Bơngai jĭ drăkăn rơneh sơnăm 1976, oei tơ̆ thôn Cư Bang, xah Cư Pơng, apŭng Krông Búk. Kiơ̆ đơ̆ng ‘nhŏng oh bơngai jĭ âu tơroi, ah năr 09/10, bơngai âu pơlŏ tŏ, jơhngơ̆m jăn lap, păng kơdih huch pơgang mă lei ưh đei da ƀiơ̆.

Đơ̆ng năr 10 truh năr 14/10, đei ‘nhăk hơmet jĭ tơ̆ Hnam pơgang kơ khul linh kơ Kŏng ti Cà phê 15; Hnam pơgang Hòa Bình, thĭ xah Buôn Hồ; Hnam pơgang Thiện Hạnh păng Hnam pơgang tơm tơring Tây Nguyên. Tơ̆ dôm anih hơmet jĭ, bơngai jĭ âu đei khăm păng sơkơ̆t noh ƀơm pơlŏ tŏ lĕch đe Dengue kơlih hơkâu jăn bek plên păng pham lơ̆m hơkâu jăn tơjur dêh hnang. Jô̆ truh năr 17/10, dêh char Đak Lăk ƀôh đei hloh 5.000 ‘nu bơngai ƀơm pơlŏ tŏ lĕch đe, lơ̆m noh đei 3 ‘nu lôch.