Unh hnam yă Thái Thị Hường, tơ̆ thôn 8, xăh Ea Kpam, apŭng Cư M’gar đei 8 sao tiu pơtăm hrau hăm ka phê. Ăh pơyan pĕ yua, yă ăn tơbăt tiu xơnăm âu tŏk pơhlom 40% pơtêng hăm xơnăm xơ̆. Kơjă tiu duh tŏk kăp ƀiơ̆ đơ̆ng blŭng pơyan, dang ei pơhlom đơ̆ng 67.000 – 70.000 hlj minh kĭ, tơgŭm ƀiơ̆ unh hnam pă đei pơngơ̆t hăm tơdrong huach jên axong jang adrol kơ noh. Yă Thái Thị Hường ăn tơbăt: “Hơyuh tô̆ ‘mi xơnăm xơ̆ pơm tiu ưh đei plei, oei xơnăm âu noh xơđơ̆ng ƀiơ̆, tiu đei lơ plei ƀiơ̆ mă lei adrô̆ hơpơi ning nai kơnh kơjă tĕch kăp ƀiơ̆ dơ̆ng noh kla tôm jên huach axong jang, oei đei xa cheh tŏ xĕt đĕch da ƀiơ̆ mơ̆n”.

Kiơ̆ kơ yă Ngô Thị Mỹ Hạnh, oei tơ̆ thôn 3, xăh Ea Bhốk, apŭng Cư Kuin, pơyan tiu xơnăm âu đei plei păng kơjă tĕch adoi tŏk ƀiơ̆ noh kon pơlei adoi xô̆ jơhngơ̆m. Dang ei unh hnam đei 6 sao tiu, đei yua pơhlom 3 tâ̆n, lơ hloh xơnăm xơ̆ 1 tâ̆n, unh hnam tŏk bŏk oei akŏm pĕ vă dăh đang păng hơpơi tĕch đei kơjă kăp ƀiơ̆ vă kla tôm jên huach axong jang:  “Lơ̆m kơplăh tiu tơjủ kơjă, noh jên hơpăh bơngai jang tŏk kăp, kơjă phŏng rei đakx ăng đak dâu yua kơmăi lăng atŭm noh kăp ngăl. Tiu ƀơm hơdrông pơrang kơlih hơyuh ‘năr ưh ‘lơ̆ng xơđơ̆ng noh nhôn ƀơm lơ tơnap tap, ‘meh vă khei năr truh kơjă tiu xơđơ̆ng hloh, tŏk kăp hloh noh roi ‘lơ̆ng. Noh jing tơdrong xô̆ hơ-iă hăm kon pơlei jang mir nhôn âu”.

Jâ̆p dêh char Đăk Lăk đei jê̆ 32.000 ha tiu, đei yua jê̆ 80.000 tâ̆n. Tơdrong mă kơjă tiu “hơlơ̆k hơle” lơ̆m dôm xơnăm kơ âu, lơ̆m kơplăh hơyuh ‘năr, pơrang jĭ pơrăm, kơjă tơmam axong jang, hơpăh đe jang noh kăp hlôi tơrĕk truh tơdrong pơyua adoi nhen pơm hiơ̆r đon bơngai jang tiu. Kơjă tiu tŏk bŏk oei tŏk kăp đơ̆ng blŭng pơyan pĕ yua xơnăm 2023 jing tơdrong xô̆ hơ-iă vă kon pơlei xơđơ̆ng jơhngơ̆m axong hơtŏk jang tiu xơđơ̆ng đunh đai.