VOV4.Bahnar - Vă hơto\k ‘lơ\ng đei yua lơ hăm ‘long pơtăm lơ\m minh hơgăt teh, khei năr tơje# âu, atu\m hăm tơdrong tơgu\m đơ\ng jơnu\m pơgơ\r tơring, lơ unh hnam kon pơlei lơ\m tơring Thuận Hà, apu\ng Đăk Song, dêh char Đăk Nông  hlôi io\k jang kiơ\ tơchơ\t pơtăm ‘nhot rơgoh ‘lơ\ng Vietgap.

Tơguăt hăm hla xơ[ei lôm hloh 8 xơnăm kơ âu, lơ ‘măng unh hnam [ok Nguyễn Xuân Dương, xăh Thuận Hà, apu\ng Đăk Song pơngơ\t kơ đon yuơ hla xơ[ei lôm ưh đei yua, kơjă tơjur. {ok ăn tơbăt : Unh hnam đei hloh 2 ha hla xơ[ei lôm. Pơyan jang yơ kơjă duh kăp, unh hnam [ok đei yua truh 150 triu hlj. Mă lei, yuơ hơto\k jang adro# hla xơ[ei lôm, ưh kơ băt hơdăh tơchơ\t kih thuơ\t pơm jang noh io\k yua ưh đei xơđơ\ng, đei xơnăm lôh hlăm hloh. Xơnăm 2019, đei jơnu\m pơgơ\r tơring hơvơn pơm jang kiơ\ tơchơ\t Vietgap, [ok Nguyễn Xuân Dương hlôi kơdih chă ho\k hơlen păng tơmơ\t lơ\m pơm jang đơ\ng rơih hơdre\ch, trong pơtăm păng io\k yua pơgang vei lăng ‘long pơtăm tro\ kiơ\ tơchơ\t pơtăm ‘nhot rơgoh. Hla xơ[ei lôm to\k giơ\ng, ưh đei hơdrông xa, đei yua lơ hloh: “Adrol ki kon pơlei nhôn pơtăm ‘nhot âu kiơ\ trong jang kơdih, đơ\ng pơgang hơdrông truh rim tơdrong noh tam mă băt hơdăh. Dang ei duh athei tơplih trong pơtăm ‘nhot rơgoh kiơ\ sinh ho\k, xơđơ\ng lơ\m pơm jang, pruih pơgang ưh đei hli hram pơnhu\l, jang kiơ\ sinh ho\k noh tro\ năr pruih pơgang [ôh ‘nhot to\k giơ\ng tôch ‘lơ\ng, ‘nho\ng oh lơ\m hơp tak xăh duh xơkơ\t hăm dih băl athei pơtăm ‘nhot rơgoh”

Duh nhen unh hnam Chu Văn Bắc, tơ\ xăh Thuận Hà, apu\ng Đak Song, duh oei tơplih dar deh trong pơtăm ‘nhot kiơ\ tơchơ\t Vietgap. Dang ei xư hơto\k hloh 3 sao sup lơ jơk kiơ\ trong tơchơ\t âu. Xư duh vang jang lơ\m khul pơtăm ‘nhot rơgoh, kiơ\ tơchơ\t Vietgap tơ\ xăh Thuận hHà, hăm tơdrong ‘meh vă tơroh pơtăm ‘nhot ‘lơ\ng vă te\ch kăp hloh: “Adrol ki pơtăm ‘nhot te\ch hăm kơjă ưh đei xơđơ\ng, hơpơi ăh pơyan jang âu kơjă te\ch xơđơ\ng. Adrol ki pơtăm te\ch lang xă, kơdih ưh đei kơche\ng truh hơgăt pơtăm noh dôm yơ, ưh kơ băt pơtăm đei dôm yơ noh đei yua lơ mă lei kơjă te\ch ưh kăp, noh ưh đei yua ôh. Jang kiơ\ trong âu nhôn ‘meh vă găh jơnu\m jang, dôm bơngai axong jang pơtho ăn kơ nhôn tơring te\ch xơđơ\ng păng te\ch kăp hloh vă nhôn đei yua [iơ\”

Apu\ng Đăk Song dang ei đei 1.100 ha ‘long pơtăm, mă lơ noh pơtăm ‘nhot xa nhen hla xơ[ei lôm, su\p lơ, pro preng, pro dô, ako\m tơ\ dôm xăh Thuận Hà, Thuận Hạnh, Nam Bình. Vă pơtăm ‘nhot, [um tro\ kiơ\ tơchơ\t Vietgap, dôm xơnăm adrol ki, lơ unh hnam kon pơlei lơ\m apu\ng Đăk Song hlôi tơre\k chă hơlen băt tơchơ\t pơtăm ‘nhot, [um rơgoh, đơ\ng tơdrong rơih hơdre\ch truh tơ\ pơtăm, vei lăng, io\k yua. Atu\m hăm noh, anih jang kơpal kơ apu\ng Đăk Song duh tơle\ch lơ trong jang nhen tơgu\m jên jang, hơdre\ch ‘long pơtăm, pơgang vei lăng ‘long pơtăm; pơih lăm ho\k găh khoa ho\k kih thuơ\t vă kon pơlei hơlen io\k yua lơ\m tơdrong jang. Gơnơm tơle\ch jang drơ\ng minh găh lơ trong jang, kon pơlei jang mir hlôh vao hơdăh hloh găh trong pơtăm ‘nhot rơgoh, mă blu\ng đei io\k yua tơnăp

