VOV4.Bahnar - Dang ei je# đ^ pơyan sầu riêng tơ\ dêh char  Dak Nông. Kiơ\ xơkơ\t đơ\ng anih jang kơpal păng kon pơlei jang mir, âu jing pơyan sầu riêng đei yua tih, hăm kơjă te\ch kăp tôch dêh; rim ha đei yua kơ hre\ng triu hlak jên.

            Mă ăh je# đ^ pơyan io\k yua, mă lei lơ anih te\ch răt sầu riêng tơ\ apu\ng Dak Mil, dêh char Dak Nông duh oei kơdra#m kơdreng. Sầu riêng mă lơ noh đei đe pơdro răt păng 'nhăk te\ch tơ\ dôm dêh char găh tơring pơmơ\t păng hle\ch pơbăh teh đak bơ\n. Yă Lê Thị Thanh Xuân tơ\ thôn Đức Nghĩa, xăh Đức Mạnh, apu\ng Dak Mil ăn tơbăt: unh hnam pơtăm hloh 50 tơm sầu riêng, lơ\m noh 20 tơm pơgep hơdre\ch Thái Lan đei lơ plei. Pơyan âu, ưh kơ jo# jên axong jang, unh hnam yă đei yua hloh 200 triu hlak jên: “Sầu riêng Thái Lan kơjă te\ch kăp, kơjă sầu riêng Thái tơplih rim kơ năr, dang ei kơjă to\k kăp truh 60 rơbâu hlak jên minh k^ bơih. Xơnăm âu mă plei ưh kơ đei lơ mă lei kơjă adoi xơđơ\ng mơ\n”

Yă Nguyễn Thị Khang jing tơ 'ngla anih te\ch răt sầu riêng tơ\ xăh Đức Mạnh, apu\ng Dak Mil ăn tơbăt, hăm sầu riêng bơ\n hmă noh đơ\ng 15.000 truh 20.000 hlak jên đe\ch minh k^; âu jing hơdre\ch sầu riêng plei ie\, găr tih, đei kơmâu gôh. Oei hăm hơdre\ch sầu riêng pơgep, plei tih, hơkâu dreng - găr ie\, ăh pơyan noh te\ch đei pơhlom 40.000 hlak jên minh k^, mă lei dang ei ăh đ^ pơyan noh te\ch truh 60 rơbâu hlak jên minh k^. Yă Nguyễn thị Khang tơroi: “Sầu riêng Thái Lan kơjă kăp mă lei mă lơ noh đe tơ\ tơring pơmơ\t năm răt, oei sầu riêng bơ\n noh đơ\ng 15 truh 20 rơbâu hlak jên đe\ch minh k^. Ưh kơ đei lơ mă lei đei kơjă kăp, sầu riêng Thái noh hơkâu dreng găr ie\, 1 ha pơtăm đei pơhlom 4 truh 5 j^t tơm, minh tơm đei plei đơ\ng 2 truh 3 tă”.

Kiơ\ kơ [ok Lê Văn Điệp, Kơdră Anih choh jang xa păng Hơto\k tơring pơxe\l apu\ng Dak Mih, tơring dang ei đei pơhlom 400 ha sầu riêng, đei tơng ane# lơ\m hơgăt sầu riêng kơ dêh char Dak Nông. Sầu riêng mă lơ noh đei kon pơlei pơtăm hrau lơ\m pơgar cà phê. Mă lei mưh pơtăm adro#, rim ha đei yua đơ\ng 30 truh 40 tấn. Hăm kơjă 25.000 hlak jên minh k^ noh rim ha sầu riêng adoi đei yua kơ tih hlak jên bơih: “Hăm kơjă te\ch noh xơnăm âu jing minh lơ\m dôm xơnăm đei kơjă sầu riêng kăp păng xơđơ\ng. Dang ei tơring oei tơle\ch pơjing hơnăn pơkăp sầu riêng Dak Mil. Rim xơnăm hăm xơnong jang kơ anih jang noh tơgu\m ăn Anih vei lăng kon pơlei apu\ng dôm hla bar pơkăl jang vă pơtho ăn Anih vei lăng kon pơlei rim xăh, anih jang atu\m, jơnu\m kon pơlei jang mir vă xơđơ\ng dôm hơgăt oei đei dang ei, ako\m vei lăng jang tơnăp vă dru\t kơtang tơdrong pơyua păng tơdrong 'lơ\ng hăm plei 'long pơtăm”.

Lan chih păng rapor