Tơdrong jang mŭk drăm mât hơdai băl tôch kơjăp, tơdrong pơjing hơnăn tơmam roi kăl hlŏh dơ̆ng. Tơdrong tơm ‘nŏh pơjing hơnăn tơmam vă chih tơbăt khei ‘năr gĭt kăl, mă loi hăm hơnăn ‘lơ̆ng hơiă, 1 um rup ‘lơ̆ng păng kơjă kăp gĭt hlŏh mă tơmoi gơ̆h băt kơnăl tơchĕng truh tơmam ‘nŏh dăh mă tơdrong pơvih ‘nŏh. Gơnơm thoi noh anih tĕch mơdro gơ̆h tĕch tơmam ‘nŏh hăm yă măk ƀiơ̆, hơnhăk ba lơ kơjă kăp gĭt ƀiơ̆.

Tơdrong kăl đei chih răk tơ̆ yăn âu đơ̆ng lơ teh đak lơ̆m apŭng plenh teh ăn ƀôh, vă jang đei tơdrong tưk tơiung tĕch mơdro tơmam ‘lơ̆ng tơ̆ tơring tĕch tơ̆ teh đak đe, kăl tơrek truh tơdrong chih pơjing, vei lăng mă ‘lơ̆ng hơnăn tơmam. Tơ̆ Việt Nam, mă đơ̆ng hlôi đei trong jang chih pơjing hơnăn tơmam ăn dôm tơmam đơ̆ng choh jang xa đei vă tĕch tơ̆ teh đak đe. Mă lei, tơdrong ‘nâu lăp jang pơgia atŭm atŭm đĕch, tam mă rơđăh rơđong kiơ. Dôm tơmam đei răh rai tơ̆ dôm tơdrong tơchơ̆t, tơdrong jang, tam mă đei trong jang hơdai, pơgơ̆r vei lăng đơ̆ng dôm anih ƀơm truh…Kơlih thoi noh, tơdrong pơjing hơnăn tơmam truh dang ei tam mă iŏk đei nhen thoi ‘mĕh vă.

Nhen thoi hăm phe, Việt Nam jĭ teh đak tĕch phe lơ mă 3 lơ̆m apŭng plenh teh, mă lei lơ phe đơ̆ng Việt Nam lăp tĕch hăm tơpu, kơƀi kok, ưh đei kơmak, truh tơ̆ teh đak đe ‘nŏh đei pơm hơmet tơpu, kơƀi, pơklĕm lô gô hơnăn anih tĕch mơdro đơ̆ng tĕh đak đe đang kơ ‘nŏh tĕch tơ̆ ‘ngoăih. Yoa thoi noh hơnăn phe Việt Nam oei tam mă đei lơ bơngai răt yoa tơ̆ dôm teh đak băt truh.

Ƀok Phan Minh Thông, Kơdră chĕp kơ̆l Khul vei lăng, Kơdră pơgơ̆r Grŭp jang Phúc Sinh akhan: “Bơ̆n đei băt truh jĭ teh đak tĕch tơmam tơ̆ teh đak đe lơ mă lei bơ̆n ưh đei băt truh nhen thoi teh đak tĕch tơmam tơ̆ teh đak đe tơm, đei tôm hơnăn tơmam. Dôm hơnăn tơmam đei ư hơnhang lơ̆m apŭng plenh teh ưh đei hơnăn đơ̆ng Việt Nam.”

Kiơ̆ dôm bơngai juăt jang mŭk drăm, Việt Nam tĕch pơtruh lơ tơmam đơ̆ng choh jang xa ăn apŭng plenh teh, mă lei tơdrong kăl ‘nŏh athei rơih đei tơmam ‘lơ̆ng, kĕ pơjei hăm đe vă chih pơjing hơnăn ăn tơmam. Đei tơmam ‘lơ̆ng kơdih bơih athei đei tơdrong hơgăt ‘lơ̆ng ‘năi păng athei đei trong roi tơbăt marketing đơ̆ng teh đak hai…

Tơdrong tôch sơ ‘ngon hrei ‘nâu, mă đơ̆ng 1,2 hơnăn tơmam đơ̆ng choh jang xa lơ̆m teh đak kŭm tôch ‘lơ̆ng ră mă lei anih tĕch mơdro ưh đei tôm jên vă pơjing tơring pơtăm tơmam pơyoa ăn tơdrong tĕch tơ̆ teh đak đe. Tơdrong ‘nâu athei đei tơdrong tơrĕk mă lơ ƀiơ̆ đơ̆ng anih jang kơ teh đak, đei trong tơgŭm mă lăp vă anih tĕch tơmam đơ̆ng choh jang kĕ jang tŏk. Nơ̆r pơma đơ̆ng ƀok Lê Thanh Hoà – Phŏ Kơdră Anih vei lăng tơmam ‘lơ̆ng mưh pơm tơlĕch păng pơih xă anih tĕch mơdro, găh Anih tơm vei lăng choh jang xa păng atŏk tơiung tơring tơrang:

