Năr tơjê̆ Têt Nguyên đăn 2023, tơ̆ tơring mir xă hloh 13 ha tơ̆ pơlei Ea Bráh, xăh Ea Sô (Ea Kar), ƀok Võ Quốc Dỵ atŭm hăm 10 ‘nu jang tŏk bŏk hăt hot oei koh kơtao, akŏm jing hơchô̆ vă hơchơ̆k tơ̆ gre chơ ‘nhăk vih tĕch ăn hnam kơmăi. Ƀok tơroi, 20 xơnăm kơ âu tơguăt hăm tơm kơtao, tam mă đei xơnăm pơngơ̆t kơ đon mă leu chơt hơ-iă nhen xơnăm âu. Kơjă phŏng, tơmam choh jang, bơngai jang tŏk kăp dêh hnang. Mă lei xơnăm âu hơyuh tô̆ ‘mi ‘lơ̆ng xơđơ̆ng, kơtao đei yua lơ đơ̆ng 15 – 20%, lơ̆m kơplăh kơjă răt adoi tŏk kăp vă nhen băl, rim ha jang ưh kơ jô̆ jên huach duh oei đei yua đơ̆ng 50 - 60 trĭu hlj. Hăm 13 ha, unh hnam đei yua hloh 700 trĭu hlj. Ƀok Võ Quốc Dỵ chơt hơ-iă tơroi:  “Inh năm jang tơ̆ âu pơtăm kơtao lơ̆m 20 xơnăm bơih, kơtao đei yua đơ̆ng iŏk jang hơbŏ xơnăm âu noh đei yua lơ hloh, vă jê̆ hơtŏ đơ̆ng 90 truh kơpal 100 tâ̆n kơtao 1 ha. Kơjă tĕch adoi tŏk kăp, blŭng pơyan tĕch đei 10,5 trĭu 1 tâ̆n kơtao tơm. Unh hnam inh pơtăm 12 - 13 ha bơih, đei yua noh inh pơtăm dơ̆ng 2 – 3 ha. Kơjă păng kơtao đei yua lơ thoi âu noh bơngai pơtăm kơtao hơ-iă lơ̆m đon, xơnăm âu xơng Têt tih văi”

Kơtao đei yua lơ, tĕch hăm kơjă kăp, noh lơ bơngai pơtăm kơtao tơ̆ dôm apŭng Ea Kar, M’Drak, Buôn Đôn păng Ea Súp kơ dêh char Đăk Lăk chơt hơ-iă ưh adrô̆ kiơ unh hnam ƀok Võ Quốc Dỵ. Ƀok Nguyễn Na tơ̆ thôn Quyết Thắng 2, xăh Ea Tih, apŭng Ea Kar adoi pơtăm 10 ha kơtao ‘măn rŏl xĭk đơ̆ng xơnăm 1998, chơt hơ-iă ăn tơbăt:  “Kơjă phŏng xơnăm âu tŏk hloh tong anê̆, dang 1,4 trĭu hlj 1 tâ̆n kơ xơnăm xơ̆ noh dang ei tŏk 1,9 trĭu 1 tâ̆n. Minh ha xơnăm xơ̆ axong dang 140 trĭu hlj đei phŏng rei, jơhngơ̆m jang, iŏk yua, noh xơnăm âu truh kơ 200 trĭu hlj. Mă lei, kơyươ kơjă kơtao tŏk kăp mơ̆n. Tơring Ea Kar âu rim xơnăm kơtao đei 70 - 80 tâ̆n 1 ha, mă lei xơnăm âu noh 100 tâ̆n 1 ha, phŏ đei lơ mir pơtăm đei yua hloh kơ noh. Unh hnam inh đei 10 ha noh duh đei yua đơ̆ng 550 – 600 trĭu ưh kơ jô̆ jên axong jang”

Pơyan jang kơtao xơnăm 2022 – 2023, dêh char Đăk Lăk đei pơhlom 11.000 ha, akŏm mă lơ tơ̆ dôm apŭng Ea Kar, M’Drak, Buôn Đôn păng Ea Súp. Lơ̆m noh, mă lơ tơ̆ 2 apŭng noh Ea Kar păng M’Drak. Kơsô̆ kơtao đei yua kơ dêh char truh kơ 700.000 tâ̆n. Tôm noh kơyươ hnam kơmăi rŏl xĭk tơ̆ Đăk Lăk păng minh ƀả dêh char tơjê̆ nhen Khánh Hòa păng Phú Yên răt iŏk. Kơjă kơtao đei dôm hnam kơmăi âu răt dang ei noh 10,5 – 11 trĭu hlj 1 tâ̆n tơ̆ mir, kiơ̆ kơ tơm kơtao đei xĭk dăh mă ưh.

Ƀok Lê Tuân – Phŏ Kơdră dơnơm Kŏng ti rŏl kơtao xĭk 333 Đăk Lăk ăn tơbăt, kơchĕng xơnăm âu kŏng ti răt tơmơ̆t pơhlom 400.000 tâ̆n kơtao rŏl xĭk đơ̆ng kon pơlei. Kŏng ti gô pơtoi vei kơjă răt kơtao đơ̆ng 10 truh jê̆ 11 trĭu hlj 1 tâ̆n, păng pơtoi kơ dôm trong pơkăp tơgŭm ăn bơngai pơtăm kơtao rŏl xĭk:  “Hăm 1ha pơtăm ‘nao noh gô đei kŏng ti axong jang 30 trĭu hlj, păng 15 trĭu hlj hăm 1ha kơtao rong tơm. ‘Nguaih kơ noh, nhôn tơgŭm ăn hoh kơ kon pơlei 3 trĭu hlj 1 ha ƀơ̆t pơtăm ‘nao, 1,5 trĭu hlj 1 ha hăm kơtao rong tơm; pơkăp axong phŏng rei ‘lơ̆ng juăt prôi ăn kơtao kơ kon pơlei. Pơkăp găh ƀaoh hiêm đơ̆ng dang ei truh 3 xơnăm noh truh 900 rơbâu hlj 1 tâ̆n tơ̆ mir ăn kơtao đei xĭk 10CS, păng kơjă hơnơ̆ng đei kla kăp hloh 10%, hơtŏ pơhlom 1 trĭu hlj 1 tâ̆n”

‘Nâu jing xơnăm mă 3 pơtoi hloi bơngai pơtăm kơtao rŏl xĭk tơ̆ Đăk Lăk đei yua lơ. Tơdrong iŏk yua tơnăp đơ̆ng tơm kơtao hlôi tơgŭm lơ unh hnam jing pơdrŏng. Tơring pơtăm kơtao hlôi jing ‘long pơtăm tơm tơ̆ dôm tơring teh lŭk lơ̆k chươh lơ̆m apŭng  Ea Kar, M’drak, Bôn Đôn păng Ea Súp kơ dêh char Đăk Lăk.