Sơnăm hŏk ‘nao 2024- 2025 apŭng Kon Plông, dêh char Kon Tum đei hlŏh 7.000 ‘nu hŏk tro hăm 29 hnam trưng. Ƀât đe oh hŏk tro lăm 1 pơtơm năm hŏk, đe oh đei thây kô pơtho tơƀôh trong tơjră hăm teh dơdrŏ tơdăh đei. Kô Cao Thị Nguyệt, Hiê̆u trơng Hnam trưng jăl mônh Măng Đen, ăn tơbăt: “Đe oh đĭ băt trong tang găn, vei hơkâu mưh đei teh dơdrŏ bơih. Mă loi ‘nŏh đe boăl hlôh vao lơ tơdrong, đei đon răng, vei lăng kơdih kâu tôch hrĕnh. Mưh đei teh dơdrŏ kiơ ‘nŏh đe oh chă trong năm truh tơ̆ anih kơ ‘nơp ‘lơ̆ng, sơđơ̆ng hlŏh”.

Ƀok thây Võ Quang Vinh, Phŏ Kơdră Anih vei lăng pơtho pơhrăm apŭng Kon Plông pơma hơdăh, kơchăng tơjră hăm teh dơdrŏ, dôm sơnăm tơjê̆ âu tơdrong pơm hơtŏk đon răng, kơchăng ăn đe ŏh păng thây kô vă găn ƀiơ̆ tơdrong hiong răm mưh đei teh dơdrŏ tơ̆ apŭng ‘nŏh jĭ tơdrong jang hơnơ̆ng đơ̆ng anih pơtho pơhrăm kơ apŭng: “Anih vei lăng pơtho pơhrăm vang jang hơdoi hăm lơ anih jang pơgơ̆r pơtâp pơhrăm tơjră hăm teh dơdrŏ tơdăh đei. Hăm hŏk tro, thây kô tơ̆ dôm hnam trưng mưh đei roi tơbăt đei teh dơdrŏ ‘nŏh đĭ đăng hŏk tro bơ̆n athei kơdâu lĕch tơ̆ ‘ngoăih mă ưh ‘nŏh kơ ‘nơp hơla kơƀang dăh mă giơng. Tơdrong pơm kiơ̆ đơ̆ng đe thây kô păng hŏk tro tôch ‘lơ̆ng”.

Mă tơpă ăn ƀôh, iŏk đơ̆ng khei 4/2021 ƀât mă tĕh dơdrŏ đei roi lơ tơ̆ apŭng Kon Plông, dêh char Kon Tum, Anih jang Vật lý plei teh jang hơdoi hăm khul kơdră pơgơ̆r tơring vang roi tơbăt, pơtho tơƀôh ăn kon pơlei đei đon kơchăng tơjră vă găn ƀiơ̆ tơdrong hiong răm. Ƀok Phạm Thanh Bình, Phŏ Kơdră Anih pơgơ̆r tang găn sar bar, chă dŏng bơngai răm, Kơdră Anih vei lăng choh jang xa păng atŏk tơiung tơring tơrang apŭng Kon Plông, pơma hơdăh: “Apŭng kơchăng pơjing lơ trong tơjră gĭt kăl ‘nŏh jĭ roi tơbăt dôm tơdrong tơjră, vei lăng kơdih kâu. Truh dang ei kơsô̆ kon pơlei iŏk đei nơ̆r pơtho tơƀôh trong vei lăng kơdih kâu đei hlŏh 90%. Adrol ki kon pơlei tôch pơngơ̆t, ưh hơđơ̆ng jơhngâm, đơ̆ng rŏng kơ đei roi tơbăt kon pơlei hlôh vao, kơna ưh pă gan hli pơngơ̆t dêh bơih”.

Tơjê̆ âu, đơ̆ng rŏng kơ đei teh dơdrŏ jăng hlŏh đơ̆ng sơ̆ truh dang ei, jăng truh 5 đô̆ richter, pơm dơdrŏ jơ̆p tơring Tây Nguyên, Anih jang Vật lý plei teh păng khul kơdră chĕp kơ̆l apŭng Kon Plông hơnơ̆ng pơih pơgơ̆r lơ tơdrong roi tơbăt, pơtâp pơhrăm, pơtho tơƀôh ăn vă jê̆ 1.000 ‘nu kon pơlei găh trong tơjră, vei lăng kơdih mưh đei teh dơdrŏ. Atŭm hăm ‘nŏh ƀơk hlŏh 26.700 hlak hla ar tơroi, hla ar chih nơ̆r pơtho tơƀôh tơjră hăm teh dơdrŏ ăn kon pơlei.

Tiên si Bùi Thị Nhung, bơngai juăt tơchĕng hơlen găh teh dơdrŏ tơ̆ Anih jang Vật lý plei teh- Anih tơchĕng hơlen păng jang kơmăy kơmŏk Việt Nam ăn tơbăt, đơ̆ng chă hơlen năng dôm tơdrong đei ƀơm truh đơ̆ng teh dơdrŏ hăm kon pơlei tơ̆ tơring đei teh dơdrŏ lơ̆m apŭng Kon Plông, dêh char Kon Tum, anih jang hơnơ̆ng chih tơlĕch lơ hla ar lăp hăm yăn âu vă hơtŏk đon kơchăng tang găn, đei trong ăn kon pơlei arih xa hơdai đunh hăm teh dơdrŏ: “Nhôn đĭ băt hơdăh tơdrong hơpơi ‘mĕh đơ̆ng kon pơlei kŭm nhen dôm tơdrong krê mă mih ma duch nă gô tơƀâp mưh đei teh dơdrŏ. Đơ̆ng noh nhôn chih tơlĕch lơ hla ar pơtho tơƀôh ăn kon pơlei lăp hăm rim tơdrong tơ̆ yăn âu tơ̆ tơring”.

Vang yak hơdoi, tơgŭm ăn kon pơlei păng khul kơdră pơgơ̆r tơ̆ tơring đei teh dơdrŏ lơ̆m apŭng Kon Plông, dêh char Kon Tum, truh dang ei Anih jang Vật lý plei teh hlôi chô̆ hơmet tơ̆ apŭng đĭ đăng 12 tŏ kơmăy hơlen năng vă tơtom hơlen năng teh dơdrŏ kŭm nhen pơvih ăn tơdrong tơchĕng hơlen. Bơ̆ jang kiơ̆ nơ̆r pơtho đơ̆ng Thủ tướng teh đak, Anih jang oei adrin pơgơ̆r tơchĕng hơlen, pơm hơdăh yoa kiơ đei teh dơdrŏ roi dêh, ưh ê tơ̆ tơring. Vă tơgŭm ăn kon pơlei tơ̆ tơring đei teh dơdrŏ Kon Plông hơtŏk đon kơchăng tơjră, arih xa hơdai đunh đai hăm teh dơdrŏ, Quân khu 5 hlôi tơlĕch trong kơchăng bơ̆ jang tơjră hăm teh dơdrŏ tơ̆ tơring. Găh đunh đai ning mônh kơnh, dêh char Kon Tum kŭm oei tơchĕng truh tơdrong hơmet ming trong jang tŏk vă druh kiơ păng pơm tơjur biơ̆ hiong răm mưh đei teh dơdrŏ./.