“Kơdih kâu dôm anih tĕch mơdro Việt Nam tơtă anih tĕch mơdro iĕ păng păh lăp ngăl, kŭm nhen bơ̆n ưh đei jên jang, bơ̆n ưh gan đei đon hlôh vao tôm tĕch lơ̆m tơdrong tĕch mơdro xa, mă loi jĭ tĕch mơdro hăm apŭng plenh teh. ‘Nâu jĭ dôm tơdrong tam mă pran ‘lơ̆ng, mă inh tơchĕng tơ̆ hơnăp kơnh bơ̆n athei hơmet mă ‘lơ̆ng ƀiơ̆ vă gơ̆h mât jang xa hơdai âu. Bơ̆n pơtruh lơ tơmam ăn dôm anih pơm tơlĕch, tĕch mơdro tơmam xa tih lơ̆m apŭng plenh teh mă lei tơmam mă hơtuch tơtă ưh đei chih kơmak Made in Việt Nam. ‘Nâu jĭ tơdrong ưh đei yoa kiơ vă anih vei lăng teh đak tơrek truh đơ̆ng noh đei trong tơgŭm ‘lơ̆ng ƀiơ̆ găh jên jang, anih jang, trong, pơm thoi yơ vă dôm anih tĕch mơdro kĕ pơm tơlĕch tĕch mơdro tơmam ‘lơ̆ng ăn apŭng plenh teh hăm hơnăn đơ̆ng teh đak Việt Nam.”

Kiơ̆ ƀok Trần Văn Trung – Kơdră chĕp kơ̆l Công ty jang hơdoi Hải Âu Việt, pơjing hơnăn ăn tơmam choh jang xa Việt ‘nŏh jĭ tơdrong tôch gĭt kăl. Hơdai hăm ‘nŏh, anih tech mơdro păng anih jang kơpal athei tơrek truh tơdrong tơgŭm ăn hơnăn tơmam hai. Tơdrong ‘nâu gô tơgŭm ăn dôm anih tĕch mơdro găn tôch ai tơdrong hiong răm mưh iŏk yoa hơnăn, kơmak ưh trŏ luơ̆t đơ̆ng dôm anih jang nai. Đơ̆ng noh gơ̆h vei lăng ‘lơ̆ng bưng ai, tơdrong ư hơnhang đơ̆ng hơnăn tơmam tơ̆ anih tĕch mơdro.

“Kơtă hăm anih tĕch mơdro đơ̆ng Tơring găh Tu tĕch tơ̆ tơring Pơbăh đĭ đei ƀôh phe ST25 tĕch hăm yă kư̆ kă đơ̆ng 150.000. Oei sơ̆, pơtih gia phe đơ̆ng Tơring găh Tu phe Hải Hậu đei ư hơnhang tơ̆ yơ tơ̆ yơ kŭm hơtol tĕch phe Hải Hậu. Đe sư tĕch păng bơngai răt kŭm chu răt iŏk tơmam ưh kơ trŏ. Mă 2 jĭ dôm anih tĕch mơdro ưh đei năng kăl tơdrong vei lăng hơnăn tơmam, klĕp truh đei tơdrong kơnh kơdih kâu ưh kơ gơ̆h vei lăng tơmam kơdih”

Dôm bơngai juăt jang akhan, tơdrong jang kăl hlŏh jĭ athei đei hơnăn atŭm ăn tơmam đơ̆ng choh jang xa kơ Việt Nam păng athei chih pơjing đei logo hai. Găh dôm anih tĕch mơdro tơmam đơ̆ng choh jang xa tơ̆ teh đak đe athei pơm lăp hăm dôm nơ̆r athei đơ̆ng anih răt ‘năi, athei pơgơ̆r jang pơm tơlĕch đei tôm tơmam, ‘lơ̆ng, yă tĕch lăp. Tơrek truh tơdrong pơgơ̆r jang xa vă pơjing đei tơring pơtăm tơmam sơđơ̆ng hăm rim kơloăi tơmam ‘lơ̆ng đơ̆ng choh jang xa.