“Bơ̆ jang pơm hơtŏ băl kơplăh drŏ kăn hăm drŏ nglo păng sek tơlang dôm tơdrong kăl hăm đe drŏ kăn păng đe hơioh” găh Tơdrong jang 8, Khul drŏ kăn dêh char Tuyên Quang akŏm jơhngâm tơlĕch jang tơ̆ 570 pơlei lơ̆m 121 xăh găh tơring kon kông lơ̆m dêh char. Vă bơ̆ jang đei yoa ‘lơ̆ng tơdrong jang ‘nâu, dôm khul grŭp drŏ kăn tơ̆ dêh char Tuyên Quang pơjing vă jê̆ 340 trong jang, roi tơƀôh lơ̆m tơpôl đei tơdrong vang akŏm đơ̆ng đe drŏ nglo păng drŏ kăn hai. Đơ̆ng đei Khul chă roi tơbăt lơ̆m tơpôl găh tơdrong hơtŏ băl kơplăh drŏ kăn hăm drŏ nglo, pơjing anih arih xa sơđơ̆ng ‘lơ̆ng ăn drŏ kăn păng đe hơioh roi tŏk ‘lơ̆ng.

Yă Hoàng Thị Lan Anh, Phŏ Kơdră vei lăng Khul drŏ kăn xăh Hùng Đức, apŭng Hàm Yên akhan, tơdrong pơjing Khul chă roi tơbăt lơ̆m tơpôl ‘nŏh jĭ vă roi tơƀôh, krao hơvơn kon pơlei tơplih ming đon tơchĕng, trong bơ̆ jang, vang tơgop sut hŭt lê̆ dôm đon tơchĕng ưh kơlăp găh drŏ kăn hăm drŏ nglo lơ̆m unh hnam păng tơpôl:  “Tơdrong pơjing Khul chă roi tơbăt lơ̆m tơpôl âu gô tơgŭm ăn tơdrong roi tơƀôh ăn rim bơngai jang păng kon pơlei băt hơdăh ƀiơ̆ găh tơdrong hơtŏ băl kơplăh drŏ kăn hăm drŏ nglo păng tơgŭm băl pơjing đei tơdrong hơtŏ ‘lơ̆ng lơ̆m tơdrong arih xa kơ unh hnam vă gơ̆h pơjing unh hnam phĭ tơtŏ dơnŏ ‘lơ̆ng păng hiôk chơt.”

Tơ̆ xăh Hùng Đức, apŭng Hàm Yên, Khul drŏ kăn dêh char rơih pơlei Khuôn Then bơ̆ jang pơjing Khul roi tơbăt lơ̆m tơpôl. Khul đei 8 ‘nu bơngai ‘nŏh jĭ dôm bơngai jang tơm hơnơ̆ng năm hơdrol păng băt trong roi tơbăt, krao hơvơn kon pơlei. Mŏ Vi Thị Xuân-1 ‘nu bơngai jang lơ̆m khul roi tơbăt lơ̆m tơpôl pơma: “Kiơ̆ đơ̆ng chă roi tơbăt tơgŭm ăn kơdih kâu inh kŭm băt ƀiơ̆ tơdrong hơtŏ băl kơplăh drŏ kăn hăm drŏ nglo păng trong tang găn teh dong băl lơ̆m unh hnam, vei lăng drŏ kăn păng đe hơioh. Đơ̆ng noh kơdih kâu inh kŭm vă roi tơbăt ăn đĭ đăng mih ma duch nă lơ̆m pơlei, băt hơdăh găh tơdrong hơtŏ băl đơ̆ng drŏ kăn hăm drŏ nglo păng vei lăng đei hơioh păng drŏ kăn vă tang găn tơdrong teh tôn băl lơ̆m unh hnam tơ̆ pơlei.”

