-BTV: Kơkuh kơ ih mih Rưm, tôch hơiă đei tơƀâp, pơma nuh hăm ih ƀât blŭng sơnăm ‘nao âu. Mih Rưm ăi, sơnăm 2022 âu ki, jĭ sơnăm tôch hơiă hăm lơ unh hnam kon pơlei jang chŭn mir, ƀât mă kơjă chĕh phe păng 1,2 tơmam nai jang đei lơ, kơjăp kăp. Apinh ih tơroi ăn bôl boăl mơ̆ng brŏ găh tơdrong jang atŏk tơiung mŭk drăm lơ̆m hnam tơnŏ bơ̆n sơnăm âu ki thoi yơ lăng?

-Mih Rưm:- Bơnê, blŭng a pĭnh kơ kuh kơ mih ma duch nă mơ̆ng brŏ, măt inh Rưm. Tơdrong jang xa kơdih kâu inh đơ̆ng sơ̆ tôch adrin, chă hŏk iŏk đơ̆ng mih ma duch nă, đơ̆ng bôl boăl găh trong pơ tăm chĕh phe, cao su, ƀum, rong kơpô, rơmo... sơnăm âu ki iŏk đei hlŏh 200 triu, pơm hơmet hnam, răt tơmam pơ ‘nhŏ ăn tơdrong arih xa lơ̆m hnam tơnŏ...

 -BTV: Sơnăm sơ̆ tơdrong jang xa hnam bơ̆n đei iŏk yoa lơ hlŏh 200 triu hlak jên, ‘nâu jĭ kơsô̆ jên pôm păi hăm kon pơlei jang chŭn mir tơ̆ xăh hơtăih yăih, oei đei lơ tơdrong mơmat tat nhen Kông chiêng âu. Vă jang đei thoi âu, apinh ih tơroi truh trong jang xa đơ̆ng ih lơ̆m khei ‘năr âu ki lăng?

-Mih Rưm: -Inh hơnơ̆ng chă hŏk tơdrong jang xa, kơdih kâu inh ƀôh, tơdrong tă phŏng ăn ‘long pơtăm tôch gĭt kăl, đơ̆ng tuh, tă bơ̆n mơ̆r, phŏng vi sinh truh phŏng hoă hŏk, athei trŏ khei ‘năr, trŏ kơliêu, mưh vei rong athei năng truh tơdrong pruih pơgang, pruih trŏ jơ năr, tôm kơliêu ‘nŏh sư sĭt ‘lơ̆ng ƀiơ̆, hơnhăk đei iŏk yoa lơ ƀiơ̆.

-BTV: Lơ̆m tơdrong jang xa tơ̆ hnam tơnŏ, ih hăm tơƀâp tơdrong mơmat tat găh jên jang, dăh mă ki thuơ̆t jang ưh, bĭ ih hơmet tơdrong ‘nâu thoi yơ?

-Mih Rưm: -Lơ̆m dôm sơnăm oei mơmat, tam gan hlôh vao tơdrong pơtăm, vei rong ‘long sơ̆, inh hơnơ̆ng hŏk pơhrăm đơ̆ng bôl boăl. Găh jên jang ‘nŏh Đảng, Tĕh đak đei lơ tơdrong tơgŭm ăn kon pơlei jang tŏk, sut pơđĭ pơngot, tơjur tơnuh hin, asong tŏk iŏk jên ngân hang. Blŭng a, inh tŏ iŏk tơ̆ Ngân hang chính sách huyên đei 6 triu, đơ̆ng rŏng ‘nŏh tŏk iŏk 50 triu vă răt phŏng, tơđăh ‘long… Roi đunh roi đunh jang xa roi tŏk, chă jang xa hơnơ̆ng kơna dang ei gơ̆h đei iŏk yoa sơđơ̆ng thoi âu.

-BTV: Hơdai hăm vei rong kon tơrong, ‘long pơtăm, vă gơ̆h đei tơdrong arih xa phĭ tơtŏ, dơnŏ ‘lơ̆ng, kăl đei tơdrong kiơ dơ̆ng, hă?

-Mih Rưm: -Vă pơjing hnam tơnŏ, jang mŭk drăm tơdrong kăl ‘nŏh athei băt trong mong ‘mơ ‘met jên, athei ‘măn jên vă mưh tơƀâp mơmat tat, jĭ jăn ‘nŏh iŏk jên âu, dăh mă mưh kăl ‘nŏh đei jên răt bơ̆n phŏng, pơgang sơdrông vă rong ‘long pơtăm, ƀum, chĕh phe, tiu... Tơdăh ưh đei ‘măn jên, ưh đei ‘mơ ‘met jên đơ̆ng bơ̆n jang đei, đei dôm yơ xa pơgŏh, mưh tơƀâp mơmat tat ‘nŏh chă tôch hơnat, ưh kơ đei ôh. Yoa thoi nŏh mă jang đei lơ dăh mă tŏsĕt athei băt ‘măn răk jên vă đei jên jang xa dơ̆ng, kŭm nhen chă răt bơ̆n tơmam, gre, pơyoa ăn tơdrong arih xa rim năr.

