Anih vei lăng bri tang găn Thạch Nham đei dêh char Kon Tum pơjao vei lăng 32.000 héc-ta bri lơ̆m 5 xăh kơ apŭng Kon Plông sơlam hăm dôm apŭng Sơn Hà, Sơn Tây, Ba Tơ, dêh char Quảng Ngãi păng apŭng Nam Trà My, dêh char Quảng Nam. Tơring să dơ̆ng đei sơlam hăm 2 dêh char kơjung truh hloh 50km kơna tơdrong jang vei lăng bri tơƀơ̆p lơ mơmat tat.

Ƀok Phan Quốc Vũ, Kơdră Anih vei lăng bri tang găn Thạch Nham, tơbăt tơdrong jang hơdai kơjăp hăm dôm anih jang tơ ‘ngla bri tơ̆ Quảng Ngãi păng Quảng Nam jĭ trong jang ‘lơ̆ng vă vei lăng bri đei yua:“Anih jang tơlĕch tơdrong pơkăp jang hơdai hăm dôm anih jang tơ ‘ngla bri buăl păng hơnơ̆ng đei tơlĕch jang dăr joang, hơlen lăng. Đơ̆ng 2 păh kŭm hơnơ̆ng pơma dơnuh păng pơgơ̆r dôm ‘măng dăr joang tơchă lăng tơ̆ dôm tơring tơjê̆ kŭm nhen tơroi tơbăt krao hơvơn kon pơlei tơ̆ tơring sơlam. Kiơ̆ đơ̆ng tơdrong jang hơdai đơ̆ng dôm anih jang sơlam ‘noh bri đei vei lăng ‘lơ̆ng”.

Dôm rơng bri tơring sơlam đơ̆ng apŭng Ia H’Drai, dêh char Kon Tum hăm 2 apŭng Ia Grai păng Chư Păh, dêh char Gia Lai hlôi jing hơnih tơtŏ koh iŏk ‘long glăi păng soh phă bri pơm mir roh. Mă loi ‘noh jĭ tơ̆ tơring dơnâu đak hnam kơmăy ŭnh điên Sê San 3A păng Sê San 4, bơngai tơtông ‘long bri yua trong đak krong chơ ‘long, mưh păih Kon Tum druh rôp ‘noh kơdâu năm tơ̆ dêh char Gia Lai păng hơdrơ̆k dơ̆ng. Đơ̆ng sơnăm 2018, ƀơ̆t tơdrong pơkăp jang hơdai lơ̆m tơdrong jang vei lăng bri păng vei lăng ‘long bri tơ̆ tơring sơlam 2 dêh char Kon Tum và Gia Lai đei kĭ pơkăp, rim khŭl lĭnh 2 păh vang jang hơdai vei lăng bri kơna tơdrong pơm glăi tơ jur hloi.

Ƀok Nguyễn Tiến Dũng, Phŏ Kơdră Anih vei lăng kon pơlei apŭng Ia H’Drai, tơbăt:“Tơdrong jang pơma dơnuh roi tơbăt kŭm nhen jang hơdai dăr joang tơchă druh rôp tơ̆ tơring sơlam đơ̆ng rim khŭl lĭnh kơpal hăm 2 apŭng kơ dêh char Gia Lai đei lăng kăl vă găn ƀiơ̆ tơdrong pơm glăi mơ̆t phă truh tơmam drăm bri hlôi hơtŏk đei yua ‘lơ̆ng. Kiơ̆ rim sơnăm tơdrong pơm glăi kŭm hlôi tơ jur lơ. Truh dang ei tơ̆ tơring sơlam kơ apŭng hăm dôm apŭng kơ dêh char Gia Lai sơkơ̆t hơdăh ‘noh jĭ ưh pă đei hơnih tơ tŏ găh pơm glăi Luơ̆t Bri ‘long.”

Dêh char Kon Tum đei tơring sơlam hăm dôm dêh char Quảng Nam, Quảng Ngãi, Gia Lai akŏp kơjung hloh 440 km. Pơm kiơ̆ tơdrong pơkăp jang hơdai, 5 sơnăm âu khŭl lĭnh vei lăng bri dôm dêh char hlôi pơgơ̆r rơbâu ‘măng dăr joang tơring bri sơlam. Kiơ̆ đơ̆ng noh chă ƀôh 370 tơdrong pơm glăi khôi luơ̆t lơ̆m tơdrong jang bri ‘long, sek phak hloh 30 ‘măng, iŏk vei vă jê̆ 1.000m3 ‘long rim kơloăi....

Ƀok Nguyễn Văn Nam, Kơdră Anih vei lăng bri ‘long dêh char Kon Tum, tơbăt, tơdrong jang hơdai vei lăng bri tơring sơlam roi ‘năr roi ‘lơ̆ng, đei yua:“Anih jang tơ ‘ngla bri tơring sơlam lơ̆m tơdrong jang hơdai vei lăng bri sơđơ̆ng ‘lơ̆ng. Hơnơ̆ng răp hơlen pơma dơnuh roi tơbăt, đei trong jang hơdai pơgơ̆r jang kiơ̆ ‘lơ̆ng tơdrong jang vei lăng bri tơ̆ dôm tơring sơlam kiơ̆ đơ̆ng tơring đei klăih song vei lăng. Tang găn tơtom tơdrong mơ̆t phă bri, tơ gar iŏk teh bri ‘long, koh iŏk, tĕch mơdro, chơ ‘long glăi luơ̆t, mă loi ‘noh jĭ dôm năr lêh năr tết”.

Dêh char Kon Tum dang ei đei hloh 616.000 héc-ta bri, lơ̆m noh vă đĭ đăng ‘noh bri brăh, pĕng yơ̆p bri kơ dêh char hloh 63% lơ hloh tơring Tây Nguyên. Dêh char oei lơ teh bri brăh hăm đei ‘long tih, đei lơ tơmam bri brăh, lơ kơloăi sem bri brăh, ‘long kăp gĭt. Gơnang đơ̆ng kơchăng, hơdrin jang hơdai đơ̆ng rim khŭl lĭnh kơpal păng dôm dêh char sơlam, Kon Tum tŏk bŏk pơvei kơmâu jơk ăn dôm tơƀôt bri, vei lăng cham char tơ̆ hơnăp tŏ ‘mi kial kơnê̆ tê̆, kŭm jing vei tơdrong jang sa ăn dôm bơngai kon kông tơ̆ tơring.