơ dêh. Ƀok Nguyễn Văn Nam, Phŏ kơdră Anih vei lăng găh bri ‘long dêh char Kon Tum tơbăt: “Tơ ‘ngla bri kơchăng, khŭl kơdră tơring đei trong jang athei rim khŭl linh jang hơdai păng tơgŭm. Dôm anih jang tơ ‘ngla bri ‘noh jĭ dôm hơnih jang, hơtŏk loi dơ̆ng tơdrong jang roi tơbăt hơdrol, vei lăng bơngai mơ̆t lơ̆m bri. Mă loi ‘noh jĭ gak tơ̆ dôm hơnih răp gak. Băt hơdăh, roi tơbăt kơ dôm ŭnh hnam kon pơlei đei choh jang tơ̆ mir roh mă jê̆ teh bri ‘long. Hăm dêh char khŭl jang tơgŭm tơdrong jang kơ Anih pơgơ̆r jang ‘noh jĭ Anih vei lăng bri ‘long hơnơ̆ng athei nhôn pơ jing trong tơlĕch jang vă năm hơlen lăng hơdai hăm jang hơdai păngathei jang ‘lơ̆ng tơdrong jang tang găn ŭnh sa.”

Oei tơ̆ Lâm Đồng, jĭ tơring đei lơ hơgăt bri hơngo păng dôm kơloăi bri ƀônh kơ ŭnh sa, hăm akŏp teh xă hloh 513.000 hek tar. ‘Nao blŭng pơyan tŏ mă lei dêh char hlôi đei ƀôh 3 ‘măng ŭnh sa ‘long kư̆ kă tơ̆ hơla bri. Gơnang đơ̆ng chă ƀôh păng pĭt ŭnh tơtom kơ na ưh kơ pơm ăn hiong răm găh bri. Dang ei ‘năr tơ̆ Lâm Đồng tŏk bŏk tŏ hang, tŏ hlơ hlĕng, hơmơt đei ƀôh ŭnh sa tôch kơ dêh. Anih vei lăng kon pơlei dêh char Lâm Đồng hlôi tơlĕch lơ hla ar athei dôm anih jang kơpal ưh kơ gơh pơm pơ hơi, akŏm tơlĕch jang hrơ̆ch 1 ‘măng lơ trong jang tang găn ŭnh sa bri.