-BTV: Hăm mŭk mam hnam tơnŏ bơ̆n đei, pơtêng hăm kon pơlei Bahnar bơ̆n tơ̆ tơring 3 âu, hnam bơ̆n jang xa đei iŏk yoa kơjăp ‘lơ̆ng tơpă. Khei ‘năr âu ki, ih hăm chă tơgŭm ăn kon pơlei bơ̆n jang xa ưh?

-Mih Rưm: -A, apinh bơnê. Tơdrong tơgŭm ăn mih ma duch nă lơ̆m pơlei dăh mă lơ̆m xăh, inh hơnơ̆ng bơ̆ jang, mă lei tam mă iŏk đei nhen ‘mĕh vă yoa kon pơlei tơ̆ âu ưh tam đei hlôh vao kơjung. Kơdih kâu inh tơchĕng, mưh đe mih ma duch nă, kon pơlei truh hŏk găh trong jang xa ‘nŏh inh pơtho tơƀôh hloi, chă roi tơƀôh dôm tơdrong kơdih kâu băt, hơpơi ‘mĕh tơgŭm băl jang tŏk, đei tơdrong arih xa hiôk sơđơ̆ng, bu bu kŭm đei por sŏng, hơbăn ao hrŭk... inh tôch ‘mĕh pơtho ăn mih ma duch nă pơtăm chĕh phe, tiu, cao su păng ‘long xa plei vă đĭ đăng unh hnam đei tơdrong arih xa tơnŏ ‘lơ̆ng, ưh pă đei unh hnam tơnuh, pơngot.

-BTV: Lei, bĭ sơnăm 2023 âu, ih vă jang xa lơliơ dơ̆ng, vă gơ̆h đei yoa lơ hlŏh kơ sơnăm so?

-Mih Rưm: -Sơnăm kơnh, unh hnam hơnơ̆ng vei rong ‘long pơtăm, kon tơrong vă gơ̆h đei yoa lơ ƀiơ̆, dang 300 triu. Kơdih kâu inh adrin jang xa, pơtăm dơ̆ng chĕh phe, tiu păng ‘long xa plei. Mă hơdăh lơ̆m sơnăm kơnh vă pơtăm dơ̆ng 500 tơnơm tiu, chĕh phe dang 5 sao păng hơnơ̆ng vei rong, tă phŏng ăn pơgar ‘long vă gơ̆h đei iŏk yoa lơ ƀiơ̆...

-BTV: Bơnê kơ ih mih Rưm hlôi roi tơbăt ăn bôl boăl mơ̆ng brŏ găh tơdrong jang xa lơ̆m hnam tơnŏ sơnăm so 2022 păng dôm tơdrong vă jang lơ̆m sơnăm ‘nao 2023. A, sơnăm ‘nao truh bơih, unh hnam bơ̆n hơmet têt thoi yơ bơih?

-Mih Rưm: -Tơdrong xa têt, sơng sơnăm ‘nao ‘nŏh inh păng kon pơ lei tơ̆ âu pơgơ̆r hơnơ̆ng, hnam đei iĕr tĕh xa iĕr, hnam đei ƀôh ƀiơ̆ ‘nŏh tĕh nhŭng et xa hơdai, ngôi pơchơt têt. Sơnăm ‘nâu thoi nŏh mơ̆n chă pơgơ̆r tơ̆ rim unh hnam, lăng đơ̆ng unh hnam thoi yơ chă pơgơ̆r ngôi pơchơt mă lăp. Hơdrô̆ hnam nhôn pơgơ̆r lơ lăp đĕch yoa vă hăt choh jang mir roh, vei rong, tă phŏng, tơruih đak ăn chĕh phe, tiu dơ̆ng vă gơ̆h đei iŏk yoa lơ ƀiơ̆.

-BTV: Hăm tơdrong jang xa đei iŏk yoa kơjăp ‘lơ̆ng, arih xa gơ̆h mong ‘mơ ‘met, băt trong tơmât jên jang xa dơ̆ng, mă loi jĭ hlôh vao, băt jang kiơ̆ khoa hŏk ki thuơ̆t lơ̆m tơdrong jang xa, đơ̆ng nŏh tơgŭm ăn unh hnam mih Rưm jing 1 lơ̆m dôm unh hnam choh jang xa đei ƀôh tơ̆ xăh tơring III Kông Chêng oei đei lơ tơdrong mơmat tat tơ̆ apŭng Mang Yang, dêh char Gia Lai.

Jơ pơma nuh năr ‘nâu tôch ƀât dâu bơih. Mĭnh ‘măng dơ̆ng bơnê păng hmach thơthou ăn mih Rưm păng unh hnam, kŭm hăm mih ma duch nă 1 sơnăm ‘nao jang xa roi đei ƀôh hlŏh dơ̆ng, jang đei dôm tơdrong mă kơdih kâu vă jang lơ̆m sơ ăm ‘nao.