Io\k yua trong jang ‘nao lơ\m choh jang xa to\k bo\k roi năr roi hơto\k pran, vei xơđơ\ng kăp g^t lơ\m tơdrong hơto\k pơ ‘lơ\ng tơmam choh pơtămd dei tơm a hla chă, tang găn tơdrong răm đơ\ng hơyuh to# ‘mi pơm ăn duh nhen kơjă te\ch lơ\m tơring. Hăm dôm tơdrong ke\ đei găh teh păng hơyuh to# ‘mi, apu\ng Đăk Song, dêh char Đăk Nông, hlôi păng to\k bo\k tơre\k truh trong hơto\k pơih xă trong pơtăm ‘nhot rơgoh kiơ\ tơchơ\t VietGAP, tơguăt pơm jang kiơ\ trong tơle\ch te\ch tơmam lơ\m tơring. Tơdrong pơma dơnuh hăm [ok Trần Ngọc Thủy- Pho\ kơdră Anih choh jang xa păng Hơto\k tơring pơxe\l Đăk Song noh gô băt hơdăh hloh găh tơdrong âu.

- {ok ăi, ih kơche\ng thoi yơ găh tơdrong pran lơ\m hơto\k pơtăm ‘nhot tơ\ tơring?

- {ok Trần Ngọc Thủy:  Lơ\m khei năr âu ki, lơ\ma pu\ng, kon pơlei duh hlôi tơplih pơtăm dôm hơdre\ch ‘nhot hăm hơgăt xă mơ\n. Đei dôm tơdrong ‘lơ\ng noh jing hơyuh to# ‘mi, mă [ar noh găh teh. Lơ\m apu\ng hơyuh to# ‘mi rơngơp noh [lep hăm lơ hơdre\ch ‘nhot. Lơ\m khei năr âu ki, hơto\k pran tơnăp, tơmam pơm tơle\ch ‘lơ\ng mơ\n. Oei hăm tơnap tap găh pơtăm ‘nhot kơ apu\ng mă mônh noh te\ch tơle\ch, mă [ar noh hơgăt pơtăm, noh jing minh lơ\m dôm tơdrong tơnap hăm tơring lơ\m dôm xơnăm âu ki.

- Vă hơmet tơnap tap âu, tơle\ch pơtăm ‘nhot, [um kiơ\ tơchơ\t rơgoh ‘lơ\ng, tơring hlôi tơgu\m kon pơlei thoi yơ [ok ăi?

- {ok Trần Ngọc Thủy: Truh khei năr dang ei, khul kơpal kơ tơring duh nhen apu\ng hlôi tơgu\m ăn kon pơlei pơtăm ‘nhot kiơ\ tơchơ\t VietGAP, mă mônh noh găh hơdre\ch, mă [ar noh pơtho găh kih thuơ\t, mă pêng noh tơgu\m pơdrông hơdrông, kơchơ\t sinh ho\k vă kon pơlei io\k yua lơ\m tơdrong pơtăm ‘nhot VietGAP. Lơ\m xơnăm 2018, Anih Choh jang xa duh nhen anih pơtho găh kih thuơ\t hlôi tơle\ch jang 5 ha ‘nhot rơgoh VietGAP noh truh khei năr âu, rim pơgar ‘nhot io\k jang kiơ\ tơchơ\t VietGAP to\k giơ\ng pran. ‘Nâu jing minh lơ\m dôm tơdrong hơto\k găh ‘nhot lơ\m tơring tơjur [iơ\ tơdrong yua pơgang hơdrông duh nhen pơrăm truh jơhngơ\m jăn bơngai pơtăm ‘nhot, mă [ar noh tơle\ch jang đei lơ pơgar ‘nhot ‘lơ\ng rơgoh te\ch ăn bơngai yua lơ\m tơring duh nhen tơring tơje# gơh rơgoh xơđơ\ng hloh.

- {ok ăi, lơ\m tơguăt chă tơring te\ch tơmam, vă hơto\k pơ ‘lơ\ng ‘nhot pơtăm đei noh apu\ng Đăk Song tơle\ch tơchơ\t thoi yơ?

- {ok Trần Ngọc Thủy: Lơ\m khei năr truh noh Anih Choh jang xa duh nhen Anih vei lăng kon pơlei apu\ng hơvơn kon pơlei lơ\m khul pơtăm ‘nhot, pơjing minh hơp tak xăh ‘nhot atu\m hăm apu\ng păng dôm anih jang đei tơre\k, chơ chă anih te\ch tơle\ch ‘nhot pơtăm kiơ\ tơchơ\t VietGAP vă hơto\k io\k yua ăn kon pơlei xơđơ\ng kơjă. Duh ‘meh vă tơguăt đei hăm dôm anih jang mu\k drăm axong jang pơtăm ‘nhot duh nhen dôm anih răt ‘nhot hlôi tơchơ\t jang lơ\m tơring kơ apu\ng vă tơle\ch te\ch lơ\m tơring tih xă nhen plei tơm Hồ Chí Minh păng dôm dêh char nai.  

-O| ah, bơnê kơ ih [ok hơu!

Lan – Thuem chih păng rapor