Năr brei (14/6), tơ̆ pơlei tơm Buôn Ma Thuột, dêh char Đak Lăk, Hơnih tơm pơtrŭt choh jang sa Teh đak jang hơdoi hăm Viện Khoa học Kih thuơ̆t Choh jang sa Bri ‘long Tây Nguyên păng Kŏng ty phŏng Bình Điền pơgơ̆r hop akŏm tơlĕch Tơdrong jang “Jang chehphe gơ̆h hơgei trŏ lăp hăm tơplih tŏ ‘mi kial tơring Tây Nguyên” jăl jang 2023-2025.

Tơdrong jang đei tơlĕch jang pơlong năng tơ̆ 15 apŭng kăl pơtăm ngăl chehphe păng pơtăm hrau hăm sầu riêng, tiu kơ Tây Nguyên. Tơ̆ hop akŏm, rim kang ƀô̆ pơtrut choh jang sa tơring đei hŏk pơhrăm rim trong chih iŏk hơlen dôm tơdrong jang sa kơ 500 ŭnh hnam jang chehphe tơ̆ 5 dêh char Tây Nguyên. Ƀok Phan Văn Tâm, Kŏng ty phŏng Bình Điền akhan: Hop akŏm tơgŭm ăn rim pang vang iung jang hlôh vao hloh dơ̆ng găh tơdrong jang kơ dih lơ̆m tơdrong jang au, đơ̆ng noh sơkơ̆t hơdăh, dôm tơdrong jơnei gô tơgŭm ‘lơ̆ng ăn kon pơlei jang chehphe tơring Tây Nguyên, tơgŭm ăn kon pơlei jang kiơ̆ păng iŏk yua dôm tơdrong 'lơ̆ng hơ iă kơ tơdrong jang au.