Dơ̆ng tơ̆ hơnăp pơbŭng hnam pơglăn lăng tơ̆ Thoong hơboong pơnhă hơtăih dang mĭnh ƀar hơyak, mŏ H’Uốt Niê, oei tơ̆ buôn Kla, tơring Krông Buk, apŭng Krông Pach tôch tơtăm tơdrong ưh sơđơ̆ng kơ rim bơngai lơ̆m ŭnh hnam kơ yuơ thoong hơboong pơnhă tôch kơ jrŭ mălei lăp bơ̆ var găn lăp kơjung kŭl tăng. Bơngai kră, đe hơ ioh, tơdăh ưh kơpŭn ai huŏng lơ̆m hơboong pơnhă jrŭ nhen lĕ đak koai au ‘noh tôch kơ hơmơt, đei ‘măng pơm ăn jĭ dêh, đei ‘măng pơm ăn truh tơdrong lôch răm hloi, pơm ăn rim ŭnh hnam kon pơlei hơrih sa tơter thoong pơnhă au tôch tơtăm:“Lăng ‘nei hơmơt dêh, mă kăl hăm đe hơ ioh, đei bơngai huŏng tơgơ̆ ti, tơgơ̆ jơ̆ng bơih. Hơmơt tơt dêh mă lei vă pơm lơ liơ gơ̆h găi, đe sư pơm lơ loh ba lăng kơmăt đĕch bơih. Hơpơi chă hơmet ming, vă kon pơlei hơrih sa sơđơ̆ng, ŭnh hnam bơ̆n đei bơngai kră, đei hơ ioh dơ̆ng, hơmơt dêh.”

Ƀok Grik Mlô, Bí thư chi bộ buôn Kla, tơring Krông Buk apŭng Krông Pach tơbăt, đơ̆ng tơlĕch tơmơt jên jang ming man thoong hơboong pơnhă Đ3 găn hloh pơlei, kon pơlei hlôi pơjăh pơjăng ưh kơ lăp đon hăm trong jang đơ̆ng kơdră apŭng păng tơring. Kon pơlei hơnơ̆ng tơbăt ăn kơdră chĕp pơgơ̆r găh tơdrong pơhoach pă tơdrong tơdrơ̆r adoi nhen ưh kơ trŏ lăp, hơmơt tơt đơ̆ng thoong hơboong pơnhă au, mă lei truh dang ei oei ưh kơ đei xek tơlang ăn:“Đơ̆ng pơm đang thoong hơboong pơnhă au ưh kơ đei iŏk yua. Teh đak tơmơ̆t jên jang ‘noh kon jên hiong, hơboong thoong pơnhă ưh kơ gơ̆h iŏk yua, lơ loh ‘noh pơm pơhoach pă tơdrong tơdrơ̆r kon jên jang teh đak đĕch. Mĭnh păh hiong răm đĕch kon jên jang teh đak, mĭnh păh pơm kơnê̆ truh tơdrong hơrih sa kơ kon pơlei, kơ yuơ teh tơdrŭt hơlih hơnơ̆ng, mưh pơyan ‘mi truh. Ŭnh hnam kon pơlei oei tơjê̆ ‘noh tăr văr tôch kơ dêh. Hôp pơlei, tơƀơ̆p pơma dơnuh hăm bơngai tăh hla đơ̆ng sơ̆ truh dang ei kon pơlei hơnơ̆ng pơma tơroi găh tơdrong ‘nau”.

Ƀok Nguyễn Tiến Văn, Kơ iĕng Kơdră chĕp pơgơ̆r tơring Krông Ƀŭk, apŭng Krông Pach tơbăt, thoong hơboong pơnhă Đ3 đei ming man đang lơ̆m sơnăm 2015, mălei lăp iŏk yua 1 sơnăm ‘noh pơdơ̆h. Tơdrong tơm, ‘nau ‘noh thoong hơboong pơnhă mă lei chă sir man đơng hloh thoong hơboong tơm, mă lei jrŭ hloh kơ chŭn na. Kiơ̆ đơ̆ng ƀok Văn, thoong hơboong pơnhă au dang ei hlôi răm dơ̆k klơ̆p, pă gơ̆h vă iŏk yua bơih:“Thoong hơboong pơnhă Đ3 au đei iŏk yua lơ̆m sơnăm 2015, dang 1 sơnăm ‘noh hŭt hloi. Dang ei đak pă gơ̆h vă chă ro kơ yuơ dơ̆k klơ̆p. Apŭng jei đĭ năm lăng păng pơchoh trong hơmet ming mălei lăng ưh kơ đei iŏk yua ‘lơ̆ng hơ iă. Tơdăh chă ming hơmet dơ̆ng hrei au lei tơhoach kon jên tôch kơ lơ ‘mơ̆i mă keh đang.”