‘Ngoăih kơ Khul chă roi tơbăt lơ̆m tơpôl, dôm khul grŭp drŏ kăn tơ̆ dêh char Tuyên Quang oei pơjing ‘nao vă jê̆ 30 anih gơh lui kiơ̆ vă roi tơƀôh trong sek tơlang dôm tơdrong hil băl, tơgŭm ăn bơngai răm đơ̆ng teh dong lơ̆m unh hnam. Kŭm hăm ‘nŏh, Khul drŏ kăn dêh char Tuyên Quang hlôi jang hơdoi hăm dôm hnam trưng pợing lơ câu lạc bộ “Bơngai chĕp kơ̆l tơdrong tơplih”. ‘Nâu gô jing anih bơ̆ jang hŏk pơhrăm tôch đei yoa ăn đe oh mưh bơ̆ jang tơdrong pơm hơtŏ băl kơplăh drŏ kăn hăm drŏ nglo, tơgop sek tơlang dôm tơdrong kăl hăm đe hơioh păng tơring kon kông.

Oh Hoàng Thị Khánh Huyền, hŏk tơ̆ Hnam trưng teh đak rong hŏk tro kon kông ATK apŭng Sơn Dương akhan: vang akŏm lơ̆m câu lạc bộ, oh păng đe bôl boăl đei ngôi pơchơt, pơma nuh, roi tơƀôh ăn băl dôm tơdrong oei tơchĕng đơ̆ng sơnăm păh iung. ‘Ngoăih kơ ‘nŏh, kơdih kâu gơ̆h hlôh vao ƀiơ̆ trong vei lăng kơdih vă gơ̆h sơđơ̆ng jơhngâm yak năm tơ̆ hơnăp ning mônh kơnh: “Vang mât lơ̆m câu lạc bộ tơgŭm ăn oh băt hơdăh ƀiơ̆ găh tơdrong iŏk unh om, tơdrong teh tôn băl lơ̆m unh hnam, teh tôn băl tơ̆ hnam trưng; tơgŭm ăn oh gơh roi tơƀôh ăn bôl boăl lơ̆m hnam trưng, tơ̆ hnam veh ver tơdrong teh tôn băl lơ̆m unh hnam.”

Câu lạc bộ “Bơngai chĕp kơ̆l tơdrong tơplih” jĭ 1 lơ̆m 4 trong jang gĭt kăl đơ̆ng Tơdrong jang 8 “Pơm hơtŏ băl kơplăh drŏ kăn hăm drŏ nglo păng sek tơlang dôm tơdrong kăl hăm đe drŏ kăn păng đe hơioh”. Kô Lý Hải Vân, tơ̆ Hnam Trưng teh đak rong hŏk tro kon kông ATK apŭng Sơn Dương ăn tơbăt: “Vă pơtâp pơhrăm dơ̆ng ăn đe bôl boăl lơ̆m câu lạc bộ, bơngai jang lơ̆m câu lạc bộ vă đe boăl gơ̆h chă roi tơƀôh ăn bôl boăl hŏk tro tơ̆ hnam trưng kŭm nhen roi tơbăt ăn bơngai lơ̆m hnam, bôl boăl tơ̆ pơlei mưh brŏk tơ̆ tơring ‘nŏh gô đei lơ tơdrong jang ‘lơ̆ng vă tơgop ăn tơpôl.”

Tơdrong pơjing câu lạc bộ hlôi pơtho ăn đe oh hŏk tro kon kông lơ tơdrong tôch hơiă, đei yoa vă đe oh pơ̆n iung pơma tơlĕch nơ̆r kơdih, tơplih ming đon tơchĕng, trong bơ̆ jang, hŏk pơhrăm păng vang tơgop sut pơđĭ dôm tơdrong juăt ưh kơ ‘lơ̆ng tơ̆ tơring groi kông. Hrei ‘nâu, dôm Câu lạc bộ âu vang tơgop bơ̆ jang ‘lơ̆ng lơ tơdrong jang, tơdrong tơgŭm, sek tơlang đei dôm tơdrong ƀơm truh tơ̆ đe hơioh; tơgŭm ăn đe thây kô păng mĕ ƀă bơ̆ jang ‘lơ̆ng tơdrong pơtho pơhrăm ăn kon hơ ‘lơ̆p păng tang găn dôm tơdrong teh tôn băl, pơrăm ƀơ ƀrơh băl, rôp tĕch bơngai păng iŏk unh om hrôih tơ̆ đe hơioh… /.