Sơ̆, tơmam drăm Nem nhŭng hmă Bến En tơ̆ apŭng Như Thanh, dêh char Thanh Hóa găh lơ mĭnh ƀar hơnĭh et sa lơ̆m apŭng tĕch mơdro ăn kơ đe et sa. Đơ̆ng mă đei drơ̆ng nơ̆r hơnăn, găh tơdrong ‘lơ̆ng kơ Nem nhŭng hmă Bến En đei đe răt iŏk lơ hlŏh dơ̆ng. Vă pơm đei tơmam drăm nem au, kon pơlei tơ̆ au rơ̆ih iŏk ‘nhĕm nhŭng hmă, ‘nau jĭ ‘nhĕm nhŭng ‘lơ̆ng hlŏh kơ kon pơlei tơring groi kông. Găh ‘nhĕm vă pơm nem ‘nŏh rơ̆ih iŏk sĕch hơngiĕng, sĕch blu nhŭng.

Tơdrong mă au jei tơgŭm ăn kon pơlei kon kông chă rong nhŭng hmă lơ hlŏh dơ̆ng. Hăm nhŭng hmă dang 100 tŏ, ŭnh hnam yă Nguyễn Thị Quy, tơring Phượng Nghi đơ̆ng mĭnh ŭnh hnam dơnuh hlôi jing ŭnh hnam jang sa iŏk đei vă jê̆ 200 trĭu hlak jên lơ̆m 1 sơnăm. Yă Nguyễn Thị Quy tơbăt:“Rim sơnăm jei tĕch hlot lơ kơna ba hơdrin chă rong lơ hlŏh dơ̆ng.”

Lơ̆m lơ tơmam drăm git kăl đei pơlăp OCOP đe tĕch mơdro au to, bơngai jang, rim hơnih mơdro sa pă đei trong ayơ bơih ‘nŏh jĭ hơdrin đĭ ai pơm hơmet pơ ‘lơ̆ng hlŏh dơ̆ng tơmam drăm bơ̆n. Ăp đei lơ loh mă kĕ gei kơ jăp dôm tơmam drăm kăl kơ kon kông, kĕ pơjei dih băl lơ̆m tơdrong tĕch mơdro. Tơdrong akŏm pơjing tơpu kơđŏh ‘lơ̆ng, rim tơmam drăm ‘lơ̆ng jei tơgŭm ăn rim hơnĭh mơdro sa pơm tơlĕch tơmam drăm kăl tơring groi kông roi năr roi pơ̆ih să hơnĭh tĕch mơdro, atŏk jang sa đei iŏk yua lơ rim sơnăm. Yă Phạm Hồng Hà, Hơp tak xah Nậm Lửu, apŭng Trạm Tấu, dêh char Yên Bái tơbăt:“Sơ̆ lơ̆m sơnăm nhôn chă rei pơtăm lăp tŏ sĕt sot, mă lei dang ei nhen lĕ găh tơmam drăm OCOP tĕch mơdro iŏk đei trŭh 200%. Tơdrong iŏk đei tĕch mơdro tơmam drăm bơ̆n dang ei tŏk bŏk tĕch ăn rim Kŏng ty dăh mă rim hơnĭh tĕch mơdro tơmam drăm rơgŏh tơ̆ Hà Nội, đe sư tôch kơ lăp hăm tơmam drăm tơring groi kông bơ̆n. Kơ yuơ nhôn chă rei pơtăm tuh mơ̆r păng ư̆h kơ đei pruih pơgang pơlôch sơdrông.”