Thoong hơboong pơnhă Đ3 kơjung hơtăih 1km 400 met, đei Hơnih vei lăng kon pơlei apŭng Krông Pach kĭ tơchơ̆t tơmơ̆t jên jang đơ̆ng blŭng sơnăm 2013, jĭ mĭnh lơ̆m dôm tơdrong jang lơ̆m Tơdrong vă jang Pơnơ̆t đak Krông Buk Hạ. Đơ̆ng rŏng mĭnh ƀar ‘măng hơmet tơdrong jang ‘nŏh kon jên tơmơ̆t jang vă jê̆ 15 ti hlak jên. Tơdrong kăl vă pơma truh ‘noh, hơdrol kơ apŭng Krông Pach tơ iung pơjing thoong hơboong pơnhă au, Hơnih vei lăng Tơmơ̆t jên jang păng tơ iung pơjing Pơnơ̆t đak 8 găh Hơnih tơm vei lăng Choh jang sa păng Atŏk tơ iung tơring tơrang hlôi chih pơtrŭh hla bơar kơsô̆ 513/BLQ-TĐ athei pơdơ̆h tơmơ̆t jên jang kơ yuơ kon jên tơmơ̆t jang lơ dêh hnang ( tŏk truh 180 triu hlak jên lơ̆m 1ha) adoi ưh kơ đei iŏk jơnei dơ̆ng.

Iŏk đei hla bơar găn ga, Hơnih vei lăng kon pơlei apŭng Krông Pach oei tơbăt hơdăh jơhngơ̆m đon “hơdrin đĭ jơhngơ̆m” hăm hla bơar tơl hơdăh lơ̆m blŭng khei 10/2013. Lơ̆m hla bơar au, apŭng akhan, tơdrong tơmơ̆t jên jang au kăl hloh. Tơmơ̆t jên ming man thoong hơboong pơnhă vă tơgum ăn pơro, tơuih đak ăn chŭn na, ‘long pơtăm păng hơrih sa gô iung jang jơnei păng hơnhăk ba tơdrong ‘lơ̆ng hơ iă ăn đunh đai tai sơnăm, pơjing roi năr roi pơm sơđơ̆ng hơrih sa kơ kon pơlei lơ̆m tơring, tơgop pơtrŭt kơtang atŏk tơ iung mŭk drăm, tơpôl kơ tơring.

Kăl lăng truh dơ̆ng ‘noh, mă đơ̆ng thoong hơboong pơnhă Đ3 pă đei iŏk yua bơih, sơnăm 2019, Hơnih vei lăng kon pơlei apŭng Krông Pach hơnơ̆ng tơmơ̆t jên jang 850 triu hlak jên vă ming hơmet. Truh po đơ̆ng rŏng, khei 8/2023, Hơnih bơ̆ jang dăr lăng dêh char Đăk Lăk năm dăr lăng păng sơkơ̆t hơdăh, hơnih ming hơmet pơnơ̆ thoong hơboong pơnhă hăm bai tơmo kơjă kơjên 850 triu hlak jên đĭ tơdrŭt, hơlih huŏng lơ̆m thoong đak.

Ƀok Trần Hồng Tiến, Bí thư Đảng, Kơdră chĕp pơgơ̆r Jơnŭm vei lăng kon pơlei apŭng Krông Pach tơbăt, kiơ̆ đơ̆ng nơ̆r pơma pơtôch đơ̆ng Hơnih jang dăr lăng dêh char, Hơnih Đảng, Jơnŭm vei lăng kon pơlei apŭng athei Hơnih vei lăng kon pơlei apŭng tơroi tơbăt mă hơdăh dôm tơdrong đei ƀơm truh thoong hơboong pơnhă Đ3 vă đei trong pơrô̆ hơmet ming. Veh ver tơdrong thoong hơboong pơnhă pă gơ̆h iŏk yua mă lei hơnơ̆ng pơm tơhoach kon jên tơmơ̆t jang ming hơmet:“Khul kơdră chĕp pơgơ̆r Đảng apŭng, Jơnŭm vei lăng kon pơlei apŭng jei hlôi đei khul năm bơ̆ jang dăr lăng hơlen. Lăp đơ̆ng rŏng dăr lăng hơlen ‘noh jei hlôi pơm hla bơar athei Hơnih vei lăng kon pơlei apŭng tơroi mă hơdăh dôm tơdrong kơ thoong hơboong pơnhă Đ3 au. Hơnih vei lăng kon pơlei apŭng jei hlôi chih tơbăt păng pơma dơnuh hăm Hơnih vei lăng Choh jang sa păng Atŏk tơ iung tơring tơrang dêh char, atŭm hăm rim hơnih bơ̆ jang ƀơm truh, dêh char jei hlôi năm dăr lăng bơih. Hăp tơhlăk tơhlĭn tôch kơ lơ păng rim ‘măng hop akŏm hăm bơngai tăh hla, hăm hơnăp jang Kơdră chĕp pơgơ̆r Jơnŭm vei lăng kon pơlei jei hlôi pơtruh nơ̆r apĭnh, athei dêh char iung jang dăr lăng hơlen mă tôm tong dơ̆ng. Veh ver hăp đi hơ loh bơih mă lei dang ei hơnơ̆ng chă ming hơmet ưh kơ trŏ ƀlep kiơ̆ tơdrong tơchơ̆t kơnh hăp hư răm dơ̆ng.