Dang ei bơngai mơdro tŏk bŏk ăn jên hơdrol răt iŏk sầu riêng Đắk Lắk hăm kơjă đơ̆ng 80.000 hlak jên truh 95.000 hlak jên 1 kĭ, ‘noh jĭ đei ƀôh tôch ‘lơ̆ng đơ̆ng anih tĕch mơdro. Mă lei, tơdrong iŏk kơjă, ăn jên hơdrol hăm kơjă măk kŭm đei ƀôh krê hơmơt găh ưh kơ ‘lơ̆ng phă kơjă, phă hla ar jang hơdai gô đei ƀôh yan âu tĕch mơdro đei tơplih tih. Hơdai hăm ‘noh, tơdrong tơ gar băl tĕch răt, pơgơ̆ kơjă, tơtông klĕ, phă ‘long lei lăi dôm pơyan hơdrol, kŭm pơm ăn kon pơlei jang chŭn mir ưh kơ sơđơ̆ng jơhngơ̆m.

Ƀok Y Khoan Kbuôr oei tơ̆ xăh Cư Pơng, apŭng Krông Búk, dêh char Dak Lak tơbăt: “Dang ei tơdrong arih sa sơđơ̆ng, sầu riêng tŏk bŏk đei kơjă, mŭk drăm ŭnh hnam hơtŏk tơiung. Ĭnh ƀôh lơ̆m pơlei pơla đei dôm bơngai mơlôh tôch kơ hơdrin lơ̆m tơdrong vei lăng sầu riêng”.

Vă vei sơđơ̆ng lơ̆m pơyan phĕ tĕch sầu riêng, khŭl kơdră tơring kŭm hăm khŭl lĭnh kŏng an rim tơring lơ̆m dêh char Dak Lak hlôi pơjing, tơlĕch trong jang hơtŏk loi dơ̆ng tơdrong jang iung jang tang găn pơm glăi păng dôm tơdrong pơm glăi lơ̆m pơyan sầu riêng sơnăm 2024. Hơdai hăm hơlen lăng hơnih ‘măn răk, dăr joang hơlen lăng tơ̆ dôm tơring tơm, mă loi ‘noh jĭ dôm mir sầu riêng hơtăih kơ hnam kon pơlei, dăr hơlen dôm tơdrong jang răt, tĕch sầu riêng, pơjing grŭp tơgŭm phĕ păng tĕch sầu riêng.

Đại tá Trần Quang Hiếu, Phŏ Kơdră vei lăng Kŏng an dêh char Dak Lak tơbăt: “Nhôn gô kơchăng băt tơdrong, jang hơdai hăm dôm anih jang hơtŏk loi dơ̆ng vei lăng teh đak găh sơđơ̆ng mŭk drăm, mă loi ‘noh jĭ ƀơm truh kơsô̆ tơring pơtăm, kơsô̆ tăh tơpu păng dôm tơdrong jang pơgơ̆m tĕch mơdro. Păng tơtom chă ƀôh iung jang sek phak kơhret dôm bơngai đei  pơm glăi tơtông klĕ. Hơtŏk loi dơ̆ng vei lăng teh đak găh tơdrong jang tĕch răt hăm teh đak đe, găh trong nơnăm, găh vei lăng tơdrong jang tĕch mơdro đei tơdrong hiôk vă vei sơđơ̆ng lơ̆m tơring”.

Dêh char Dak Lak dang ei đei hloh 32.700 hec ta sầu riêng, lơ̆m noh đei dang 16.000 hec ta ăn phĕ tĕch, jĭ dêh char đei teh sầu riêng să hloh lơ̆m teh đak. Sơnăm 2023, sầu riêng Dak Lak iŏk đei 285.000 tấn  păng sơnăm ‘nâu tơdra hơdrol gô đei hloh 300.000 tấn.