Tơ̆ dêh char Lâm Đồng, kon pơlei kon kông jei tŏk bŏk atŏk tơ iung tơmam drăm kăl, kĕ tĕch mơdro tơ̆ au tơ̆ to. Đơn Dương ‘nŏh mĭnh lơ̆m 2 apŭng đei hơgăt teh pơtăm ‘nhot sa să hloh kơ dêh char Lâm Đồng. Gơnơm jang kiơ̆ kmăi kmŏk hơgei, lơ tơmam drăm chŏh jang sa kơ apŭng hlôi iŏk đei tơmam drăm rơgŏh, trŏ lăp hăm tơchơ̆t VietGap adoi nhen đei pơklep hơnăn tơmam drăm “Đà Lạt kết tinh kỳ diệu từ đất lành”. Mă đơ̆ng kăl trŏ lăp hăm nơ̆r pơkoĕl kơtang păng rơ̆ih kơtang đơ̆ng tơmoi, mă lei ‘nau jing hla bơar tơchơ̆t hơdăh ăn tơdrong ‘lơng liĕm kơ tơmam drăm. ‘Nau jei jing trong iung yak vă bơngai pơtăm hơnơ̆ng atŏk tơ iung kơtang hlŏh dơ̆ng păng đunh đai tai sơnăm hlŏh dơ̆ng. Ƀok Nguyễn Đình Tịnh, Kơ iĕng Kơdră chĕp pơgơ̆r Dơnŏ anĭh vei lăng kon pơlei apŭng Đơn Dương, dêh char Lâm Đồng tơbăt:“Đơ̆ng sơnăm 2019 trŭh dang ei, akŏp kon jên teh đak tơmơ̆t jangdang 17 ti hlak jên, jên đơ̆ng kon pơlei ‘nŏh 20 ti hlak jên, jang kiơ̆ lơ trong jang gơ̆h hơgei nhen: tơruih đak hăm kmăi kmŏk, prôi phŏng mơ̆r hăm kmăi kmŏk păng jang kiơ̆ rim kmăi kmŏk 4.0. Hăm Đơn Dương, hrei au đei iŏk yua atŭm hơnăn kơ dêh char Lâm Đồng tơ iung pơjing ‘nŏh Đà Lạt kết tinh kỳ diệu từ đất lành kơna jei tôch rơvơn lơ̆m tơdrong tơƀôh tơbăt tơmam drăm adoi nhen hơnhăk tơmam drăm kơ  Đơn Dương năm tơ̆ rim dêh char anai.”

Hơnơ̆ng pơm pơ ‘lơ̆ng tơmam drăm, jang kiơ̆ khoa hŏk kih thuơ̆t lơ̆m chŏh jang sa, dôm tơmam drăm kăl kơ tơring kon kông hơnơng đei rei pơtăm, pơm tơlĕch, dôm tơmam drăm kăl kơ kon kông đei lăng jing tơmam drăm ‘lơ̆ng lơ̆m teh đak. Kiơ̆ đơ̆ng rim bơngai joăt jang, ‘mĕh vă atŏk kơtang hlŏh dơ̆ng ‘nŏh rim tơmam răm kơ kon pơlei groi kông jei kăp trŏ lăp hăm rơgŏh ‘lơ̆ng, sơđơ̆ng, ‘lơ̆ng liĕm, trŏ lăp hăm đe ‘mĕh vă răt iŏk. ‘Nau jing tơdrong trăp trĭn păng tơdrong pơkoĕl lơ̆m tĕch mơdro. Kơ yuơ lơ lŏh, tơ iung pơjing hơnăn kăl iŏk đơ̆ng jơhngơ̆m đon ‘lơ̆ng, ư̆h khan lăp tơƀôh tơbăt mă lei iŏk đơ̆ng bơngai vei lăng, đơ̆ng kon pơlei kon kông đe sư vang iung jang lơ̆m chŏh jang sa, đơ̆ng dôm kơdră chĕp pơgơ̆r… kăl tơƀôh hơdăh đei tơdrong atŏk tơ iung kơ jăp ‘lơ̆ng tôm tong. Adoi, vă ba tơmam drăm groi kông trŭh hăm rim bơngai răt yua kăl iung jang kiơ̆ kơtang hlŏh dơ̆ng hăm kmăi kmŏk kơsô̆, tĕch mơdro điên tư klŏh klĕch sơlam teh đak.